Ol i Dediketim Wanpela Bikpela Haus

“LONG Sarere Ol Witnes Bilong Jehova long Australia bai opim nupela hetkwota bilong ol. Em i gutpela haus tru, na long em i winim olgeta narapela haus olsem bilong ol narapela misin long Australia. . . . Ol Witnes Bilong Jehova tasol i sanapim dispela haus, olsem ol akitek na enjinia na plama na ol man bilong lainim brik, na ol i no kisim pe long mekim dispela wok.” Wanpela nius i tok olsem, em Sydney Morning Herald bilong Mas 16, 1983.

Namba wan hap bilong dispela haus em i olsem 3-pela haus ol i skruim wantaim, na i gat ol ofis i stap long en. Na i gat ol woksop tu, na sampela bikpela haus bilong putim ol samting bilong wokim ol Bikpela gaden bilong ol na samting bilong ol animal. Long ai bilong dispela namba wan hap bilong haus ol i wokim wanpela haus na ol ofis i stap long en, em ol ofis Bilong lukautim wok Bilong Ol Witnes long Australia. Na i gat wanpela Haus Kingdom tu i stap long dispela haus, em inap long 200 man i ken sindaun long en.

Ol i wokim haus faktori i gat tupela flua, na mak bilong flua em inap olsem 5,400 skwe-mita, na bai em inap tu sapos wok bilong Jehova i go bikpela long bihain. Ples slip i gat tupela flua na sampela i gat 4-pela flua, na em inap long 135 man. Na i gat ol haus kaikai tu, na haus sik, na haus bilong wasim klos, na ofis bilong dokta bilong stretim tit, na rum bilong kutim gras bilong ol manmeri i wok long dispela hap, na ples bilong wokim ol kaikai. Planti tausen brata sista i mekim ol dispela wok na ol i no kisim pe, olsem na Sosaiti i no lusim bikpela mani tumas long wokim dispela bikpela haus.

Lain Witnes i Go Bikpela

Bipo brens-ofis i bin i stap long hap bilong Melbon, na long 1929 ol i putim long Sidni. Long dispela taim 11-pela man tasol i wok long brens, na i gat 340 Witnes tasol long Australia. Tasol long 1971 lain Witnes inap 23,000, na long dispela taim ol i kirap long wokim nius Wastaua na Kirap! (tok Inglis) long Australia. Olsem ol i mas wokim wanpela haus long graun bilong ol long Sidni, em i bilong wokim ol dispela magasin, na i gat ol ofis tu long en.

Tasol lain Witnes i go bikpela gen, na 5-pela yia bihain ol i laik wokim wanpela haus i gat 4-pela flua, tasol kaunsil i no laik. Olsem na ol i tingting long senisim brens-ofis i go long wanpela hap graun ol i bin kisim inap 40 yia bipo. Em i bikpela hap graun inap olsem 40 hekte, em i stap ausait long taun inap 48 kilomita. Ol i toksave long kaunsil long ol i laik sanapim brens-ofis long dispela graun na kaunsil i tok: “I orait!”

Long Desemba 1978 Lain Bilong Bosim Ol Witnes Bilong Jehova ol i orait long wokim dispela nupela haus brens, olsem na ol i kirap redim ol samting bilong wokim. Ol i salim tok i go bilong singautim ol volantia i kam i stap olsem wanpela yia samting na mekim wok long sanapim dispela haus. Sampela i gat longwe rot tru bilong i kam, long wanem, Australia em i bikpela kantri.

Ol Ples i Longwe Longwe

Australia em i namba 6 long ol bikpela kantri long graun. Mak bilong en i wankain olsem bilong Amerika (lusim Alaska na Hawaii). Tasol Australia i gat 15 milion manmeri tasol, na klostu olgeta i stap long hap bilong nambis. Insait i no gat planti man, tasol bikpela hap graun i stap, em olsem ples nating. Klostu olgeta man bilong Australia ol i save sindaun long 6-pela bikpela taun, na ol dispela taun i stap longwe longwe. Taun Pet i stap long Wes kos, na Sidni i stap longwe tru long Pet inap olsem 4,000 kilomita.

