Rot Bilong Kisim Ol Samting Yumi Mas Kisim
“Inap 30 yia pinis olgeta lain man i bin wok wantaim bilong helpim ol man i hangre, tasol oltaim lain bilong ol dispela man i go bikpela bikpela.” Dairekta-jenaral bilong Fut na Agrikalsa Oganaisesen (FAO) i tok olsem. Em i tok, “ol wok mipela i tingting long mekim i no kamap gutpela.”
Long nau ol lain man i save tingim ol yet tasol, olsem na taim ol i laik wok wantaim bilong stretim dispela hevi na helpim ol manmeri long kisim ol samting ol i mas kisim bilong i stap laip, wok bilong ol i no inap kamap gutpela. Yumi sot long wanpela samting. Em wanem samting? Planti man i tok yumi sot long:
Wanpela Gavman Bilong Bosim Olgeta Hap
Yumi sot long wanpela gavman bilong bosim olgeta hap em i gat strong bilong bosim olgeta kaikai samting bilong graun na tilim stret long olgeta man. Tasol yu ting kain gavman olsem bilong bosim olgeta hap em inap kamap? Tupela taim ol man i bin wok long kamapim wanpela gavman bilong bosim olgeta hap. Namba wan taim ol i kamapim Lig ov Nesen, na namba tu taim ol i kamapim Yunaitet Nesen. Tasol wok bilong dispela tupela lain i lus nating tasol; i no kamap gutpela. Olgeta lain man i save tingting long helpim lain bilong ol yet tasol, na dispela tupela lain i no inap stretim ol hevi dispela pasin i kamapim.
Orait, olsem wanem wanpela gavman bilong bosim gut olgeta hap em inap kamap? Em i no inap kamap hia long dispela graun. Wanpela Man bilong ausait em i mas kamapim. Tasol olsem wanem? I gat wanpela Bikpela Man i stap em i gat strong inap long kamapim wanpela gavman bilong bosim olgeta hap bilong graun? I gat. Wanpela Bikpela Man i stap em i save sori tru long yumi ol manmeri na em i laik helpim yumi long i stap gutpela. Dispela Man em i gat namba na bikpela strong em God.
Planti manmeri long nau ol i save tingim tasol ol samting bilong skin na samting ol inap lukim long ai bilong ol. Ol i no save tingim God. Tasol olsem wanem? Yumi inap bilip na wetim God i kirap bosim olgeta hap bilong graun? I gat sampela samting na yumi ken save God i laik bosim dispela graun? Na olsem wanem? Wok bilong God long bosim graun em bai winim wok bilong ol man, en longtaim pinis ol i bin bosim yumi na yumi bin karim pen na hevi?
Yumi Inap Bilip Tru
Planti manmeri—planti manmeri i bilip long God tu—ol i ting samting bilong lotu na samting tru i save painim yumi hia long graun i narapela narapela kain. Ol ting taim ol i dai bai ol i go i stap long heven, tasol ol i no ting God bai mekim sampela samting tru hia long graun, olsem kirap long bosim dispela graun. Yu yet yu ting olsem wanem?
Tasol nau ol lo bilong God i bosim ol samting hia long graun, a? Yu tingim? I gat lo bilong bosim win yumi pulim long nus, na bilong bosim ren na san na olgeta narapela samting i save mekim na yumi inap i stap laip hia long graun. God yet i putim ol dispela lo. Maski ol manmeri i bilip long God o nogat, tasol ol dispela lo i stap na i bosim ol. (Matyu 5:45; Aposel 14:17) God i putim ol lo bilong bosim win na ren na san, olsem na yumi no ken kirap nogut taim yumi harim tok olsem em i putim ol lo bilong bosim yumi ol manmeri tu.
Inap 3,500 yia bipo God i bin kisim wanpela lain na givim ol lo long ol na putim wanpela gavman bilong bosim ol, na em yet i stap King bilong dispela gavman. Yu save God i bin mekim olsem? Dispela lain em lain Isrel, na bihain wanpela profet bilong ol em i raitim tok olsem: “Jehova em i Jas bilong yumi, Jehova em i Man bilong givim lo long yumi, Jehova em i King bilong yumi.”—Aisaia 33:22, NW.
