Olsem Wanem Yu Inap Luksave Long Lotu i Tru?

1. Yu ting i gat wanpela trupela lotu tasol?

Jisas i skulim ol disaipel bilong em long wanpela lotu tasol, em lotu i tru. Dispela i olsem wanpela rot i go long laip oltaim. Jisas i tok: “Wan wan manmeri tasol i save lukim na bihainim dispela rot.” (Matyu 7:14) God i orait tasol long lotu em tok i tru bilong Baibel i as bilong en. Olgeta man i lotu tru long God, ol i stap wanbel long bilip.​—Ritim Jon 4:23, 24; 14:6; Efesus 4:4, 5.

Lukim vidio Yu Ting God i Orait Long Olgeta Lotu?

2. Jisas i tok wanem long ol Kristen giaman?

Jisas i tok lukaut olsem ol profet giaman bai bagarapim lotu Kristen. I luk olsem ol i lotu tru long God, na ol i tok ol i Kristen, tasol yu inap luksave long ol i wanem kain lain tru. Olsem wanem yu inap luksave long ol? Lotu i tru tasol i kamapim ol Kristen tru em yu inap luksave long ol long ol pasin ol i save mekim.​—Ritim Matyu 7:13-23.

3. Olsem wanem yu inap luksave long ol man i lotu tru long God?

Skelim dispela 5-pela mak:

• Ol i rispektim Baibel olsem Tok Bilong God. Ol i wok strong long bihainim ol stiatok bilong en. Olsem na lotu i tru i narapela kain long ol lotu em tingting bilong ol man i as bilong en. (Matyu 15:7-9) Ol man i lotu tru long God, ol i no autim wanpela tok na bihainim pasin i narapela kain long dispela tok.​—Ritim Jon 17:17; 2 Timoti 3:16, 17.

• 

  Ol disaipel tru bilong Jisas i litimapim nem bilong God, Jehova. Jisas i litimapim nem bilong God long rot bilong autim dispela nem long ol man. Em i helpim ol man long kisim save long God, na em i skulim ol long beten olsem nem bilong God i mas i stap holi. (Matyu 6:9) Long hap yu stap long en, wanem lotu i save autim nem bilong God?​—Ritim Jon 17:26; Rom 10:13, 14.

• Ol Kristen tru i save autim tok bilong Kingdom Bilong God. God i bin salim Jisas i kam bilong autim gutnius bilong Kingdom. Kingdom Bilong God tasol bai kamapim ol gutpela samting long ol manmeri. Jisas i bin toktok long dispela Kingdom i go inap long taim em i dai. (Luk 4:43; 8:1; 23:42, 43) Em i tok ol disaipel bilong em bai autim tok bilong dispela Kingdom. Sapos wanpela man i kam toktok wantaim yu long Kingdom Bilong God, yu ting em i bilong wanem lotu?​—Ritim Matyu 24:14.

• Ol disaipel bilong Jisas i no bilong dispela graun. Yu inap luksave long ol, long wanem, ol i no insait long ol wok politik na pait samting. (Jon 17:16; 18:36) Na tu, ol i no insait long ol pasin na tingting nogut bilong dispela graun.​—Ritim Jems 4:4.

• Ol Kristen tru i save laikim tru narapela narapela. Baibel i skulim ol long rispek tru long olgeta lain man. Planti taim ol lotu giaman i strong long sapotim ol woa bilong ol kantri, tasol ol man i lotu tru long God ol i no laik tru long mekim olsem. (Maika 4:1-3) Ol Kristen tru i givim taim na ol samting bilong ol yet long helpim na strongim ol narapela.​—Ritim Jon 13:34, 35; 1 Jon 4:20.

4. Yu inap luksave long lotu i tru?

Wanem lotu i save autim ol tok em Baibel i as bilong en, litimapim nem bilong God, na tokaut olsem Kingdom Bilong God tasol inap pinisim tru ol hevi bilong ol man? Wanem lain i save mekim pasin laikim na i no save sapotim ol woa? Yu ting ol i husat?​—Ritim 1 Jon 3:10-12.