I Stap na Wok Bilong Jisas

Em i Sori Long Lepraman

JISAS wantaim 4-pela disaipel bilong em ol i go long ol taun long hap bilong Galili, na stori bilong ol gutpela samting Jisas i mekim i raun i go moa yet. Tok bilong em i go kamap long wanpela taun em wanpela lepraman i stap long en. Dokta Luk i stori long dispela lepraman na em i tok, “sik lepra i pulap tru long bodi bilong em.” Sik lepra inap bagarapim tru bodi bilong man. Dispela sik i “pulap tru” long bodi bilong dispela man, olsem na yumi save em i stap tarangu tru.

Taim Jisas i kamkamap long dispela taun, dispela lepraman i go klostu long em. Lo bilong God i tok, ol lepraman i mas singaut na tok olsem, “No klin, no klin!” bilong toksave long ol man olsem man i gat sik lepra em i kam, na bai ol i no ken i go klostu long em, nogut sik i kalap long ol. Nau dispela lepraman i kam long Jisas na i krai long em. Em i brukim skru na em i tokim Jisas: “Bikpela, sapos yu laik, yu inap long mekim mi kamap klin.”

Dispela man em i bilip tru long Jisas! Tasol skin bilong em i bagarap na i nogut tru! Bai Jisas i mekim wanem? Sapos yu bin i stap long dispela taim, bai yu mekim wanem? Jisas i sori tumas long em, na i putim han long em, na i tokim em, “Mi laik. Yu kamap klin.” Orait, nau tasol dispela sik lepra i lusim em i go pinis, na em i klin.

Man i gat bikpela sori olsem, yu laik bai em i stap king bilong yu? Pasin Jisas i mekim long dispela lepraman i strongim yumi long bilip tru olsem taim em i stap King na bosim Kingdom, bai tok profet bilong Baibel i kamap tru, em i tok: “Em i save sori long ol manmeri i no gat strong na i stap rabis.” Long dispela taim bihain, bai Jisas i mekim samting em i laik tru long mekim—bai em i helpim olgeta man i gat sik.

Taim Jisas i no helpim yet dispela lepraman, ol manmeri i wok long toktok long ol samting em i mekim. Nau Jisas i truim tok profet bilong Aisaia na em i tokim dispela man i kamap klin, “Yu no ken tokim wanpela man long dispela. Nogat.” Na bihain em i tokim em, “Yu go soim skin bilong yu long pris, na mekim ofa bilong skin i klin, olsem Moses i tok. Olsem na ol man i ken save, sik bilong yu i pinis.”

Tasol dispela man i amamas tru long dispela mirakel Jisas i wokim, olsem na em i no pasim maus. Em i go na autim dispela stori long olgeta hap. Planti manmeri i harim tok long dispela samting Jisas i bin mekim na ol i laik lukim Jisas. Olsem na Jisas i no inap i go moa insait long wanpela taun long ai bilong ol manmeri. Em i stap ausait tasol, long ol hap i no gat man. Na ol manmeri bilong olgeta hap ol i kam long em bilong harim tok bilong em na bai em i ken oraitim sik bilong ol. Luk 5:12-16; Mak 1:40-45; Matyu 8:2-4; Levitikas 13:45; 14:10-13; Sam 72:13; Aisaia 42:1, 2.

◆ Sik lepra inap mekim wanem long skin bilong man? Man i gat sik lepra em i mas singaut na tok wanem bilong toksave long ol man?

◆ Wanpela lepraman i krai long Jisas na em i tok wanem? Yumi tingim ol samting Jisas i mekim long dispela lepraman na dispela i lainim yumi long wanem samting?

◆ Lepraman i kamap klin pinis na olsem wanem em i no bihainim tok bilong Jisas? Olsem na wanem samting i kamap?