Bilong Wanem Yumi Mas Laikim Jisas?

TINGIM olsem yu stap long wanpela bot i laik go daun insait long solwara. Olsem wanem? Yu laik bai wanpela i helpim yu?— Olsem wanem sapos wanpela man i lusim laip bilong em yet bilong helpim yu?— Jisas Krais i bin mekim olsem. Olsem yumi bin lainim long Sapta 37, em i givim laip bilong em olsem pe bilong baim bek man na bai yumi inap abrusim bagarap.

Tru, i no olsem Jisas i kisim bek yumi na bai yumi no ken dring wara na i dai, nogat. Yu inap tingim em i kisim bek yumi long wanem samting?— Em i kisim bek yumi long sin na dai yumi bin kisim long Adam. Maski sampela man i bin mekim ol pasin i nogut tru, Jisas i dai bilong helpim ol tu. Yu ting yu inap lusim laip bilong yu bilong helpim ol kain man olsem?—

Baibel i tok: “I no gat wanpela bilong yumi inap long i dai bilong helpim wanpela stretpela man. Tasol sapos yumi lukim wanpela man i save mekim gutpela pasin tru, orait ating bai yumi inap long strongim bel na i dai bilong helpim em.” Tasol Baibel i tok Jisas ‘i dai bilong kisim bek ol man bilong mekim pasin nogut.’ Dispela i makim tu ol man i no mekim wok bilong God! Baibel i tok moa olsem: “Yumi stap yet olsem ol manmeri bilong mekim sin, na Krais i dai bilong helpim yumi.”​—Rom 5:​6-8.

Yu inap tingim wanpela aposel bipo em i bin mekim ol pasin i nogut tru?— Dispela aposel i tok olsem: “Krais Jisas i bin kam long graun bilong kisim bek yumi manmeri bilong mekim sin. . . . Mi yet mi bin mekim sin moa yet na mi stap olsem namba wan man bilong mekim sin.” Aposel Pol i bin mekim dispela tok. Em i tok bipo em i “no gat gutpela tingting” na em i bin mekim ol pasin nogut.​—1 Timoti 1:​15; Taitus 3:3.

Tingim bikpela pasin laikim bilong God, em i salim Pikinini bilong em i kam i dai bilong helpim ol kain man olsem! Plis kisim Baibel bilong yu na ritim dispela tok long Jon sapta 3, ves 16. Em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”

Jisas i kamapim klia olsem em tu i save laikim yumi wankain olsem Papa bilong em. Ating yu inap tingim dispela long Sapta 30 bilong dispela buk, yumi bin ritim stori bilong ol hevi Jisas i bin karim long nait ol i bin holim em. Ol i kisim em i go long haus bilong Hetpris Kaiafas, na ol i kotim Em. Ol i bringim ol man i kam bilong sutim ol tok giaman long Jisas, na ol i paitim em. Long dispela taim Pita i bin giaman olsem em i no save long Jisas. Orait yumi ken tingim olsem yumi stap long dispela taim na yumi inap lukim ol samting i kamap.

Moning i kamap. Jisas i no bin slip long nait olgeta. Dispela kot ol i bin mekim long nait em i no stret wantaim lo, olsem na kwiktaim ol pris i singautim Sanhedrin, em nambawan kot bilong ol Juda, na ol i mekim narapela kot. Long dispela kot tu, ol i sutim tok long Jisas na tok em i bin brukim ol lo bilong God.

Bihain ol pris i pasim han bilong Jisas na bringim em i go long Pailat, em gavena bilong Rom. Ol i tokim Pailat: ‘Jisas i birua long gavman. Em i mas i dai.’ Tasol Pailat i luksave olsem ol pris i wok long mekim ol tok giaman. Olsem na Pailat i tokim ol: ‘Mi no painim wanpela rong long dispela man. Bai mi larim em i go.’ Tasol ol pris na ol arapela i singaut olsem: ‘Nogat! Kilim em!’

