Bilong Wanem Yu Mas Wok Yet Long Kisim Save Long Jehova?

1. Olsem wanem pasin bilong stadi yet long Baibel bai helpim yu?

Nau yu kisim sampela save pinis long ol bikpela tok bilong Baibel, na dispela i strongim pasin bilong yu long laikim tru Jehova. Yu mas wok yet long strongim dispela pasin bilong laikim em. (1 Pita 2:2) Bilong yu ken kisim laip oltaim, yu mas wok yet long i go klostu long God long rot bilong stadim Tok bilong em.—Ritim Jon 17:3; Jut 21.

Taim yu kisim sampela save moa long God, bilip bilong yu bai kamap strong moa. Bilip bai helpim yu long mekim God i amamas. (Hibru 11:1, 6) Bilip bai kirapim yu long tanim bel na mekim ol senis long laip bilong yu.—Ritim Aposel 3:19.

2. Olsem wanem save yu kisim long God inap helpim ol narapela?

Ating yu laik tokim ol narapela long ol samting yu kisim save long en—yumi olgeta i save amamas long stori long ol gutpela nius. Taim yu wok long stadi long Baibel, bai yu lain long pasin bilong yusim Baibel long tokim ol narapela long bilip bilong yu long Jehova na long gutnius.—Ritim Rom 10:13-15.

Planti i save kirap autim gutnius pastaim long ol pren o ol wanblut bilong ol. Skelim gut ol tok yu bai mekim. No ken tokim ol olsem ol bilip bilong lotu bilong ol i no stret, mobeta yu tokim ol long ol tok promis bilong God. Na tingim, ol man bai pilim moa gutpela pasin bilong yu, winim ol tok yu mekim.—Ritim 2 Timoti 2:24, 25.

3. Wanem rot i op long yu?

Yu inap lain long pasin bilong bihainim ol stiatok bilong Baibel long rot bilong stadi yet long Tok Bilong God. Bihain, yu inap dediket long Jehova long rot bilong beten na pas gut wantaim em. Yu inap givim yu yet long em na insait long famili bilong em.—Ritim 2 Korin 6:18.

4. Olsem wanem yu inap wok yet long kamap strong?

Yu inap kamap strong moa long rot bilong stadi yet long Tok Bilong God. (Hibru 5:13, 14) Askim wanpela Witnes Bilong Jehova long stadi long Baibel wantaim yu long rot bilong buk Tru Tru Baibel i Tok Wanem? Taim yu kisim sampela save moa long Tok Bilong God, ol samting long laip bilong yu bai kamap gutpela moa.—Ritim Song 1:1-3; 73:27, 28.

Gutpela nius i kam long Jehova, em God bilong amamas. Yu inap i go klostu moa long em taim yu go klostu moa long lain bilong em. (Hibru 10:24, 25) Taim yu wok strong long mekim Jehova i amamas, yu wok strong long kisim dispela laip em i laip tru—em laip i stap gut oltaim oltaim. Tru tumas, taim yu go klostu long God, dispela em i nambawan gutpela samting yu inap mekim.—Ritim 1 Timoti 1:11; 6:19.