Klostu Nau Paradais Bai Kamap Long Graun!
“Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:9, 10.
DISPELA prea em planti man i save long en, na ol i kolim olsem Papa Bilong Mipela, i helpim ol manmeri long bilip na wet long gutpela samting. Olsem wanem em i helpim ol?
Olsem dispela prea i kamapim, Kingdom Bilong God bai kamapim laik bilong God long graun olsem i save kamap nau long heven. Na em laik bilong God long kamapim gen Paradais long graun. (KTH 21:1-5) Kingdom Bilong God em wanem samting, na olsem wanem em bai kamapim Paradais long graun?
Wanpela Gavman Tru
Kingdom Bilong God em i wanpela gavman tru. Bilong wanpela gavman i ken wok gut, i mas i gat ol man i mekim wok bos insait long gavman, ol lo, na ol man i stap aninit long dispela gavman. Olsem wanem? Kingdom Bilong God i gat ol dispela samting? Lukim bekim Baibel i givim long tripela askim daunbilo:
Husat i mekim wok bos insait long Kingdom Bilong God? (Aisaia 33:22) God Jehova i bin makim Pikinini bilong em, Jisas Krais, long bosim Kingdom. (Matyu 28:18) Jehova i stiaim Jisas long makim sampela manmeri bilong ‘olgeta lain man, tok ples, skin, na kantri’ em ol bai wok wantaim Jisas olsem ol “king na bosim ol manmeri bilong graun.”—KTH 5:9, 10.
Kingdom Bilong God i gat wanem ol lo em ol man i mas bihainim? Sampela lo i kamapim ol samting man i mas mekim. Jisas i kamapim nambawan bikpela lo bilong ol dispela kain lo, em i tok: “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, ‘Yu mas laikim ol wantok olsem yu laikim yu yet.’ ”—Matyu 22:37-39.
Sampela narapela lo i tok ol lain i stap aninit long Kingdom Bilong God ol i mas sakim sampela pasin. Baibel i mekim dispela tok: “Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal long ol samting bilong ol arapela man, na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God.”—1 Korin 6:9, 10.
Husat i stap aninit long Kingdom Bilong God? Jisas i tok ol man i stap aninit long Kingdom Bilong God ol i olsem sipsip. Em i tok: “Bai ol i harim maus bilong mi. Na bai i gat wanpela lain sipsip tasol na wanpela wasman tasol bilong ol sipsip.” (Jon 10:16) Bilong stap aninit long Kingdom Bilong God, man i no ken tok tasol olsem em i bihainim Gutpela Wasman, Jisas, em i mas mekim tu ol samting Jisas i tokim em long mekim. Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”—Matyu 7:21.
Olsem na ol man i stap aninit long Kingdom Bilong God, ol i mekim wok long nem bilong God, em Jehova, na givim biknem long en, wankain olsem Jisas i bin mekim. (Jon 17:26) Ol i bihainim tok bilong Jisas long lainim ol narapela man long “dispela gutnius bilong kingdom bilong God.” (Matyu 24:14; 28:19, 20) Na narapela i save laikim tru narapela.—Jon 13:35.
‘Bagarapim Ol Man i Bagarapim Graun’
Ol samting i kamap long graun i soim olsem klostu nau Kingdom Bilong God bai kamapim ol bikpela senis long graun. Olsem wanem yumi save long dispela? Inap 2 tausen yia i go pinis, Jisas i stori long wanpela mak i gat planti hap bilong en, em dispela mak i soim olsem “kingdom bilong God i kam klostu pinis.” (Luk 21:31) Olsem stori i kamap paslain long dispela i soim, ol hap bilong dispela mak i stap ples klia long olgeta hap bilong graun.
Wanem samting bai kamap bihain long dispela? Jisas i tok: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Dispela i no wanpela hevi ol man i kamapim. Nogat. Em samting God i mekim bilong “bagarapim ol man i bin bagarapim graun.” (KTH 11:18) “God bai i rausim” ol manmeri nogut long graun, em pasin bilong ol i mekim na dispela graun i laik bagarap. Tasol ol stretpela man husat i lotuim God long rot em i makim, ol “bai i stap gut oltaim long graun.”—Sindaun 2:21, 22.