Bihain, Pailat i traim gen long tokim ol man olsem em bai larim Jisas i go. Tasol ol pris i kirapim ol man long singaut olsem: ‘Sapos yu larim em i go, yu tu i birua long gavman. Kilim em’! Ol manmeri i mekim bikpela nois tru. Yu save Pailat i mekim wanem?—

Em i bihainim tok bilong ol. Pastaim em i tokim ol long wipim Jisas. Bihain em i givim Jisas long ol soldia na bai ol i kilim em i dai. Ol i putim long het bilong Jisas wanpela samting i olsem hat bilong king ol i bin wokim long rop i gat nil, na ol i brukim skru na tok bilas long em. Bihain ol i givim Jisas wanpela bikpela pos bilong em i karim, na ol i bringim em i go ausait long taun long wanpela hap ol i kolim Ples bilong bun bilong het. Long dispela hap ol i nilim ol han na lek bilong Jisas long pos. Bihain ol i sanapim pos na Jisas i hangamap long en. Blut bilong em i wok long pundaun. Em i pilim bikpela pen tru.

Jisas i no dai kwiktaim. Em i hangamap tasol i stap long pos. Ol hetpris i tok bilas long em. Na ol man i go i kam ol i tok: ‘Sapos i tru yu Pikinini Bilong God, orait lusim diwai pos na kam daun.’ Tasol Jisas i save long samting Papa bilong em i bin salim em i kam bilong mekim. Em i save olsem em i mas givim gutpela laip bilong em na bai yumi gat rot bilong kisim laip oltaim. Bihain, long 3 klok long apinun, Jisas i singaut long Papa bilong em na em i dai.​—Matyu 26:36–​27:50; Mak 15:1; Luk 22:39–​23:46; Jon 18:1–​19:30.

Jisas i narapela kain tru long Adam! Adam i no bin soim olsem em i laikim God. Em i sakim tok bilong God. Na Adam i no soim olsem em i laikim yumi tu. Em i mekim sin, olsem na yumi olgeta i kamap sinman. Tasol Jisas i soim olsem em i laikim God na yumi tu. Oltaim em i bin bihainim tok bilong God. Na em i givim laip bilong em na bai em inap rausim ol samting nogut Adam i bin kamapim long yumi.

Olsem wanem? Yu tenkyu long gutpela samting Jisas i bin mekim?— Taim yu beten long God, yu save tenkyu long em i bin givim Pikinini bilong em bilong helpim yumi?— Aposel Pol i bin tenkyu long samting Krais i bin mekim long em. Pol i tok, Pikinini Bilong God i “laikim mi tru na em i lusim laip bilong em yet bilong helpim mi.” (Galesia 2:​20) Jisas i dai bilong helpim yu na mi tu. Em i bin givim gutpela laip bilong em na bai yumi inap kisim laip oltaim! Tru tumas, dispela i wanpela bikpela samting tru bilong kirapim yumi long laikim Jisas.

Aposel Pol i salim pas long ol Kristen long taun Korin na em i tok: “Krais i bin givim bel bilong en long mipela, na dispela i save kirapim mipela long wok.” Pasin bilong Krais long laikim yumi i mas kirapim yumi long mekim wanem wok? Yu ting wanem?— Lukim bekim bilong Pol: “Krais i dai bilong helpim olgeta man na bai ol i ken tingting long Em long i stap bilong ol. Ol i no ken stap bilong amamasim ol yet.”—2 Korin 5:​14, 15, New Life Version.

Yu inap tingim sampela rot bilong yu ken soim olsem yu laik mekim ol samting Krais bai amamas long en?— Wanpela rot em yu ken tokim ol arapela long ol samting yu bin kisim save long en long Krais. O tingim dispela: Ating yu stap wanpis, olsem na mama o papa o wanpela arapela man i no inap lukim ol samting yu mekim. Olsem wanem? Bai yu lukim ol program long TV o mekim ol arapela samting em yu save olsem Jisas i no inap amamas long en?— Tingim, Jisas i stap laip nau, na em inap lukim olgeta samting yumi mekim!

Narapela as na yumi mas laikim Jisas em olsem yumi laik bihainim pasin bilong Jehova. Jisas i tok: “Papa i laikim mi tru.” Yu save bilong wanem Jehova i laikim Jisas na bilong wanem yumi tu i mas mekim olsem?— Long wanem, Jisas i bin redi long i dai na bai laik bilong God i ken kamap. (Jon 10:17) Olsem na yumi mas mekim ol samting Baibel i tokim yumi long mekim: “Yupela i stap pikinini bilong em. Olsem na yupela i mas bihainim ol pasin em yet i save mekim. Yupela i mas wokabaut long pasin bilong laikim tru ol arapela, olsem Krais i bin laikim yumi tru na givim laip bilong em yet bilong helpim yumi.”​—Efesus 5:​1, 2.