Tenpela Lepraman i Orait, Wanpela i Tok Tenkyu

Kaunsil i wokim plen bilong kilim Jisas i dai, tasol em i go long taun Efraim, em long hap not is bilong Jerusalem. Em i stap long dispela ples wantaim ol disaipel na bai ol birua i no inap painim em. (Jon 11:54) Tasol de bilong Pasova bilong yia 33 C.E. i klostu, olsem na Jisas i go long ol ples i stap long hap not bilong Samaria na i go olsem long Galili. Em laspela taim bilong Jisas long kam long dispela hap paslain long em i dai.

Taim Jisas i kirap mekim dispela raun, em i go long wanpela ples, ating long Samaria o Galili, long dispela hap 10-pela man i gat sik lepra i kam bungim em. Dispela sik inap bagarapim skin bilong man, isi isi em inap kaikaim ol narapela hap bilong bodi olsem ol pinga, tou, na yau. (Namba 12:10-12) Lo Bilong God i tok man i gat sik lepra i mas singaut olsem: “Mi no klin. Mi no klin.” Na em i mas lusim ol wantok na i stap ausait long kem.—Wok Pris 13:45, 46.

Olsem na 10-pela lepraman i stap longwe long Jisas. Tasol ol i singaut strong na tok: “Jisas, Tisa, marimari long mipela!” Jisas i lukim ol na i tok: “Yupela go na soim yupela yet long ol pris.” (Luk 17:13, 14) Jisas i soim rispek long Lo Bilong God olsem ol pris yet i mas tokaut olsem sik bilong dispela man i pinis na ol i ken bung gen wantaim ol man i no gat dispela sik.—Wok Pris 13:9-17.

Tenpela lepraman i bilip long strong bilong Jisas long wokim ol mirakel. Olsem na kwiktaim ol i go bilong lukim ol pris, maski ol i sik yet. Taim ol i wokabaut i go, ol i lukim olsem skin bilong ol i wok long kamap gutpela gen! Bilip bilong ol long Jisas i mekim ol i kamap orait.

Nainpela lepraman i kamap klin pinis na ol i wokabaut i go. Tasol wanpela bilong ol, em man Samaria, i tanim na i kam bek bilong painim Jisas. Em i amamas long mirakel Jisas i wokim. Em i wok long “singaut bikmaus na litimapim nem bilong God,” long wanem, em i save olsem God i givim strong long Jisas long oraitim em. (Luk 17:15) Taim em i bungim Jisas, em i brukim skru na tok tenkyu long em.

Jisas i lukluk long ol man i stap klostu long em, na em i tok: “10-pela man i bin kamap klin, a? We stap ol arapela 9-pela? I no gat wanpela i tanim i kam bek na givim glori long God, a? Dispela man bilong narapela lain, em tasol?” Jisas i tokim dispela man Samaria: “Yu kirap na go, bilip bilong yu i bin mekim yu kamap orait.”—Luk 17:17-19.

Taim Jisas i oraitim 10-pela lepraman, em i soim olsem God Jehova i helpim em long mekim olsem. Tru olgeta i kamap orait, tasol wanpela i bihainim rot i go long laip. Yumi no stap long dispela taim we God i yusim Jisas long wokim ol mirakel na oraitim man. Tasol sapos yumi bilip tru long Jisas, yumi tu inap kisim laip, em laip oltaim. Olsem wanem? Yumi save tok tenkyu long ol samting yumi kisim, olsem man Samaria i mekim?