Sapta 9
Bilip Bilong Kirap Bek Em i Gat Strong
OL MAN i dai pinis, sapos ol i no inap kirap bek, bai ol i no i stap laip gen. Tasol Jehova i mekim pasin marimari na opim rot bambai ol milion milion manmeri i dai pinis ol inap kisim laip i stap oltaim. Olsem na yumi ken bilip na wet long lukim gen ol famili bilong yumi ol i dai pinis.—Skelim Mak 5:35, 41, 42; Ap. 9:36-41.
2 Jehova inap kirapim bek ol man i dai pinis, olsem na em inap larim Seten i traim ol gutpela wokboi bilong em na mekim nogut long ol na kilim ol i dai. Seten i save mekim ol dispela samting nogut long ol wokboi bilong Jehova bilong helpim tok giaman em i bin mekim, olsem: “Man bai lusim olgeta samting bilong lukautim laip bilong em.” (Jop 2:4, NW) Jisas i kirap bek, olsem na em inap kamap long sia king bilong Papa bilong em long heven na givim pe bilong ofa bilong em long Papa, bilong helpim yumi long kisim laip. Ol manmeri bilong mekim wok king wantaim Krais, ol bai kirap bek, na long dispela rot bai ol inap i stap wantaim Krais long Kingdom bilong heven. Na yumi olgeta manmeri i bilip, yumi save ol man i dai pinis bai ol i kirap bek. Dispela bilip i strongim yumi taim bikpela traim i painim yumi, olsem ol birua i laik kilim yumi i dai.
Wanpela As Tok Bilong Bilip Kristen
3 Hibru 6:1, 2 i tok, tok bilong kirap bek em wanpela ‘as tok’ bilong bilip. Yumi mas save long dispela tok bambai yumi inap kamap strongpela Kristen. Tasol tingting bilong ol man bilong dispela graun i narapela kain. Ol i no tingim ol samting bilong spirit. Planti ol i wok long painim amamas tasol. Ol i tingting long samting bilong nau tasol. (1 Ko. 15:32) Ol man i bihainim ol olpela lotu bilong Krisendom na bilong ol haiden, ol i ting ol i gat tewel. Tasol sapos ol i gat tewel, orait, God i no gat wok long kirapim bek ol, a? Long wanem ol i no i dai tru—tewel bilong ol i stap laip yet. Olsem na dispela bilip bilong ol i kranki tru na i pait wantaim tok bilong Baibel long ol daiman bai kirap bek. Na ol man i gat dispela kain bilip kranki ol i no inap tingim gutpela samting bai kamap bihain na wet long en. Nogat. Tingting bilong ol bai longlong tasol. Tasol olsem wanem long ol man i laik harim tok? Yumi ken helpim ol olsem wanem?—Ap. 17:32.
4 Ol dispela man i no inap kisim kwik tok bilong kirap bek. Pastaim ol i mas save yumi no gat tewel, na ol man i dai pinis ol i dai tru. Sapos man i hangre long tok i tru, ating wanpela o tupela skripsa tasol inap kliaim tingting bilong em. (Jen. 2:7; Sam 146:3, 4) Tasol sampela Baibel bilong nau ol i no tanim gut tok, na dispela tok i tru i stap hait liklik. Olsem na ating yu mas lainim man long ol tok olsem ol i bin raitim pastaim long tok Hibru na tok Grik.
5 Long tok Hibru Baibel i kolim ol man na animal na pis na pisin olsem neʹphesh (nefes), na long tok Grik psyʹkhe (saiki). Tasol Baibel i no tok dispela “nefes” o “saiki” i save lusim ol taim ol i dai pinis na em i stap laip yet long sampela hap. Nogat. Long Baibel Pisin ol i bin tanim dispela tupela tok olsem “pipel,” “man,” “laip” samting. (Jen. 46:18; Ap. 3:23; Mt. 10:39) Tasol sampela taim ol i tanim kranki olsem “tewel.” (Mt. 10:28; Mak 12:30; Luk 10:27; 1 Te. 5:23; Hi. 4:12; Re. 20:4) Dispela tok “tewel” i no stret, long wanem em i no insait tru bilong dispela tupela tok. Insait tru bilong en i olsem: (1) “man,” (2) “animal,” (3) “laip.” Ol i no ken raitim olsem “tewel.” Long wanem, Baibel i no tok yumi gat tewel.