Wok King Bilong God na Ol Samting Wok Bilong Em i Kamapim
Dispela samting i helpim ol Isrel olsem wanem? Taim ol i bihainim ol lo bilong God, ol i stap gutpela. Taim God i bosim ol inap 45 yia pinis, wanpela hetman bilong ol em i tok: “Bikpela inapim tru olgeta gutpela promis em i bin mekim long ol.”—Josua 21:45.
God i bin bosim dispela liklik lain ol stap long hap bilong Midel-Is, olsem na em inap bosim olgeta hap bilong graun. Tasol em i laik mekim olsem?
Inap tu tausen yia bipo aposel Kristen Jon i harim wanpela tok na dispela tok i givim tingting long yumi na yumi inap bilip tru olsem God bai kirap helpim ol man. Jon i lukim piksa bilong ol samting i laik kamap bihain. Em i lukluk i stap na em i harim sampela i singaut na tok olsem: “Bikpela bilong yumi wantaim Krais tupela i kamap king bilong olgeta graun! Na em bai i stap king oltaim oltaim!” Na bihain Jon i harim sampela i amamas na ol i singaut na tok olsem: “Bikpela, yu God I Gat Olgeta Strong. … Yu kisim pinis bikpela strong bilong yu, na yu stap king. Olsem na mipela i tenkyu long yu.”—Revelesen 11:15, 17.
God yet i givim dispela piksa long Jon na Jon i lukim ol dispela samting i makim God i kirap long bosim “olgeta graun.” Yes, God bai stap king na em i makim Krais Jisas i stap olsem namba wan gavman. Olsem na yumi inap bilip tru olsem God Jehova bai kamapim wanpela gavman bilong bosim olgeta hap bilong graun.
Tok bilong dispela gavman bilong God em i nambawan bikpela tok bilong Baibel. Jisas i lainim yumi long beten askim God long kamapim dispela gavman. Long Beten Bilong Bikpela em i tok: “Kingdom bilong yu i mas i kam. Mipela i mas bihainim laik bilong yu long graun olsem ol i bihainim long heven.” (Matyu 6:10) Long maus bilong planti profet God Jehova i bin tokaut long dispela kingdom, em tasol inap stretim ol hevi bilong dispela graun. Olsem wanem? Bai dispela gavman inap helpim tru yumi, winim ol gavman bilong ol man? Orait, tingim ol dispela samting, olsem:
Wara Bilong Dring: God Jehova em i Man bilong wokim dispela graun. Em i save tru olsem wanem narapela samting i helpim narapela samting long i stap laip long graun. Em i tokim profet Emos, em i save “singautim ol wara bilong solwara bambai em inap kapsaitim antap long graun.” (Emos 9:6, NW) Em i save tru olsem wanem wara i kamap long dispela graun na em inap bosim gut dispela samting.
Taim em i bosim ol Isrel bilong bipo em i tok promis olsem: “Jehova bai opim long yu gutpela haus kaikai bilong em, em heven, bilong givim ren long graun bilong yu long taim bilong en.” (Diuteronomi 28:12, NW) Taim lain bilong Em ol i stap gut long Em, em i truim dispela tok promis em i bin mekim. Taim gavman bilong em i bosim olgeta hap bilong graun em inap tru long givim planti wara long olgeta manmeri.
Kaikai: Ol saveman i tok, wanpela samting i pasim ol manmeri long givim kaikai long ol man i hangre em pasin bilong litimapim pies. Olgeta lain i save tingim ples na lain bilong ol yet i nambawan. Tasol gavman bilong God i gat strong bilong pinisim dispela pasin na bai ol lain man i no ken i stap birua birua moa. Wanpela profet bilong God i tok: “[God] bai … stretim tok long ol bikpela lain man ol i stap longwe. Na ol i mas wokim bainat bilong ol i kamap samting bilong wokim gaden, na ol i mas wokim spia bilong ol i kamap sisis bilong katim han bilong diwai. Ol i no ken holim moa bainat bilong paitim narapela lain, na ol i no ken lain moa long pait.”—Maika 4:3, NWKain Pasin olsem inap kamap? Em inap kamap. Na nau em i kamap pinis! I gat wanpela lain ol inap olsem 2 milion samting manmeri na ol i stap long ol narapela narapela hap bilong graun, nau ol i daun long ol lo bilong kingdom bilong God. Ol i no birua long man bilong narapela lain o skin, ol i save, ol i save tingim olgeta manmeri ol i wanpela lain tasol. Ol i stap olsem brata brata tru, na o, i wok wantaim long mekim laik bilong God. Dispela lain ol i stap, olsem na yumi inap save dispela gavman bilong God i stap. Dispela lain ol i husat? Em Ol Witnes Bilong Jehova.
