Kingdom Bilong God Em Wanem Samting? Rot Bilong Soim Yumi Laikim Kingdom

YU SAVE long beten Jisas i bin skulim ol disaipel long en?— Sapos yu no save, orait yumi ken ritim dispela beten long Baibel, long Matyu 6:9-13. Dispela beten, em planti man i kolim olsem Beten Bilong Bikpela, em i gat dispela tok: “Kingdom bilong yu i mas i kam.” Yu save Kingdom Bilong God em wanem samting?—

Orait, king em i man i bosim wanpela kantri. Na gavman bilong em ol i kolim olsem kingdom. Long sampela kantri, man i bosim gavman ol i kolim em olsem presiden. Wanem nem bilong Bosman bilong gavman bilong God?— Ol i kolim em King. Long dispela as ol i kolim gavman bilong God olsem Kingdom.

Yu save God Jehova i bin makim husat long stap King long gavman bilong Em?— Pikinini bilong em, Jisas Krais. I gat wanem as na Jisas i gutpela King tru, winim ol king ol man inap makim?— Jisas i laikim tru Papa bilong em, Jehova. Olsem na oltaim em i save mekim ol samting i stret.

Planti yia paslain long mama i karim Jisas long Betlehem, Baibel i tokaut long dispela samting na long em bai kamap King God i makim. Yumi ken ritim dispela tok long Aisaia 9:6, 7 long Baibel King James Version. Em i tok: “Wanpela pikinini i kamap pinis long yumi, wanpela pikinini man God i givim long yumi: na em bai bosim gavman: na em bai i gat nem olsem . . . Prins Bilong Gutaim. Gavman bilong em bai wok long i go bikpela oltaim, na gutaim bai stap oltaim.”

Yu save bilong wanem Baibel i kolim King bilong Kingdom Bilong God olsem “Prins”?— Dispela prins em i pikinini man bilong wanpela king. Na Jisas em i Pikinini Bilong Bikpela King, Jehova. Tasol Jehova i bin mekim Jisas i kamap King long gavman bilong Em, dispela gavman bai bosim graun inap wan tausen yia. (KTH 20:6) Taim Jisas i baptais pinis, em i kirap “autim tok long ol manmeri. Em i tok olsem, ‘Yupela i mas tanim bel, long wanem, kingdom bilong heven em i kam klostu pinis.’”—Matyu 4:17.

Yu ting i gat wanem as na Jisas i tok dispela Kingdom i kam klostu pinis?— Long wanem, dispela King em bai mekim wok bos long heven, em i stap wantaim ol! Olsem na Jisas i tokim ol man olsem: “Kingdom bilong God em i stap pinis namel long yupela.” (Luk 17:21) Olsem wanem? Yu gat laik long King Bilong Jehova i stap klostu tru long yu na bai yu inap tatsim em?—

Orait tokim mi, Jisas i bin kam long graun bilong mekim wanem bikpela wok?— Jisas i bekim dispela askim na em i tok: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Luk 4:43) Jisas i save olsem em wanpela i no inap mekim olgeta wok bilong autim tok. Olsem na yu ting em i mekim wanem?—

Jisas i kisim ol man i go wantaim em na soim ol long pasin bilong autim tok. Ol namba wan lain em i skulim em ol 12-pela man em i bin makim olsem ol aposel. (Matyu 10:5, 7) Tasol olsem wanem? Jisas i skulim ol aposel tasol long mekim dispela wok? Nogat, Baibel i tok Jisas i bin skulim planti arapela tu long autim tok. Bihain em i salim 70 arapela disaipel i go tupela tupela paslain long em. Na ol i skulim ol man long wanem samting?— Jisas i tok: “Yupela i mas autim tok long ol olsem, ‘Kingdom bilong God i kam klostu pinis long yupela.’” (Luk 10:9) Long dispela rot ol man i kisim save long gavman bilong God.

Bipo tru long Israel, ol nupela king i save sindaun long yangpela donki na go insait long taun bilong soim ol yet long ol man. Jisas i mekim dispela samting taim em i go laspela taim long Jerusalem. Tingim, Jisas bai kamap King long Kingdom Bilong God. Olsem wanem? Ol man i laik bai em i kamap King bilong ol?—

Taim em i sindaun long donki na i go, planti man i kirap lainim ol longpela klos bilong ol long rot. Ol arapela i katim lip bilong ol diwai pam na putim long rot. Pasin ol i mekim i soim olsem ol i laik bai Jisas i kamap King bilong ol. Ol i singaut na tok: “God i ken mekim gut long dispela king i kam long nem bilong Bikpela”! Tasol i no olgeta man i amamas. Sampela bikman bilong lotu ol i tokim Jisas olsem, ‘Tokim ol disaipel bilong yu long pasim maus.’—Luk 19:28-40.