6 I gat sampela tok Hibru na tok Grik moa yumi mas save long en, olsem tok Hibru sheōlʹ na tok Grik haʹdes na geʹen.na. Long Baibel Pisin ol i tanim tok Hibru sheōlʹ olsem “ples bilong ol man i dai pinis” o “ples bilong ol daiman.” (Pro. 9:18) Insait bilong dispela tok Hibru i wankain olsem dispela tok Grik haʹdes. Dispela tupela tok i makim matmat tasol. (Sam 16:10; Ap. 2:27) Baibel i tok klia, ol man i stap long sheōlʹ o haʹdes, olsem matmat, ol i no gat laip—ol i dai tru na ol i no inap mekim wanpela samting. (Sam 6:5; 31:17) Tasol long Nupela Testamen sampela taim ol i tanim kranki dispela tok haʹdes na ol i raitim “hel.” (Re. 20:13) Na ol i tanim tok geʹen.na tu olsem “hel.” (Mt. 18:9; 10:28) Dispela i paulim tingting bilong ol man, long wanem Revelesen 20:13 i tok: “Hel [haʹdes] i givim bek olgeta daiman i stap long en.” Tasol Matyu 10:28 i tok ol man i go long “hel” (geʹen.na) ol i bagarap olgeta na i no ken kirap bek.
7 Orait taim yu stretim pinis tingting bilong man long ol dispela samting, nau em inap save i dai na kirap bek bilong Krais i samting tru bilong helpim em. Na em inap pilim gutpela pasin sori Jehova i mekim, em bai kirapim bek ol man i dai pinis. Ol man i bel hevi long man i dai pinis ol i ken amamas, long wanem taim God i kamapim Nupela Taim, orait ol man i dai pinis bai ol i kirap bek na bai ol inap bung wantaim gen. Ol Kristen bilong pastaim i save, kirap bek bilong Krais i as bilong bilip Kristen. Ol i wok strong long tokim ol man long Jisas i kirap bek pinis, olsem na ol narapela man i dai pinis ol tu inap kirap bek. Olsem tasol, ol Kristen long nau ol i bilip olsem ol man i dai pinis bai ol i kirap bek na ol i wok strong long autim dispela gutpela tok i tru long ol narapela man.—Ap. 5:30-32; 10:40-43; 13:32-39; 17:31.
Mekim Wok Long ‘Ki Bilong Ples Bilong Ol Daiman’
8 Olgeta manmeri ol i bilong wok wantaim Krais long Kingdom bilong heven, ol i mas i dai. Tasol ol i save long tok promis Krais i bin mekim. Em i tokim aposel Jon: “Bipo mi dai pinis, tasol yu lukim mi, mi stap laip oltaim oltaim. Na mi holim ki bilong dai na bilong ples bilong ol daiman.” (Re. 1:18) Wanem insait bilong dispela tok? Em olsem: Em yet em i dai, tasol God i no lusim em i stap long matmat o ples bilong ol man i dai pinis. Long namba tri de God Jehova i kirapim em bek olsem spirit na givim laip oltaim oltaim long em. Na God i givim “ki bilong dai na bilong ples bilong ol daiman” long em bilong helpim ol narapela man long lusim matmat na lusim ol samting nogut sin bilong Adam i bin kamapim. Jisas i holim ol dispela ki, olsem na em inap kirapim bek ol disaipel bilong em ol i stap gut long wok bilong em. Taim em i mekim olsem em i givim laip oltaim long heven long ol lain bilong em, em spirit holi i bin makim ol, na ol i no inap i dai moa. Em dispela kain laip Papa bilong em i bin givim long em.—Rom 6:5; Fl. 3:20, 21.
9 Ol dispela Kristen, em spirit holi i makim ol na ol i stap gut long wok, ol i kirap bek long wanem taim? Sampela ol i kirap bek pinis. Aposel Pol i tok bai ol i kirap bek taim Krais “i kam bek.” (1 Ko. 15:23) Krais i kam bek pinis long 1914 C.E., olsem na ol lain bilong em nau ol i dai, ol i no ken wetim Bikpela bilong ol i kam bek. Taim ol i dai, “kwik tumas, wantu tasol” ol i kirap bek olsem spirit. Na ol i amamas tru, long wanem “gutpela pasin ol i bin mekim, dispela i go wantaim ol”!—1 Ko. 15:51, 52; Re. 14:13.
10 Tasol i no dispela lain tasol i kirap bek. Baibel i tok, taim dispela lain i kirap bek em “namba wan taim” ol man i kirap bek long matmat. Olsem na i mas i gat namba tu taim. Bihain bai ol narapela i kirap bek. (Re. 20:6) Ol dispela manmeri i kirap bek bihain, bai ol inap i stap oltaim long gutpela ples Paradais hia long graun. Wanem taim bai dispela samting i kamap? Revelesen i tok, “graun wantaim skai” bilong nau, olsem dispela pasin nogut bilong nau, i mas pinis pastaim. Dispela taim i klostu pinis. Orait bihain, long taim God i makim, ol manmeri bilong kisim laip long graun bai ol i kirap bek.—Re. 20:11, 12.
