Tingim Jehova na Pikinini Bilong Em

TINGIM olsem wanpela man i givim wanpela gutpela presen long yu. Bai yu mekim wanem?— Bai yu tok tenkyu tasol na bihain lusim tingting olgeta long dispela man i bin givim presen long yu? O bai yu tingim em na tingim samting em i bin mekim long yu?—

God Jehova i bin givim wanpela gutpela presen long yumi. Em i bin salim Pikinini bilong em i kam i dai bilong helpim yumi. Yu save bilong wanem Jisas i mas dai bilong helpim yumi?— Dispela i wanpela bikpela samting tru yumi mas kliagut long en.

Olsem yumi bin lainim long Sapta 23, Adam i mekim sin taim em i brukim stretpela lo bilong God. Na yumi kisim sin long Adam, em i tumbuna papa bilong yumi olgeta. Olsem na yu ting yumi mas kisim wanem samting?— I olsem yumi mas kisim nupela papa, em papa i bin stap gutpela olgeta taim em i stap long graun. Yu ting husat inap kamap kain papa olsem?— Jisas inap.

Jehova i bin salim Jisas i kam long graun na bai em inap kamap olsem papa bilong yumi, na Adam nogat. Baibel i tok: “ ‘Namba wan man, Adam, i bin kisim laip.’ Tasol narapela Adam i kamap bihain tru, em i bin kamap spirit bilong givim laip long man.” Husat em i dispela namba wan Adam?— Yes, em dispela man God i bin wokim long graun. Husat em i namba tu Adam?— Jisas. Baibel i kamapim dispela long ples klia na i tok: “Namba wan Adam em i bilong graun. God i bin wokim em long graun tasol. Namba 2 Adam [Jisas] em i bilong heven.”​—1 Korin 15:​45, 47; Stat 2:7.

God i bin kisim laip bilong Jisas long heven na putim insait long bel bilong Maria, olsem na Jisas i no kisim sin long Adam. Long dispela as Jisas i gutpela olgeta. (Luk 1:​30-​35) Na long dispela as tu taim mama i karim Jisas, ensel i tokim ol wasman bilong sipsip olsem: ‘Long dispela de wanpela meri i karim pikinini, na dispela pikinini bai i kisim bek yupela olgeta.’ (Luk 2:​11) Tasol bilong kamap Man Bilong Kisim Bek yumi, pastaim dispela bebi Jisas i mas mekim wanem?— Em i mas kamap bikpela man, wankain olsem Adam. Nau Jisas inap kamap “namba 2 Adam.”

Jisas, em Man Bilong Kisim Bek yumi, em bai kamap tu olsem “Papa bilong i stap oltaim oltaim.” Baibel i kolim dispela nem long em. (Aisaia 9:​6, 7) Yes, Jisas, em man i gutpela olgeta, em inap kamap papa bilong yumi, na Adam nogat, em i no gutpela moa taim em i mekim sin. Long dispela rot yumi inap makim “namba 2 Adam” i kamap papa bilong yumi. Tasol Jisas yet em i Pikinini Bilong God Jehova.

Taim yumi kisim save long Jisas, yumi inap bilip long em olsem Man Bilong Kisim Bek yumi. Olsem wanem? Yu tingim em i mas kisim bek yumi long wanem samting?— Yes, long sin na dai yumi bin kisim long Adam. Dispela laip i gutpela olgeta em Jisas i bin givim olsem ofa, ol i kolim olsem pe bilong baim bek man. Jehova i bin redim dispela pe na bai sin bilong yumi i ken tekewe.​—Matyu 20:28; Rom 5:8; 6:​23.

Yumi no laik lusim tingting long ol samting God na Pikinini bilong em i bin mekim bilong helpim yumi, a?— Jisas i soim ol disaipel bilong em long wanpela samting inap helpim yumi long tingim samting em i bin mekim. Yumi ken stori long dispela.

Tingim olsem yu stap long rum antap long wanpela haus long Jerusalem. Nait i kamap pinis. Jisas na ol disaipel bilong em i sindaun klostu long wanpela tebol. Long tebol, i gat sipsip ol i kukim pinis, sampela bret, na retpela wain. Ol i mekim wanpela spesel kaikai. Yu save bilong wanem ol i mekim dispela kaikai?—

Dispela kaikai i bilong helpim ol long tingim gen samting Jehova i bin mekim planti handet yia i go pinis taim lain bilong em, ol Israel, i stap kalabus long Isip. Long dispela taim Jehova i bin tokim lain bilong em: ‘Wan wan famili i mas kilim wanpela sipsip, na penim blut bilong en long ol pos bilong dua bilong haus.’ Na em i tok: ‘Go insait long ol haus bilong yupela na kaikai mit bilong sipsip.’

