Wanem Sain Bilong “Las De”?
Bekim bilong Baibel
Baibel i stori long sampela samting i mas kamap i makim “pinis bilong dispela taim,” o “pinis bilong dispela graun.” (Matyu 24:3; King Jems Pisin Baibel) Baibel i kolim dispela haptaim olsem “taim bilong las de” na “taim bilong pinis.”—2 Timoti 3:1; Daniel 8:19.
Wanem sampela tok profet bilong Baibel i stori long “taim bilong las de”?
Baibel i tok profet long planti samting bai kamap long wankain taim em ol i “sain” bilong makim taim bilong las de. (Luk 21:7) Skelim sampela bilong ol dispela samting:
Ol bikpela pait bai kamap long planti hap. Jisas i tok profet olsem: “Wanpela kantri bai pait long narapela kantri na wanpela kingdom bai pait long narapela kingdom.” (Matyu 24:7) Revelesen 6:4 tu i tok profet olsem wanpela man i sindaun long hos, i makim pait, em bai raun na “tekewe bel isi long graun.”
Bikpela hangre. Jisas i tok profet olsem: “Bai i gat taim bilong ol bikpela hangre.” (Matyu 24:7) Buk Revelesen i tok profet long narapela man i sindaun long hos, em i raun na dispela i mekim na bikpela hangre bai kamap.—Revelesen 6:5, 6.
Ol bikpela guria. Jisas tok “ol guria bai kamap long narapela narapela hap.” (Matyu 24:7; Luk 21:11) Ol dispela bikpela guria long ol narapela narapela hap bilong graun bai mekim na planti man i kisim pen na hevi na planti bai dai.
Ol sik. Jisas i tok bai i gat “ol bikpela sik.”—Luk 21:11, Contemporary English Version.
Ol pasin nogut. Maski ol man i mekim ol pasin nogut inap planti handret yia, Jisas i tok profet olsem long taim bilong las de “pasin bilong brukim lo bai i go bikpela.”—Matyu 24:12.
Ol man i bagarapim graun. Revelesen 11:18 i tok profet olsem ol man bai “wok long bagarapim graun.” Ol bai mekim olsem long planti kain kain rot, i no long rot bilong mekim ol pasin nogut tasol, ol bai bagarapim tu ol samting long graun.
Pasin bilong ol man bai go nogut moa. Long 2 Timoti 3:1-4, Baibel i tok profet olsem ol manmeri “bai i no tok tenkyu, ol bai i no stap gut long narapela, . . . ol bai i no laik kamap wanbel, ol bai bagarapim gutnem bilong ol arapela, ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin, ol bai birua long ol pren bilong ol, ol bai i gat strongpela het, ol bai pulap long pasin antap.” Ol dispela pasin bai go nogut moa yet, olsem na Baibel i kolim dispela haptaim olsem “taim nogut bai kamap na dispela bai givim hatwok long ol man.”
Ol famili bai i no pas gut wantaim. Long 2 Timoti 3:2, 3, Baibel i tok profet olsem planti manmeri “bai i no gat pasin bilong laikim ol wanfamili” bilong ol na ol pikinini bai “sakim tok bilong papamama.”
Pasin bilong laikim God bai i no strong moa. Jisas i tok profet olsem: “Pasin laikim bilong planti manmeri bai i no strong olsem long bipo.” (Matyu 24:12) Tok bilong Jisas i makim pasin bilong planti manmeri long laikim God bai i no strong moa. Olsem tasol, 2 Timoti 3:4 i tok long taim bilong las de, ol kain manmeri olsem “bai i no laikim God, nogat, ol bai laikim kain kain amamas.”
Pasin giaman bilong ol lotu. Long 2 Timoti 3:5, Baibel i tok profet olsem ol manmeri bai tok ol i lotuim God, tasol ol bai i no bihainim ol lo bilong em long sindaun bilong ol.
Kisim save moa long ol tok profet bilong Baibel. Buk Daniel i tok profet olsem long “taim bilong pinis,” planti man bai kisim save moa long ol tok i tru bilong Baibel na stretpela save tu long ol dispela tok profet.—Daniel 12:4, futnot.
Autim tok long olgeta hap. Jisas i tok profet olsem: “Ol bai autim dispela gutnius bilong Kingdom long olgeta hap bilong graun.”—Matyu 24:14.
Planti man i no laik harim tok na ol i tok bilas. Jisas i tok profet olsem ol man bai i no laik luksave long ol samting i soim olsem pinis bilong pasin nogut bilong nau i kam klostu. (Matyu 24:37-39) Na tu, 2 Pita 3:3, 4 i tok profet olsem sampela manmeri bai tok bilas olsem pinis i no kam klostu.
Olgeta tok profet i kamap tru. Jisas i tok olsem ol dispela tok profet bai kamap tru long wankain taim olsem sain bilong taim bilong las de, i no sampela tasol bilong ol dispela tok profet, nogat, klostu olgeta bilong ol bai kamap tru.—Matyu 24:33.
Yu ting yumi stap long taim bilong “las de”?
Yes. Ol samting i kamap long graun, na tu, ol yia Baibel i kolim i makim olsem las de i kirap long 1914, em yia Wol Woa 1 i kirap. Bilong lukim olsem wanem ol samting long graun i kamapim klia olsem yumi stap long taim bilong las de, lukim dispela vidio:
Long 1914, Kingdom Bilong God i kirap mekim wok bos long heven, na namba 1 samting em i mekim, em i rausim Satan dispela Devil na ol spirit nogut bilong em long heven i kam daun long graun, na ol inap mekim ol wok bilong ol long graun tasol. (Revelesen 12:7-12) Pasin bilong ol manmeri i kamapim klia olsem Satan i stiaim ol na dispela i mekim na long dispela taim bilong las de ‘taim nogut i kamap na givim hatwok long ol man.’—2 Timoti 3:1.
Planti manmeri i bel hevi long ol dispela samting nogut. Ol i tingting planti long ol samting i wok long i go nogut moa. Sampela i tingting planti nogut ol man yet bai bagarapim na pinisim narapela narapela olgeta.
Tru, ol narapela i bel hevi long ol samting nogut i kamap long graun, tasol ol i bilip na wet long ol gutpela samting bai kamap bihain. Ol i bilip tru olsem klostu nau Kingdom Bilong God bai mekim ol samting bilong pinisim olgeta hevi long graun. (Daniel 2:44; Revelesen 21:3, 4) Ol i wet long God i inapim ol tok promis bilong em, na tok bilong Jisas i mekim isi bel bilong ol, em i tok: “Man i sanap strong i go inap long pinis, God bai kisim bek em.”—Matyu 24:13; Maika 7:7.