Taim Nogut Long Nau

BAIBEL i tok profet olsem “planti hevi nogut tru” bai painim ol manmeri, na Baibel i kolim dispela haptaim olsem “taim bilong las de.” (2 Timoti 3:​1-5; 2 Pita 3:​3-7) Jisas Krais i toktok long dispela haptaim, taim em i bekim wanpela askim ol disaipel bilong em i mekim long taim we pasin bilong “dispela graun i laik pinis.” (Matyu 24:3) Yu ting nau yumi stap long taim bilong las de? Skelim ol tok profet bilong Baibel wantaim ol ripot i stap daunbilo, na yu yet i ken wokim tingting long dispela samting.

Baibel i tok profet: pait long olgeta hap​​—Luk 21:10; KTH 6:4.

Ol ripot bilong nau i tok: “Insait long 100 yia i go pinis, namba bilong ol man i dai long ol pait i bikpela tru, winim tripela taim namba bilong ol man i bin dai long ol pait insait long 1900 yia paslain long dispela.”​​—Worldwatch Institute.

Baibel i tok profet: bikpela hangre na sik​​—Luk 21:11; KTH 6:​5-8.

Ol ripot bilong nau i tok: Long 2004, inap olsem 863 milion manmeri i stap hangre, em 7 milion manmeri moa long 2003.​—United Nations Food and Agriculture Organization.

Inap olsem wan bilion manmeri i sindaun long ol pipia haus; 2.6 bilion manmeri i no gat gutpela toilet samting; 1.1 bilion manmeri i no gat gutpela wara bilong dring.​—Worldwatch Institute.

Inap 500 milion manmeri i save kisim malaria; 40 milion manmeri i gat HIV-AIDS; inap 1.6 milion manmeri i dai long sik TB long 2005.​—Wol Helt Oganaisesen.

Baibel i tok profet: ol man i bagarapim graun​​—KTH 11:18.

Ol ripot bilong nau i tok: “Ol wok bilong ol man i mekim na planti kain kain animal na plaua samting inap pinis olgeta.” “Klostu 66 pesen bilong ol samting yumi save kisim long graun na i helpim yumi long i stap laip, i wok long pinis long olgeta hap.”​​—Millennium Ecosystem Assessment.

“Ol ges, smok, na marasin nogut em ol man i bin wokim na i go long win i senisim taim bilong san na ren, na graun inap kisim bikpela bagarap long dispela.”​​—NASA, Goddard Institute for Space Studies.

Baibel i tok profet: autim gutnius bilong Kingdom Bilong God long olgeta hap​​—Matyu 24:14; KTH 14:​6, 7.

Ol ripot bilong nau i tok: Long 2007, inap 6,957,854 Witnes Bilong Jehova i lusim inap olsem 1.4 bilion aua bilong autim gutnius bilong Kingdom Bilong God long 236 kantri.​—2008 Yearbook of Jehovah’s Witnesses.

Olsem yumi tok pinis, Baibel i tok profet olsem maski yumi harim ol stori nogut, i gat as na yumi ken ting gutpela samting bai kamap. Jisas i toktok long “gutnius” bilong Kingdom Bilong God. Kingdom Bilong God em wanem samting? Olsem wanem Kingdom i helpim ol man long bilip na wet long gutpela samting? Na Kingdom Bilong God bai mekim wanem long yu?

[Rait long pes 5]

Baibel i bin tok profet long ol samting i kamap long graun long nau