11 Husat sampela bai ol i kirap bek? Ol gutpela wokboi bilong Jehova bilong bipo yet, bai ol i kirap bek. Ol i bilip tru olsem ol man i dai pinis bai kirap bek na taim traim i painim sampela ol i no pret long i dai na ol i surik na lusim God; nogat; ol i no pret na mekim sampela samting bambai “ol birua i lusim ol i go.” Ol i no givim baksait liklik long God bambai ol i ken abrusim i dai. Nogat. (Hi. 11:35) Baibel i stori liklik tasol long ol dispela manmeri, olsem na bai yumi amamas tru long kisim save long ol na harim tok long maus bilong ol yet long ol samting i bin painim ol! Ebel, em namba wan witnes bilong Jehova, em bai kirap bek. I gat planti moa bai kirap bek, olsem Inok na Noa, em tupela i wok strong long autim tok bilong God paslain long taim bilong Tait. Na Ebraham tu, em i bin lukautim ensel long haus bilong em. Na Moses tu, em God i givim Lo long ol Isrel long rot bilong em. Ol profet i gat strongpela bel, olsem Jeremaia em i bin lukim Jerusalem i bagarap long 607 B.C.E., ol tu bai kirap bek. Na Jon Bilong Baptais, em i bin harim maus bilong God yet i tokaut long Jisas em i Pikinini bilong Em. Na ol gutpela wokboi bilong God ol i dai nau long las taim, ol tu bai kirap bek.—Hi. 11:4-38; Mt. 11:11.
12 Bihain bai sampela moa ol i kirap bek. Aposel Jon i stori long bikpela wok bilong helpim ol man em Jisas bai mekim long ‘ki bilong ples bilong ol daiman.’ Jon i lukim ol samting olsem driman na em i lukim ol i ‘tromoi Hel [haʹdes] i go daun long bikpela hul i gat paia.’ Wanem insait bilong dispela tok? “Hel” o matmat bai pinis olgeta, long wanem olgeta manmeri i stap long sheōlʹ o haʹdes (matmat) bai ol i kirap bek. Olsem na Jisas i no ken kirapim tasol ol gutpela boi bilong Jehova; em bai kirapim bek ol man nogut tu wantaim. Tasol em i no kirapim bek ol bilong kot na bilong i dai gen. Nogat. Bai ol i stap long taim bilong stretpela pasin aninit long Kingdom bilong God na bai i gat ol man bilong helpim ol long stretim pasin bilong ol na bihainim ol pasin bilong Jehova. Jon i lukim “buk bilong laip” i op na ol inap mekim ol samting bambai God i raitim nem bilong ol long dispela buk. Bai em i skelim olgeta wan wan “inap long olgeta pasin ol i bin mekim” taim ol i kirap bek pinis. (Re. 20:12-14; Ap. 24:15) Olsem na sapos ol inap kisim laip, orait, ol i “kirap bek na i stap laip”; ol i no kirap bek bilong “kamap long kot” na kisim strafe.—Jon 5:28, 29.
13 Tasol sampela manmeri i dai pinis, ol i no ken kirap bek. Sampela ol i bin mekim dispela kain rong i no inap tekewe. Na ol manmeri i bagarap long taim bilong “bikpela hevi tru” liklik taim bai kamap, ol bai lus olgeta na i no ken kirap bek. (Mt. 12:31, 32; 23:33; 24:21, 22; 25:41, 46; 2 Te. 1:6-9) Tru, God bai mekim bikpela pasin marimari na kirapim bek olgeta manmeri i stap long haʹdes, tasol yumi no ken pilai long marimari bilong God. Yumi mas pilim tru dispela gutpela pasin bilong God na tingim gut ol samting yumi mekim long nau.
Bilip Long Kirap Bek i Strongim Ol
14 Ol manmeri i bilip tru olsem ol man i dai pinis bai ol i kirap bek, dispela bilip i strongim ol. Taim ol i go lapun ol i save ol i mas i dai, maski i gat ol gutpela dokta na marasin samting. (Ekl. 8:8) Tasol ol i no pret. Ol i save, sapos ol i bin wok strong long wok bilong Bikpela na wok gut wantaim oganaisesen bilong em, ol inap i stap laip gen long bihain. Long taim God i makim bai ol i kirap bek. Bai ol i kisim “laip tru,” olsem Pol i tok!—1 Ti. 6:19; 1 Ko. 15:58; Hi. 6:10-12.
