Sheol na Hades Em Wanem Samting?

LONG ol tok ples bilong bipo tru ol i bin raitim Baibel long en, Baibel i yusim tok Hibru sheʼohlʹ na tok Grik haiʹdes winim 70 taim. Tupela tok wantaim i makim samting bilong indai. Sampela Baibel i tanim dispela tupela tok olsem “matmat,” “hel,” o “hul.” Planti taim Buk Baibel i tanim dispela tupela tok olsem “ples bilong ol man i dai pinis,” na sampela taim olsem “dai” o “matmat.” Tasol long planti tok ples i no gat ol tok i kamapim mining stret bilong dispela tok Hibru na Grik. Olsem na Baibel New World Translation i yusim tok “Sheol” na “Hades.” Wanem mining tru bilong dispela tupela tok? Yumi ken skelim olsem wanem narapela narapela ves bilong Baibel i yusim dispela tupela tok.

Saveman 9:10 i tok: “Yu no inap mekim wok o tingting o kisim gutpela tingting na save long ples bilong ol man i dai pinis [sheʼohlʹ], dispela ples bai yu go long en.” Olsem wanem? Tok sheʼohlʹ i makim wanpela matmat stret we yumi bin planim ol famili bilong yumi? Nogat. Taim Baibel i tok long ples stret bilong planim man, o matmat, em i yusim ol narapela tok Hibru na Grik, em i no yusim tok sheʼohlʹ na haiʹdes. (Stat 23:​7-9; Matyu 28:1) Na tu, Baibel i no yusim tok sheʼohlʹ bilong makim wanpela matmat i gat sampela daiman long en, olsem matmat bilong wanpela famili o matmat ol i bin planim planti man tru long en.​—Stat 49:​30, 31.

Orait sheʼohlʹ i makim wanem kain ples? Baibel i tok sheʼohlʹ o haiʹdes i makim bikpela samting, winim matmat ol i bin planim planti man long en. Olsem: Aisaia 5:14 i tok, “matmat [sheʼohlʹ] i opim maus bikpela tru.” Maski sheʼohlʹ i bin daunim planti manmeri tru, i luk olsem oltaim em i gat laik long daunim sampela manmeri moa. (Sindaun 30:​15, 16) Long wanpela ples matmat tru ol inap planim ol daiman inap long skel bilong ples matmat, tasol “ol i no inap pulapim ples bilong ol man i dai pinis [sheʼohlʹ].” (Sindaun 27:20) Dispela i makim olsem sheʼohlʹ i no inap pulap. I no gat mak bilong en. Olsem na sheʼohlʹ o haiʹdes i no wanpela ples tru. Nogat. Em piksa i makim matmat em klostu olgeta daiman i slip long en.

Tok bilong Baibel long kirap bek i helpim yumi long kliagut moa long mining bilong sheʼohlʹ na haiʹdes. Baibel i kamapim olsem ol daiman i stap long sheʼohlʹ na haiʹdes ol bai kirap bek.a (Jop 14:13; Aposel 2:31; KTH 20:13) Baibel i tok tu olsem ol daiman i stap long sheʼohlʹ o haiʹdes, em ol man i bin mekim wok bilong Jehova, na ol man i no bin mekim wok bilong em. (Stat 37:35; Song 55:15) Olsem na Baibel i tok “God bai i kirapim bek ol man i dai pinis, em ol stretpela man na ol man nogut wantaim.”​—Aposel 24:15.