Pas i Kam long Gavening Bodi

Yes Yupela Ol Manmeri i Laikim Tru Jehova:

Jisas i tok: “Yupela bai i save long tok tru, na tok tru bai i mekim yupela i kamap fri.” (Jon 8:32) Dispela tok i strongim tru bel bilong yumi, a? Yes, yumi inap save long tok i tru, maski yumi stap long “taim bilong las de” we pasin bilong tok giaman i bikpela tru. (2 Timoti 3:1) Yu inap tingim namba wan taim yu bin kisim save long tok i tru i stap long Baibel? Yu bin amamas tru, a?

Em i bikpela samting long yumi mas kisim stretpela save long tok i tru na oltaim yumi mas tokim ol narapela man long en, tasol tu yumi yet i mas mekim ol pasin i stret wantaim tok i tru. Bilong mekim olsem, yumi mas stap insait yet long pasin laikim bilong God. Dispela i makim wanem samting? Tok em Jisas i mekim long nait paslain long em i dai i bekim dispela askim. Em i tokim ol gutpela aposel bilong em: “Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em.”​—Jon 15:10.

Tingim, Jisas i stap insait long pasin laikim bilong God taim em i bihainim ol lo bilong Papa bilong em. I wankain long yumi tu long nau. Bilong i stap insait long pasin laikim bilong God, yumi mas bihainim tok i tru long olgeta wokabaut bilong yumi. Long dispela wankain nait, Jisas i tok: “Nau yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.”​—Jon 13:17.

Mipela i laik bai dispela buk i ken helpim yu long wok yet long bihainim tok i tru long laip bilong yu na bai yu ken i ‘stap insait yet long pasin laikim bilong God na kisim laip oltaim.’​—Jut 21, NW.