Tasol planti handet Witnes i kam longwe olsem bilong wok long dispela nupela haus brens. Planti ol i gat longwe rot tru, inap sem 1,600 kilomita, tasol 3,000 ol i kam. Ol yet i baim rot Bilong ol, na sampela i stap na wok inap sampela wik, na sampela i stap inap long sampela mun, na sampela ol i stap inap sampela yia. Sampela i bin baim haus na graun bilong ol i go long ol narapela man, na sampela i bin pasim bisnis long ol, na sampela i kisim malolo long wok na ol i kam, na sampela i bin lusim planti samting bilong skin bambai ol inap i kam na mekim wok. I olsem Baibel i tok, lain bilong God bai ‘go wantaim ol narapela na helpim ol’ long mekim wok.—Sam 110:3.

Sampela ol i man bilong save long sampela wok na ol i kam mekim dispela wok. Na sampela i kam bilong mekim ol wok nabaut. Wanpela i save gut long pasin bilong givim kaikai long ol man olsem ol i mekim long ol haus kaikai, na em i kam mekim dispela wok. Ol i baim wanpela bikpela greda, tasol i no gat man bilong draivim dispela greda. Orait wanpela draiva bilong Ailan Tasmenia i harim, na em i ring long ol na em i tok, em i ken i kam wok inap 3-pela wik na draivim dispela greda.

Sampela man bilong tanim simen ol i kam longwe hap inap 1,000 kilomita bilong tanim simen na wokim ol samting long en. Sampela bilong wokim rup insait (siling) ol i kam 1,100 kilomita. Ol man bilong wokim banis bilong dispela hap graun ol i kam 1,500 kilomita. Na long olgeta Sarere inap 100 Witnes bilong klostu, olsem 200 kilomita samting, ol i kam wok. Taim ol i kam, ol man Bilong wok long olgeta Sarere inap olsem 300.

Sampela Witnes long Not Kwinslan ol i gat somil, na ol i salim ol gutpela gutpela plang i kam long ol bikpela trak bilong ol. Ol i kam longwe tru, inap 3,200 kilomita. Taim brens i kisim, ol i polisim ol dispela plang na i kamap gutpela tru na i lait, na ol i wokim sampela hap banis bilong haus long en. Ol man i lukim na ol i tok em i gutpela tru.

Na ol brata long olgeta hap bilong Australia ol i salim planti kontribusin olsem mani, bilong helpim dispela wok. Wanpela pikinini meri em i gat 6-pela krismas tasol, em i raitim pas long brens em i tok: “Mi laik givim dispela mani long yupela, mi bin kamautim long beng bilong mi long skul. Mi wok long bungim dispela mani inap wanpela yia.” Dispela pikinini em i salim $41.00! Na brens i kisim wanpela sek long hap Bilong Kwinslan, na i gat pas i tok: “Wanpela sista bilong yupela em i salim dispela mani, na em i no laik kamapim nem bilong em. Man bilong em i dai pinis na em i stap wanpis. Em i givim olgeta mani bilong em, na em i kain olsem wanpela meri Baibel i stori long em, man bilong em i dai pinis na em i stap wanpis, tasol em i givim olgeta mani bilong em long Jehova. Na dispela sista tu i mekim olsem, long wanem, em i bilip na wetim Jehova. “Dispela meri i salim $6,283.94! Em nau, Jehova i bin kirapim tru bel bilong ol manmeri long givim samting bilong ol olsem ofa.—1 Kronikel 29:9.

Redi long Mekim Wok Bilong Kingdom long Bihain

Nupela haus brens bai i gutpela hekwota bilong lukautim wok autim tok long 36,000 Witnes Bilong Jehova ol i stap long 571 kongrigesen long olgeta hap long Australia. Planti man bilong Australia ol i bilong ol narapela hap na ol i kam stap olgeta long Australia na ol i kamapim pikinini. Olsem na brens i mas i gat litresa long 52 tok ples. Na brens i save wokim litresa long 14 tok ples, em bilong ol ailan long Pasifik, olsem Papua Niugini na Ailan Solomon na Fiji na sampela ailan moa.

