Pas i Kam Long Gavening Bodi

Long ol manmeri i laikim Jehova God na Tok bilong em, Baibel:

Jisas i tok: “Yupela bai save long tok i tru, na tok i tru bai mekim yupela i kamap fri.” (Jon 8:32) Tingim samting yu pilim long fes taim yu bin kisim save long tok i tru bilong Baibel! Ating yu bin amamas tru long save olsem long dispela graun we i pulap long pasin giaman, yumi inap kisim save long tok i tru.—2 Timoti 3:1.

Jehova God i laik bai yumi save long tok i tru. Yumi laikim ol manmeri, olsem na yumi laik tokim ol long tok i tru. Tasol bilong lotuim God, i gat sampela samting moa yumi mas mekim. Yumi mas traim bes long stap olsem Kristen bikos yumi rispektim ol stiatok bilong Jehova. Jisas i eksplenim wanpela bikpela rot yumi ken pruvim long God olsem yumi laikim em. Em i tok: “Sapos yupela i bihainim ol lo bilong mi, orait yupela bai stap insait yet long pasin laikim bilong mi, olsem mi bin bihainim ol lo bilong Papa na stap insait yet long pasin laikim bilong em.”—Jon 15:10.

Jisas i laikim tru Papa bilong em, na em i mekim olgeta samting Papa i askim em long mekim. Sapos yumi bihainim pasin bilong Jisas long laip bilong yumi, Jehova bai laikim yumi na yumi bai stap amamas tru. Jisas i tok, “yupela i save long ol dispela samting, olsem na yupela bai amamas sapos yupela i mekim ol dispela samting.”—Jon 13:17.

Mipela i hop olsem dispela buk bai helpim yu long kisim save long hau yu inap bihainim tok i tru bilong Baibel long laip bilong yu na kamap pren bilong God. Mipela i beten olsem pasin bilong yu long laikim God bai wok long go bikpela na bai yu stap yet insait ‘long pasin laikim bilong God na kisim laip oltaim.’—Jut 21.