Yu Save Tingim Long Tok Tenkyu?

OLSEM WANEM? Yu bin kisim sampela kaikai long nau?— Yu save husat i bin redim dispela kaikai?— Ating mama bilong yu o wanpela narapela i bin redim, tasol bilong wanem yumi mas tenkyu long God?— Long wanem, God yet i mekim na kaikai i kamap. Tasol yumi mas tenkyu tu long man i bin redim kaikai o i givim kaikai long yumi.

Sampela taim yumi save lusim tingting long tok tenkyu taim ol arapela i mekim ol gutpela pasin long yumi, a? Taim Bikpela Tisa i stap long graun, i gat sampela lepraman em ol i bin lusim tingting long tok tenkyu.

Yu save lepra i wanem kain sik?— Em wanpela sik inap mekim sampela hap skin bilong man i lus na pundaun. Taim Jisas i stap long graun, ol lepraman i mas i stap longwe long ol arapela. Na sapos lepraman i lukim wanpela man i kam, em i mas singaut na toksave long dispela man long stap longwe long em. Ol i mekim olsem na bai ol arapela i no ken i go klostu tumas long lepraman na kisim sik bilong em.

Jisas i mekim gutpela pasin tru long ol lepraman. Wanpela taim Jisas i laik i go long Jerusalem, na em i mas bihainim rot i katim namel long wanpela liklik taun. Taim em i kamap klostu long dispela taun, tenpela lepraman i kam long lukim em. Ol i bin harim tok olsem Jisas i gat strong God i bin givim em bilong oraitim olgeta kain sik.

Ol lepraman i no kam klostu long Jisas. Ol i sanap longwe liklik. Tasol ol i bilip olsem Jisas inap oraitim sik lepra bilong ol. Olsem na taim ol lepraman i lukim Bikpela Tisa, ol i singaut long em: ‘Jisas, bikman, helpim mipela’!

Olsem wanem? Yu save sori long ol man i gat sik?— Jisas i bin sori long ol. Em i save long bikpela bel hevi bilong man i gat sik lepra. Olsem na em i bekim tok bilong ol: “Yupela go soim skin bilong yupela long ol pris.”—Luk 17:​11-14.

Bilong wanem Jisas i tokim ol long mekim olsem? Long wanem, em i tingim lo Jehova i bin givim long ol manmeri bilong Em long ol samting ol lepraman i mas mekim. Dispela lo i tok pris bilong God i mas sekim gut skin bilong lepraman. Pris bai toksave long lepraman sapos sik lepra i pinis long skin bilong em. Taim skin bilong em i kamap orait, em inap i go sindaun gen wantaim ol arapela man i no gat sik.—Wok Pris 13:​16, 17.

Tasol sik bilong ol dispela lepraman i stap yet. Olsem wanem? Ol i go long pris olsem Jisas i tokim ol long mekim?— Yes, ol i go wantu tasol. Ol dispela man i bilip olsem Jisas bai pinisim sik bilong ol. Wanem samting i kamap?

Orait, taim ol i wokabaut yet i go bilong lukim pris, sik bilong ol i pinis. Skin bilong ol i kamap gutpela gen na ol i kamap orait! Ol i bilip long strong bilong Jisas na gutpela samting i kamap long ol. Ol i kisim bikpela amamas tru! Tasol ol i mas mekim wanem bilong soim olsem ol i tenkyu long dispela samting? Sapos dispela samting i bin painim yu, bai yu mekim wanem?—

Wanpela bilong ol dispela man Jisas i bin oraitim i kam bek long em. Em i kirap givim biknem long Jehova na mekim gutpela tok long Em. Dispela em stretpela pasin long mekim, long wanem, God yet i bin givim dispela strong bilong oraitim em. Dispela man i brukim skru long lek bilong Bikpela Tisa na tenkyu long em. Em i pilim tru samting Jisas i bin mekim.

Tasol olsem wanem long arapela 9-pela man? Jisas i askim: ‘Inap 10-pela man i kamap orait, a? Ol arapela 9-pela man i stap we? Wanpela man tasol i kam bek bilong givim biknem long God, a?’

Yes, em i tru. Wanpela man tasol namel long dispela 10-pela man i bin givim biknem long God, na i kam bek long tenkyu long Jisas. Na dispela man i bilong Samaria, em man bilong narapela kantri. Ol arapela 9-pela man i no tenkyu long God, na ol i no tenkyu long Jisas.—Luk 17:​15-19.

Yu olsem husat namel long ol dispela man? Yumi laik bihainim pasin bilong dispela man Samaria, a?— Olsem na taim wanpela man i mekim gutpela pasin long yumi, yumi mas tingim long mekim wanem samting?— Yumi mas tenkyu long em. Planti taim ol man i save lusim tingting long tok tenkyu. Tasol em i gutpela pasin long mekim olsem. Taim yumi mekim olsem, God Jehova na Pikinini bilong em, Jisas, ol i amamas.

Sapos yu tingim bek ol samting i bin painim yu, bai yu inap tingim olsem ol man i bin mekim planti gutpela pasin bilong helpim yu. Olsem: Yu bin sik liklik long wanpela taim?— Ating yu no bin sik nogut tru olsem ol dispela 10-pela lepraman, tasol ating yu bin i gat kus o bel i pen. Olsem wanem? Wanpela i bin lukautim yu?— Ating ol i bin givim marasin long yu na mekim ol narapela samting bilong helpim yu. Yu bin amamas olsem ol i helpim yu long kamap orait?—

Man Samaria i tenkyu long Jisas long em i mekim em i kamap orait, na dispela i mekim Jisas i amamas. Yu ting mama o papa bilong yu bai amamas sapos yu tok tenkyu long ol taim ol i mekim ol samting bilong helpim yu?— Yes, ol bai amamas.

Sampela man i save mekim ol samting bilong helpim yu long olgeta de o olgeta wik. Ating em wok bilong ol long mekim ol dispela samting, na ating ol i amamas long mekim. Tasol yu inap lusim tingting long tok tenkyu. Ating tisa bilong yu i wok strong long helpim yu long kisim save. Dispela em wok bilong em. Tasol em bai amamas sapos yu tenkyu long em i helpim yu long kisim save.

Sampela taim ol man i save mekim ol liklik wok bilong helpim yu. Olsem wanem? Wanpela i bin helpim yu long karim wanpela samting i hevi? O givim plet kaikai long yu? I gutpela long tok tenkyu long ol dispela liklik samting tu.

Sapos yumi tingim long tok tenkyu long ol man long graun, ating bai yumi tingim tu long tenkyu long Papa bilong yumi long heven. Na i gat planti samting tru em yumi inap tenkyu long Jehova long en! Em i bin givim laip long yumi na olgeta gutpela samting i mekim na yumi amamas long laip bilong yumi. Olsem na i gat gutpela as tru long givim biknem long God long rot bilong mekim ol gutpela tok long em long olgeta de.