Amamas Wantaim Namba 82 Klas Bilong Skul Giliat

LONG Mas 1, 1987, long Jesi Siti long Amerika, bikpela ren i kam daun. Maski em i taim nogut, tasol bikpela lain Witnes Bilong Jehova ol i bung long Haus Kibung bilong ol long dispela hap. Siaman bilong dispela bung i tok: “Yumi no Kristen bilong gutpela taim tasol. Nogat. Yumi amamas long i kam bung long dispela taim.” Em i de bilong 24 sumatin bilong Namba 82 klas bilong Skul Giliat ol i winim skul. Siaman, em Theodore Jaracz bilong Lain Bilong Bosim Ol Witnes, em i lukim ol sumatin i amamas na pes bilong ol i lait, na em i tok: “Bel bilong ol i kirap long mekim wok na ol i amamas long ol samting i laik kamap. Baibel i tok, yumi mas ‘amamas wantaim ol man i amamas,’ olsem na yumi olgeta yumi amamas wantaim ol, a?” Olgeta 4,557 manmeri i kam bung ol i wanbel long dispela tok na ol i paitim han.

Namba wan man bilong mekim tok em John Barr, em tu bilong Lain Bilong Bosim Ol Witnes. Em i kamapim planti tok bilong Sam 104 na em i stori olsem Jehova i bin wokim ol samting i gat laip na ol samting i no gat laip, na Em i putim ol long ples bilong ol. Na em i tok: “Nau bai yupela i go long ples wok bilong yupela na yupela i mas tingting olsem: ‘Jehova yet i putim mi long dispela ples.’ Yu no ken lusim tingting long dispela samting.”

Namba tu man bilong mekim tok, em John Stuefloten bilong Komiti Bilong Ol Gaden Bilong Wastaua. Em i kirapim ol sumatin long tingim gen tok bilong Ol Provep, em i tok: “Wanpela provep i tok, ‘Sapos yu givim tok long man i gat gutpela tingting, bai tingting bilong em i kamap gutpela moa.”’ (Provep 9:9) Inap 5-pela mun ol i bin givim gutpela kaikai bilong spirit long ol sumatin, olsem na ating ol i pilim olsem ol i pulap pinis. Tasol Brata Stuefloten i tokim ol: “Yupela i kirap tasol long kisim save!” Em i tok, ol sumatin i mas wok strong yet long kisim save bambai tingting bilong ol na pasin marimari bilong ol i kamap gutpela moa na ol inap helpim gut ol narapela man.—Provep 3:27.

Brata George Gangas bilong Lain Bilong Bosim Ol Witnes i mekim namba tri tok na em i stori gut long pasin bilong i stap amamas. Em i tokim ol sumatin, ol i mekim wok bilong dispela God em i “as bilong amamas,” na em i tok: “Taim yupela i go mekim wok misineri long ol longwe ples, bai yupela i kisim bikpela amamas.” Olsem wanem bai ol i kisim amamas? Brata Gangas i tok: “Long wanem Jehova i salim yupela i go helpim ol man long lusim ol samting i kalabusim ol.”

Bihain George Couch bilong Komiti Bilong Betel long Bruklin, em i mekim tok. Em i stori long pasin bilong tingting planti. Em i tok, em i save sampela taim ol sumatin tu i bin tingting planti. Taim ol i kam long Skul Giliat, na ol i stap long Betel long Bruklin, na ol i autim tok long biktaun Nu Yok, ating i gat sampela samting i mekim ol i tingting planti. Na nau ol i tingting long ples ol bai i go mekim wok misineri long en. Em i tok, sapos yumi tingting planti liklik, em gutpela—dispela bai kirapim yumi long wok strong long mekim gut wok. Em i tok, ol sumatin i mas bilip tru long Jehova na wok strong long mekim gut wok misineri bilong ol long ol kantri ol i go long en.

Bihain wanpela tisa bilong Skul Giliat, em Jack Redford, em i kam antap long pletfom na mekim tok. Em i tok, ol dispela nupela misineri i mas was gut na ol i no ken kros kros na sutim tok long pasin bilong narapela man. Em i stori long sampela man long Baibel ol i no skelim gut pasin bilong man pastaim na ol i kirap kwik na sutim tok long em, na dispela i kamapim bikpela hevi. Em i kolim tok bilong Jisas, em i tok: “Yupela i no ken kotim ol arapela man. Nogut God i kotim yupela tu.” (Matyu 7:1) Ol misineri bilong Namba 82 klas ol i wokman bilong God bilong pasin sori, na ol i salim ol i go long ples wok bilong ol bilong mekim pasin sori long ol man; i no bilong kotim ol.