15 Yumi save ol man i dai pinis bai ol i kirap bek, tasol bikpela samting em yumi save long dispela Man em i As bilong dispela gutpela samting, olsem na yumi inap sanap strong. Na yumi inap i stap gut long God maski ol birua i tok long kilim yumi i dai. Ol man i save pret long birua i painim ol na ol i dai, na Seten i bin mekim wok long dispela pret bilong ol bilong holimpas ol, olsem kalabusim ol. Tasol Jisas i no pret long i dai; em i no surik; em i stap gut long God, i go inap long taim em i dai. Na i dai bilong em i wokim rot bilong ol man i ken lusim dispela kalabus bilong pret. (Hi. 2:14, 15) Ol disaipel tru bilong em ol i bilip long ol samting em i bin mekim bilong helpim ol, na ol i sanap strong tru. Taim ol man i mekim nogut long ol, ol i kamapim bel bilong ol, ol i no ‘tingting tumas long laip bilong ol’—ol i laikim tumas Jehova. (Re. 12:11) Ol i bihainim gutpela tingting na ol i no lusim ol lo Kristen o rot bilong kisim laip i stap oltaim bambai ol i ken lukautim laip bilong ol long nau. (Luk 9:24, 25) Yu gat kain strongpela bilip olsem? Sapos yu laikim tumas Jehova na yu tingim gut tok promis bilong kirap bek, yu inap bilip strong olsem.
Stori Gen Long Ol Dispela Tok
● Bilong bilip tru long kirap bek, bilong wanem yumi mas save taim yumi dai yumi save dai tru, na yumi no gat tewel?
● Husat bai ol i kirap bek? Taim yumi save long dispela samting, dispela i mas mekim wanem long yumi?
● Taim yumi bilip olsem ol man i dai pinis bai ol i kirap bek, dispela i strongim yumi olsem wanem?
[Askim Bilong Stadi]
1. Wanem ol gutpela samting inap kamap long rot bilong kirap bek?
2. (a) Kirap bek i mekim wanem ol bikpela wok bilong kamapim laik bilong Jehova? (b) Long wanem kain taim bilip bilong yumi long kirap bek em inap strongim tru yumi?
3. (a) Olsem wanem tok bilong kirap bek em i wanpela ‘as tok’ bilong Baibel? (b) Ol man bilong dispela graun i save ting olsem wanem long kirap bek?
4. (a) Pastaim yumi mas toktok wantaim man long wanem samting na bai em inap kisim save long tok bilong kirap bek? (b) Yu bai kolim wanem ol skripsa bilong helpim man long save, yumi no gat tewel na ol man i dai pinis ol i dai tru? (c) Yumi ken mekim wanem sapos Baibel bilong em i no tanim gut tok na ol dispela tok i tru i no klia?
5. Olsem wanem bai yu helpim man long save, yumi no gat tewel?
6. (a) Sampela Baibel long nau ol i tanim tok sheōlʹ na haʹdes na geʹen.na olsem wanem na ol i paulim tingting bilong ol man? (b) Yu bai stori long wanem ol tok bilong Baibel bilong helpim ol man long save long ol samting i painim man i stap long sheōlʹ o haʹdes? Na olsem wanem long ol man i stap long geʹen.na?
7. Sapos man i save tru long kirap bek, dispela bai mekim wanem long tingting bilong em na ol samting em i mekim?
8. Jisas i mekim wok long “ki bilong dai na bilong ples bilong ol daiman” na olsem wanem dispela i helpim lain bilong em, em spirit holi i bin makim ol?
9. Ol Kristen em spirit holi i makim ol na ol i stap gut long wok, wanem taim ol i kirap bek?
10. Husat moa bai ol i kirap bek? Wanem taim bai ol i kirap bek?
11. Husat sampela ol bai kirap bek i stap long graun? Bilong wanem yumi ken amamas long dispela samting?
12. (a) Hamas manmeri ol i stap long haʹdes bai ol i kirap bek? (b) Olsem na husat tu bai ol i kirap bek? Bilong wanem ol tu bai kirap bek?
13. (a) Husat ol i no ken kirap bek? (b) Taim yumi save long dispela tok i tru olsem ol man i dai pinis bai ol i kirap bek, dispela save i mas kirapim yumi long mekim wanem?
14. Sapos man i go lapun na em i bilip long kirap bek, olsem wanem dispela bilip inap strongim em?
15. Sapos ol man i mekim nogut long yumi na i laik kilim yumi i dai, wanem samting inap helpim yumi long sanap strong na stap gut long Jehova?