Long olgeta mun brens-ofis i wokim 750,000 magasin long tok Inglis. Ol i wokim long nupela masin ol i kisim long Epril 1983, em hetkwota long Bruklin i bin salim i kam. Bilong prinim ol samting bilong dispela masin, ol i mas i gat sampela rum tudak na wanpela kain kamera kompiuta na sampela ol narapela samting.

Insait long 18 mun i go pinis, 4,000 nupela pablisa i kamap na lain Witnes i go bikpela inap 13 pesen. Ol i wokim 16,200 Baibel-stadi, na long 1983 inap 72,457 manmeri i bin i kam long Memorial bilong tingim i dai bilong Krais, olsem na ating bihain bai lain bilong Jehova i go bikpela yet long Australia.

De Bilong Dediketim Haus

Inap wanpela wik ren i wok long kam. daun, tasol long Sarere, Mas 19, 1983 ren i pinis na gutpela taim i kamap, na inap olsem 2,000 manmeri i kam bung, em brens yet i bin singautim ol i kam long dispela bung. Planti ol i bin i stap longtaim long tok i tru, na ol i kirap mekim wok autim tok paslain long 1945, na nau ol i bung long nupela brens, em De Bilong Mekim Dediket. Siaman i tok, sapos yumi bungim ol yia ol dispela brata sista i bin mekim wok bilong Jehova, em inap olsem 65,000 yia. Nau ol dispela lapun i bung wantaim na ol i amamas tru! Sampela brata sista bilong Amerika na Fiji na Nusilan na Papua Niugini ol tu i kam, na ol i bringim Gude bilong ol brata i kam na sampela ekspiriens tu.

Brens bilong Australia em i namba 3 brens em Sosaiti Was Taua i bin kamapim. Bipo dispela brens i bin lukautim wok bilong Sosaiti long planti hap bilong graun, olsem planti ailan bilong Saut Pasifik, na Tailan, Vietnam, Laos, Kambodia, Malesia, Indonesia, Hong Kong, Singapo, Saina. Nau i gat 13 brens long ol dispela hap, ol i lukautim wok bilong autim tok bilong Kingdom. Sampela painia bilong Australia i bin kirapim wok long ol dispela hap long 1930 i go 1940 samting, na nau sampela bilong ol i kam long dispela bung bilong dediketim nupela haus brens. I gat 88 brata sista i wok long Betel long Australia na ol i amamas long lukim ol dispela brata sista bilong longtaim na mekim gut long ol, ol i olsem ol pupu bilong spirit!

Lloyd Barry em i wanpela bilong Lain Bilong Bosim Ol Witnes Bilong Jehova, na bipo em i bin wok long haus Betel long Australia. Long Sarere belo bek em i dediketim nupela haus brens long God Jehova; em i no dediketim long wanpela man o wanpela oganaisesen.

Long Sande Mas 20 bikpela ren i kam daun gen, tasol 10,468 manmeri ol i bung long Worik Fam, em i stap klostu, na ol i harim ol tok long yumi mas wok strong yet long mekim wok bilong Jehova na bai dispela wok i go bikpela nau long dispela “las taim.” Telefon i bringim ol dispela tok i go long 10-pela ples moa long Australia, em ol manmeri i bung long en bilong harim ol dispela tok. Olsem na inap 36,757 manmeri ol i harim dispela tok long Sande!

Planti gutpela ekspiriens i kamap, na dispela program ol man i harim i kirapim bel bilong ol long “taitim bun tru” long “autim dispela gutnius bilong kingdom” long olgeta hap insait long bikpela kantri bilong Australia. Dispela wok tasol i as bilong kirapim nupela haus brens long Australia, na taim dispela wok i stap yet, orait dispela haus brens tu bai stap na mekim wok bilong en.—Luk 13:24; Matyu 24:14.