God Jehova i tok promis pinis long blesim dispela graun na bai graun i kamapim planti kaikai. Long maus bilong man bilong raitim Sam, em i tok: “Planti kaikai i kamap pinis long graun.” “Planti kon na wit samting i ken kamap long gaden bilong ol manmeri.” (Sam 67:6; 72:16) Tru tumas, taim kingdom bilong God i bosim olgeta hap bilong graun bai i no gat wanpela samting bilong pasim ol man long kisim kaikai, dispela samting ol i mas kisim bambai ol inap long i stap laip.
Klos na Haus: Jisas i kamapim sori bilong God em em i laik lukautim ol wokboi bilong em long ol samting bilong skin. Jisas i tok: “Yupela lukim ol plaua long gaden, ol i kamap olsem wanem. Ol i no save hatwok. Ol i no save wokim laplap. Tasol mi tokim yupela: Bipo Solomon i putim olgeta bilas bilong en, tasol em i no gat gutpela bilas olsem dispela plaua. … kain gras nating olsem, em God i save bilasim. Olsem na yupela … i ken save tru, God bai i lukautim yupela tu.”—Matyu 6:28-30.
Yes, nau tu God i save tingim ol wokboi bilong em. Ol Witnes Bilong Jehova i save tru long dispela samting. Olsem na taim gavman bilong God i bosim olgeta hap graun, yu ting bai yumi sot long sampela samting na yumi no inap i stap amamas? Nogat, a?
Bai Yu Stap long Dispela Taim?
Ating yu laikim dispela gavman em bosim olgeta hap bilong graun? Tru tumas, olgeta manmeri i gat tingting ol i laik stap aninit long gutpela gavman olsem. Tasol pastaim yumi mas save long lo bilong dispela gavman. Ol dispela lo i stap long Baibel. Yumi mas kisim save long ol dispela lo yumi mas bihainim bambai yumi inap i stap aninit long gavman bilong God.
Ating yumi mas senisim sampela bilong yumi bambai yumi inap bihainim ol dispela lo. Yumi no ken tingim yumi yet tasol olsem planti manmeri bilong dispela graun i mekim long nau. God i no laikim dispela kain pasin. Na ol manmeri i stap aninit long kingdom bilong God ol i mas laikim tumas God, ol i mas givim bel olgeta long Em, na ol i mas sori long ol narapela man olsem ol i save sori long ol yet. Ol manmeri i wok yet long mekim tok giaman, o stil, o pamuk, o giaman, o spak, o kalabus long drak, ol i no ken i stap aninit long dispela gavman bilong God.—Matyu 22:37-39; 1 Korin 6:9, 10.
Em hatwok, tasol yu ting dispela samting bai helpim yumi? Em bai helpim yumi tru. God Jehova tasol i save long gutpela sindaun yumi inap kisim long dispela graun taim dispela stretpela gavman i bosim. Long Baibel em i stori liklik long gutpela pasin bai kamap. Ol manmeri i givim bel tru long mekim wok bilong God long nau, ol i pilim pinis gutpela amamas na bel isi ol bai kisim tru long dispela taim bihain.
Olgeta samting i kamap i soim yumi, liklik taim tasol na bai ol manmeri i laik i stap aninit long gavman bilong God ol bai kisim ol dispela gutpela samting. Olgeta samting i kamap long nau olsem tok profet bilong Baibel i makim i soim yumi, kingdom bilong God i klostu pinis. Liklik taim tasol na bai dispela kingdom i kirap bosim dispela graun na senisim ol gavman bilong nau ol i bruk bruk na ol i no bin helpim gut ol man. (Luk 21:25-28, 31; Danyel 2:44) Yu laik i stap long dispela gutpela taim bilong bihain? Sapos olsem, orait, gutpela sapos nau yu wok long kisim save long dispela samting, a? Yu mas kisim save bambai yu inap bilip tru long God Jehova na long gavman bilong em, em dispela samting tasol inap stretim ol hevi bilong nau
[Blok long pes 11]
Kingdom bilong God tasol inap helpim olgeta manmeri bambai ol inap kisim . . .
□ Planti gutpela kaikai
□ Gutpela klinpela wara
□ Klos i stret long ol
□ Gutpela haus