Skul Yumi Kisim Long Jisas

Long Lotu i Tru

Yu ting God i orait long olgeta lotu?

▪ Jisas i sori tru long ol manmeri em lotu giaman i bin giamanim ol. Em i mekim tok lukaut olsem “ol giaman profet . . . i olsem ol weldok i pasim skin bilong sipsip, bai ol i ken i go klostu long ol sipsip na holimpas ol.” (Matyu 7:​15) Olsem wanem? Yu bin lukim sampela lain i yusim lotu bilong mekim wok nogut?

Long beten Jisas i tok long God olsem: “Tok bilong yu i tru olgeta.” (Jon 17:17) God i no orait long lotu i pait wantaim tok i tru bilong Baibel. Olsem na long sampela bikman bilong lotu em ol i gat tupela maus, Jisas i kolim tok bilong God long ol olsem: “Ol i save autim lo bilong ol man tasol na tok, ‘Dispela em i tok bilong God.’ Olsem na ol i lotu nating long mi.”​​—Matyu 15:9.

I gat wanpela lotu tru i stap?

▪ Taim Jisas i bungim wanpela meri Samaria em lotu giaman i bin giamanim em, Jisas i tokim em olsem: “Yupela Samaria i save lotu long samting yupela i no save long en. . . . Olgeta man i laik lotu tru bai ol i lotu long Papa long strong bilong Holi Spirit na long pasin i tru. Na Papa i laikim tumas bai ol kain man olsem i mas lotu long em.” (Jon 4:​22, 23) Tru tumas, yumi ken painim lotu i tru.

Jisas i tok: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.” Jisas i save olsem lotu em i skulim ol man long en, em tasol i trupela lotu. (Jon 8:​28) Olsem na em i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6) Ol man i lotu tru long God ol i wanbel long i go long Papa long wanpela rot tasol, olsem na ol i mas i stap wanbel insait long wanpela lotu i tru.

Olsem wanem yu inap luksave long ol man i lotu tru?

▪ Man i bihainim Jisas Krais em i wanpela Kristen. Skelim 4-pela rot we pasin bilong bihainim pasin bilong Jisas i kamapim klia olsem man i disaipel tru bilong em.

1. Jisas i beten na tok long Jehova olsem: “Mi bin kamapim nem bilong yu long ol.” (Jon 17:26) Ol Kristen tru i save mekim yet wankain pasin.

2. Jisas i autim tok long Kingdom Bilong Jehova na em i salim ol disaipel bilong em i go long ol haus na mekim wankain wok. Em i tok: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man.” Bihain, em i tokim ol disaipel bilong em olsem: “Yupela i mas i go mekim olgeta lain manmeri i kamap disaipel bilong mi.” (Matyu 10:​7, 11; 28:19) Yu inap luksave hariap long ol Kristen tru long nau, long wanem, ol i mekim yet wankain wok.

3. Jisas i no laik insait long wok politik. Olsem na em i tokim ol disaipel bilong em olsem: “Ol manmeri bilong mi ol i no bilong dispela graun, olsem mi tu mi no bilong dispela graun.” (Jon 17:14) Ol lain i lotu tru i mas i gat nem olsem ol i no save insait long wok politik.

4. Jisas i daunim laik bilong em yet na laikim tru ol narapela. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol Kristen tru i save tingim tru narapela narapela na ol i no insait long ol pait.

Lotu i tru inap helpim yu olsem wanem?

▪ Bilong bihainim lotu i tru, pastaim yu mas save gut long Jehova. Save bilong yu long God bai helpim yu long painim nambawan gutpela rot bilong bihainim na bai yu laikim tru God long bel olgeta bilong yu. Jehova i promis long givim laip oltaim long ol lain husat i laikim em. Olsem na Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru.”​​—Jon 17:3.

Bilong kisim sampela save moa, lukim sapta 15 bilong dispela buk,Tru Tru Baibel i Tok Wanem? ol Witnes Bilong Jehova i wokim.

[Piksa long pes 16]

“Yupela lukaut long ol giaman profet. . . . Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol.”​​—Matyu 7:​15