Kingdom Bilong God Em Wanem Samting?
Bekim bilong Baibel
Kingdom Bilong God em wanpela gavman God Jehova i kamapim na dispela gavman i stap tru. Baibel i kolim tu “kingdom bilong God” olsem “kingdom bilong heven.” (Mak 1:14, 15; Matyu 4:17, King Jems Pisin Baibel) Dispela gavman i gat ol wankain samting olsem gavman bilong ol man bilong graun i gat, tasol planti samting long dispela gavman i winim tru gavman bilong ol man.
Ol lida. God i makim Jisas Krais olsem King bilong Kingdom na i givim em bikpela namba winim namba bilong ol lida bilong graun. (Matyu 28:18) Jisas i save yusim namba em i gat long mekim gutpela samting tasol, bikos em i soim pinis olsem em i Lida i gat pasin sori na ol manmeri inap go long em bilong kisim helpim. (Matyu 4:23; Mak 1:40, 41; 6:31-34; Luk 7:11-17) God i givim dareksen long Jisas long makim sampela manmeri long ol kantri long graun bilong i “stap king na bosim graun.”—Revelesen 5:9, 10.
Haptaim bilong mekim wok bos. Gavman bilong ol man i save senis senis o pinis, tasol Kingdom Bilong God bai “i no inap bagarap.”—Daniel 2:44.
Ol sitisen. Ol manmeri i mekim laik bilong God bai i stap aninit long wok bos bilong Kingdom Bilong God, na ol i no inap tingting tumas long ol i kamap long wanem lain tumbuna o ples ol i bon long en.—Aposel 10:34, 35.
Ol lo. Lo bilong Kingdom Bilong God i pasim ol man long bikhet na helpim ol manmeri i stap aninit long en long bihainim ol gutpela pasin. Olsem, Baibel i tok: ‘“Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.’ Dispela em namba 1 lo na i winim ol arapela lo. Namba 2 lo i wankain liklik, em i olsem: ‘Yu mas laikim ol arapela man olsem yu laikim yu yet.’” (Matyu 22:37-39) Pasin bilong laikim God na ol narapela i stiaim ol sitisen bilong Kingdom long mekim gutpela pasin long ol narapela.
Edukesen. Maski Kingdom Bilong God i gat ol lo na ol man i mas bihainim ol gutpela pasin tasol, dispela Kingdom i skulim ol manmeri long hau bai ol inap bihainim gut ol lo na ol gutpela pasin.—Aisaia 48:17, 18.
Wok bilong Kingdom. Kingdom Bilong God i no giamanim ol manmeri i stap aninit long en na givim ol gutpela samting long ol lida, nogat. Wok bilong dispela Kingdom i bilong kamapim laik bilong God, dispela i makim tu tok promis bilong God olsem ol manmeri i laikim em bai stap laip oltaim long paradais long graun.—Aisaia 35:1, 5, 6; Matyu 6:10; Revelesen 21:1-4.