Ol Israel i mekim olsem. Na long dispela nait yet, ensel bilong God i go long olgeta hap bilong Isip. Long planti haus, ensel i kilim i dai namba wan pikinini. Tasol taim ensel i lukim blut bilong sipsip long ol pos bilong dua bilong haus, em i abrusim dispela haus. Long ol dispela haus, i no gat wanpela pikinini i dai. Fero, king bilong Isip, em i pret long samting ensel bilong Jehova i bin mekim. Olsem na Fero i tokim ol Israel: ‘Yupela ken i go. Yupela lusim Isip na go’! Taim ol i harim olsem, ol i putim ol kago bilong ol antap long ol kamel na donki na ol i go.

Jehova i no laik bai lain bilong em i lusim tingting long ol samting em i bin mekim bilong helpim ol long i go fri. Olsem na em i tok: ‘Wanpela taim long olgeta yia, yupela i mas mekim wankain kaikai olsem nau yupela i mekim.’ Ol i kolim dispela spesel kaikai olsem Pasova. Long dispela nait ensel bilong God i bin “abrusim” ol haus ol i bin makim long blut.​—Kisim Bek 12:​1-​13, 24-​27, 31.

Jisas na ol aposel bilong em i tingim dispela samting taim ol i mekim kaikai bilong Pasova. Bihain, Jisas i mekim wanpela bikpela samting tru. Tasol paslain long em i mekim dispela samting, em i rausim Judas, em aposel i no stap gut long em. Jisas i kisim wanpela hap bret, em i beten, brukim, na givim long ol disaipel bilong em. Em i tok: “Yupela kisim na kaikai.” Em i tokim ol: ‘Dispela bret i makim bodi bilong mi em mi bai givim taim mi dai bilong helpim yupela.’

Orait nau Jisas i kisim wanpela kap i gat retpela wain long en. Em i beten gen na tok tenkyu long God, na i givim kap wain long ol disaipel bilong em na i tok: “Yupela olgeta dring long dispela.” Na em i tokim ol: ‘Dispela wain i makim blut bilong mi. Klostu nau bai mi kapsaitim bilong lusim ol sin bilong yupela. Yupela i mas mekim olsem bilong tingim mi.’​—Matyu 26:​26-​28; 1 Korin 11:​23-​26.

Yu lukim tu olsem Jisas i tok ol disaipel i mas mekim olsem bilong tingim em?— Nau bai ol i no mekim moa kaikai bilong Pasova. Tasol wanpela taim long olgeta yia, ol bai mekim dispela spesel kaikai bilong tingim Jisas na dai bilong em. Ol i kolim dispela kaikai olsem Kaikai Bilong Bikpela. Long nau yumi save kolim olsem Memorial. Bilong wanem ol i kolim olsem Memorial?— Em i helpim yumi long tingim bek samting Jisas na Papa bilong em, God Jehova, i bin mekim bilong helpim yumi.

Bret i mas kirapim yumi long tingim bodi bilong Jisas. Em i bin redi long givim dispela bodi olsem ofa na bai yumi ken kisim laip oltaim. Na olsem wanem long retpela wain?— Em i mas kirapim yumi long tingim blut bilong Jisas i bikpela samting tru. Em i gutpela moa, winim blut bilong sipsip bilong Pasova long Isip. Yu save bilong wanem i olsem?— Baibel i tok blut bilong Jisas inap lusim ol sin bilong yumi. Na taim olgeta sin bilong yumi i pinis, yumi no inap kisim sik gen, go lapun, na i dai. Yumi mas tingim ol dispela samting taim yumi go long Memorial.

Yu ting olgeta man i mas kaikai bret na dring wain long Memorial?— Jisas i bin tokim ol man i kaikai bret na dring wain, olsem: ‘Yupela bai stap long kingdom bilong mi na sindaun long ol sia king wantaim mi long heven.’ (Luk 22:​19, 20, 30) Dispela i makim olsem ol bai go long heven na i stap king wantaim Jisas. Olsem na ol man husat bai go long heven na mekim wok king wantaim Jisas, ol tasol i mas kaikai bret na dring wain.

Tasol ol man i no kaikai bret o dring wain, ol tu i mas go long Memorial. Yu save bilong wanem ol i mas go?— Long wanem, Jisas i bin givim laip bilong em bilong helpim yumi tu. Taim yumi go long Memorial, yumi soim olsem yumi no bin lusim tingting long dispela samting. Yumi tingim yet gutpela presen God i bin givim long yumi.