I gat as na God Jehova i mekim kain bikpela samting olsem. Bilong wanem? Skelim dispela tok piksa: Tingim olsem yu papa bilong wanpela haus i gat ol flet long en. Sampela bilong ol man i sindaun long ol flet ol i mekim gutpela pasin na i tingim ol narapela; ol i baim rent na lukautim gut flet ol i stap long en. Tasol sampela man i tingim ol yet na i mekim nabaut; ol i no baim rent na ol i bagarapim haus. Maski yu givim tok lukaut long ol, ol i wok yet long bikhet. Orait, bai yu mekim wanem? Yu papa bilong haus, olsem na bai yu rausim ol dispela man nogut, a?
Na olsem tasol, God Jehova, em i Man Bilong Wokim graun na olgeta samting i stap long en, em i gat rait long makim husat em bai larim long sindaun long dispela graun. (KTH 4:11) Jehova i tok em i tingting pinis long rausim long graun ol man nogut husat i no save bihainim laik bilong em na i mekim nogut long ol narapela man.—Song 37:9-11.
Paradais Bai Kamap Gen
Klostu nau, Kingdom Bilong God long han bilong Jisas Krais bai bosim graun. Jisas i kolim dispela taim olsem “taim olgeta samting i kamap nupela.” (Matyu 19:28) Ol samting long graun bai stap olsem wanem? Lukim ol dispela tok promis bilong Baibel:
Song 46:9. “Em i save mekim i dai pait long olgeta hap graun.”
Aisaia 35:1. “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap.”
Aisaia 65:21-23. “Bai ol [manmeri] i amamas long ol samting ol yet i bin hatwok long kamapim. Wok ol i mekim bai i no inap lus nating. Na ol pikinini bilong ol bai i no inap painim bagarap.”
Jon 5:28, 29. “Taim i laik kamap na olgeta manmeri i stap long matmat ol bai i harim maus bilong Pikinini [ Jisas], na ol bai i lusim matmat na i kam ausait.”
Kamapim Tok Hait 21:4. “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”
As na Yumi Ken Bilip
Olsem wanem? Yu save bilip long ol tok promis bilong Baibel? Baibel i tok profet olsem planti bai i no bilip. Em i tok: “Long taim bilong las de, ol man bilong tok bilas bai i kamap, na ol bai i bihainim laik nogut bilong bel bilong ol. Bai ol i tok bilas olsem, ‘Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.’ ” (2 Pita 3:3, 4) Tasol ol dispela lain i tok bilas i popaia stret. Tingim 4-pela samting i kamapim as na yu ken bilip long tok bilong Baibel:
(1) Bipo tu God i bin bagarapim ol man nogut. Bikpela Tait long taim bilong Noa i kamapim klia dispela samting.—2 Pita 3:5-7.
(2) Baibel i tok profet long ol samting i wok long kamap long graun long nau.
(3) I no olgeta samting “i stap wankain olsem bipo tru, taim graun i kamap.” Sindaun na pasin bilong ol man i go nogut moa, na ol i bagarapim win na wara, winim olgeta taim bipo.
(4) Long nau ol i wok long autim “gutnius bilong kingdom bilong God” long olgeta hap bilong graun, na dispela i makim olsem “las de” i klostu pinis.—Matyu 24:14.
Ol Witnes Bilong Jehova i laik stadi wantaim yu long Tok Bilong God, em Baibel, na bai yu ken kisim sampela save moa long laip oltaim yu inap kisim aninit long Kingdom Bilong God. (Jon 17:3) Yes, ol manmeri inap kisim gutpela samting tru long bihain. Klostu nau nambawan gutpela taim bai kamap! Olsem wanem? Bai yu stap long dispela gutpela taim?
[Rait long pes 7]
Ol man i tok ol samting bai stap wankain tasol olsem bipo, ol i popaia stret
[Piksa long pes 8]
Bai yu stap long dispela gutpela taim?