Narapela tisa bilong Skul Giliat, em Ulysses Glass, em i mekim tok na em i kolim wanpela tok bilong Baibel i gat gutpela save long en, i tok: “Ol man bilong ron strong ol i no save winim resis, na ol strongpela man i no save winim pait.” (Eklisiastis 9:11, NW ) Yumi no ken mekim wok long strong bilong yumi yet. Ol misineri i mas bilip na redi long karim hevi bambai ol inap mekim gut wok misineri bilong ol. Em i tokim ol sumatin bilong Namba 82 klas, em i amamas long gutpela pasin bilong ol, em ol i save stap gut long wok na ol i no save mekim nabaut. Dispela kain pasin bai helpim ol long mekim gut wok misineri bilong ol.

Presiden bilong Sosaiti Was Taua, em Frederick Franz, em i mekim laspela tok bilong moningtaim. Em i tok, taim Namba 82 klas i winim skul, dispela i kamapim long ples klia olsem bilip bilong ol man i bin kirapim dispela skul long taim nogut bilong Namba Tu Pait, bilip bilong ol i no lus nating. Em i stori long insait bilong dispela nem “Giliat” i olsem ‘bikpela tokaut.’ (Lukim Jenesis 31:43-53.) Ol misineri bilong Skul Giliat i stap gut long wok bilong ol, ol i mekim bikpela tokaut—ol i mekim bikpela wok bilong autim tok i tru. Na ol i save mekim gutpela pasin, na dispela i kamapim long ples klia olsem ol i bihainim tok i tru.

Bihain ol sumatin i kisim setifiket bilong ol na wanpela sumatin i kaunim pas Namba 82 klas i bin raitim bilong tok tenkyu. Baibel i tok, ‘Jehova i save givim planti gutpela samting long yumi.’ Long dispela pas ol sumatin i tingim dispela samting na ol i tok, “Mipela ol 24 sumatin i pilim olsem Jehova i bin givim planti samting tru long mipela, winim olgeta narapela man long graun!”—Provep 10:22.

Long belo bek ol i mekim sotpela Stadi Wastaua, na bihain ol sumatin i mekim sampela singsing samting na long pinis bilong dispela hap program ol i tok tenkyu long papamama bilong ol, em ol i no save tingim skin bilong ol yet—ol i larim pikinini bilong ol i go mekim wok misineri na ol i save helpim ol long mekim dispela wok.

Bihain i gat pilai bilong Baibel, em ol tok bilong en inap helpim tru ol brata sista long nau. Ol i wokim pilai pinis na bihain siaman, em Theodore Jaracz, em i mekim sampela liklik tok bilong pinisim program. Ol brata sista i kirap nogut long wanpela toksave Sosaiti i givim long ol long dispela taim! Brata Jaracz i tokaut olsem bai i gat nupela skul bilong lainim ol elda na wokman bilong kongrigesen, em ol i singel na ol inap i go helpim ol brata long ol narapela hap i sot long ol elda na wokman bilong kongrigesen.

Ol brata sista i amamas tru long harim dispela tok na ol i paitim strong han. Bihain ol i mekim singsing, na mekim beten bilong tok tenkyu long Jehova. Pinis nau na ol i lusim haus bung i go ausait. Liklik ren i wok long kam daun yet, tasol ol i no tingim. Bel bilong olgeta i amamas yet wantaim Namba 82 klas bilong Skul Giliat.

[Piksa long pes 24]

Ol misineri bilong Namba 82 Klas bilong Wastaua Baibel Skul Bilong Giliat

Nem bilong ol brata sista i stap daunbilo. Namba 1 lain ol i sanap paslain, na namba 4 lain i sanap baksait tru. Taim yu kaunim nem bilong ol, lukim ol pes kirap long han kais na i go long han sut.

(1) Gish, L.; Evans, E.; Dean, S.; Hanson, R.; Suomalainen, A.; DuBose, D.

(2) Wallenberg, P.; Wallenberg, M.; Bauer, O.; Suomalainen, H.; Taylor, B.; DiStefano, G.

(3) Scott, K.; Evans, M.; Taylor, A., Jr.; Lindby, J.; Hanson, C.; Holmkvist, M.

(4) Sampson, T.; Gish, T.; Ball, D.; DuBose, J.; Dean, T.; Scott, D.