Faipela de bihain ol i holim Jisas na kisim em i go long wanpela haus king bilong sanap long ai bilong gavena, em Pontius Pailat. Ol birua bilong Jisas i tok olsem Jisas yet i tok em i wanpela king na em i birua long gavman Rom. Olsem na Pailat i askim Jisas long dispela samting. Jisas i tok em i no laik kirap bosim gavman. Em i tokim Pailat olsem: “Kingdom bilong mi em i no bilong dispela graun.”—Jon 18:36.

Pailat i go ausait na i tokim ol man olsem em i no painim wanpela rong long Jisas. Tasol nau ol man i no laik bai Jisas i stap King bilong ol. Ol i no laik bai Pailat i larim em i go fri. (Jon 18:37-40) Pailat i toktok gen wantaim Jisas na em i bilip olsem Jisas i no bin mekim wanpela rong. Olsem na long laspela taim Pailat i kisim Jisas i go ausait, em i tok: “Lukim king bilong yupela”! Tasol ol manmeri i singaut olsem: “Rausim em! Rausim em i go! Nilim em long diwai”!

Pailat i askim ol: “Yupela i laik bai mi nilim king bilong yupela long diwai”? Ol hetpris i tok: “Mipela i no gat narapela king. Sisar wanpela tasol!” Man! Tingim dispela pasin ol i mekim! Ol dispela pris nogut i kirapim ol man long sakim Jisas!—Jon 19:1-16.

Long nau tu i wankain. Planti man i no laik bai Jisas i stap King bilong ol. Ating ol i tok ol i bilip long God, tasol ol i no laik bai God o Krais i tokim ol long ol samting ol i mas mekim. Ol i laikim ol gavman bilong ol yet hia long graun.

Olsem wanem long yumi? Taim yumi kisim save long Kingdom Bilong God na olgeta gutpela samting em bai mekim, dispela i kirapim yumi long pilim olsem wanem long God?— Yumi laikim em, a?— Orait, olsem wanem yumi ken soim God olsem yumi laikim em na yumi laik bai Kingdom bilong em i bosim yumi?—

Yumi inap kamapim bel bilong yumi long God long rot bilong bihainim pasin bilong Jisas. Na Jisas i bin mekim wanem bilong soim olsem em i laikim Jehova?— Jisas i tok: “Oltaim mi save mekim ol samting em i laikim.” (Jon 8:29) Yes, Jisas i bin kam long graun ‘bilong bihainim laik bilong God’ na ‘pinisim wok God i bin givim long em.’ (Hibru 10:7; Jon 4:34) Tingim samting Jisas i bin mekim paslain long em i kirapim wok bilong em long autim tok.

Jisas i go long Jon Bilong Baptais long wara Jordan. Taim ol i go insait long wara, Jon i putim Jisas i go insait olgeta long wara na apim em i kam antap gen. Yu save bilong wanem Jon i baptaisim Jisas?—

Jisas i bin tokim Jon long mekim olsem. Tasol olsem wanem yumi save olsem God i laik bai Jisas i kisim baptais?— Yumi save, long wanem, taim Jisas i lusim wara na i kam antap, em i harim nek bilong God long heven i tok: “Yu Pikinini bilong mi. Mi laikim yu tumas. Bel bilong mi em i amamas long yu.” Na God i salim holi spirit i kam daun long Jisas long rot bilong wanpela pisin ol i kolim balus. Olsem na long rot bilong baptais, Jisas i soim olsem em i laik mekim wok bilong Jehova long laip olgeta bilong em, yes, inap oltaim oltaim.—Mak 1:9-11.

Nau yu stap pikinini yet, tasol bihain bai yu mekim wanem?— Bai yu bihainim pasin bilong Jisas na kisim baptais?— Yu mas bihainim pasin bilong em, long wanem, Baibel i tok em i ‘soim yu pinis dispela pasin bilong em, bai yu ken bihainim.’ (1 Pita 2:21) Taim yu kisim baptais, yu soim olsem yu gat laik tru long Kingdom Bilong God i bosim yu. Tasol baptais tasol em i no inap.

Yumi mas bihainim olgeta samting Jisas i bin skulim yumi long en. Jisas i tok yumi “no bilong dispela graun.” Yu ting yumi bihainim tok bilong em sapos yumi insait long ol samting bilong dispela graun? Jisas na ol aposel bilong em i no bin insait long ol kain samting olsem. (Jon 17:14) Tasol ol i bin mekim wanem?— Ol i tokim ol arapela man long Kingdom Bilong God. Dispela em i bikpela wok long laip bilong ol. Olsem wanem? Yumi tu inap mekim dispela wok?— Yes, na yumi bai mekim sapos yumi pilim tru tok yumi mekim taim yumi beten long Kingdom Bilong God i mas i kam.