Tok Piksa Bilong Ol Wokman Long Gaden Wain

Jisas i bin tokim ol man bilong Perea olsem, “planti man i stap fes ol bai stap las, na ol man i stap las ol bai stap fes.” (Matyu 19:30) Orait nau em i mekim wanpela tok piksa long ol wokman i wok long gaden wain:

“Kingdom bilong heven i olsem wanpela man, em wanpela papagraun. Long moningtaim tru em i go long haiarim ol wokman bilong wok long gaden wain bilong en. Em i stretim tok wantaim ol wokman long baim ol long wanpela koin denarius long dispela de, na em i salim ol i go long gaden wain bilong en. Em i go aut gen long namba 3 aua na em i lukim sampela arapela i sanap nating long maket. Na em i tokim ol: ‘Yupela tu, go long gaden wain, na bai mi givim yupela pe i stret.’ Olsem na ol i go. Na em i go aut gen long namba 6 aua na namba 9 aua na mekim wankain samting. Orait long namba 11 aua em i go aut gen na lukim ol arapela i sanap i stap, na em i tokim ol: ‘Bilong wanem yupela i sanap nating inap long de olgeta?’ Ol i tokim em: ‘Em long wanem i no gat man i haiarim mipela.’ Na em i tokim ol: ‘Yupela tu go long gaden wain.’”—Matyu 20:1-7.

Ol man husat i bin harim dispela tok piksa bilong Jisas long “Kingdom bilong heven” na “papagraun,” ol i ting dispela tok i makim God Jehova. Baibel i stori long Jehova olsem papa bilong gaden wain, gaden wain i makim lain Israel. (Song 80:8, 9; Aisaia 5:3, 4) Ol wokman bilong gaden wain i makim ol man husat i insait long kontrak bilong Lo. Tok bilong Jisas i no makim samting i bin kamap bipo, nogat. Em i stori long samting i kamap long taim bilong em.

Ol hetman bilong lotu na ol Farisi i gat wok long mekim wok bilong God long olgeta taim. Tasol ol i bin traim long giamanim Jisas na ol i givim askim long pasin bilong katim marit. Ol i olsem ol wokman husat i wok long gaden wain long de olgeta na ol i ting ol bai kisim bikpela pe, olsem pe bilong wanpela de.

Ol pris na ol narapela husat i joinim ol, ol i ting ol Juda i mekim wok bilong God ol i mas kisim liklik pe, olsem ol wokman i wok hap taim long gaden wain bilong God. Long tok piksa bilong Jisas, ol i olsem ol dispela man husat i kisim wok long “namba 3 aua” (9 klok long moning) o bihain long dispela taim, olsem namba 6, namba 9 na namba 11 aua (5 klok long apinun).

Ol hetman bilong lotu i tingim ol manmeri husat i bihainim Jisas olsem “ol i lain bilong bagarap tasol.” (Jon 7:49) Planti bilong ol lain i bihainim Jisas, ol i man bilong kisim pis o ol i mekim ol narapela wok mani. Olsem na long yia 29 C.E., “papa bilong gaden wain” i salim Jisas i go singautim ol man i gat pasin daun long mekim wok bilong God olsem kamap disaipel bilong Krais. Ol i “stap las” olsem Jisas i bin tok long en, olsem ol wokman i bin kirap wok long 5 klok long apinun.

Bilong pinisim tok piksa bilong em, Jisas i stori long ol samting bai kamap long pinis bilong dispela de: “Long apinun tru, papa bilong gaden wain i tokim bosboi bilong en: ‘Singautim ol wokman na givim pe bilong ol, stat long ol man i kam las i go inap long ol man i kam fes.’ Taim ol man bilong namba 11 aua i kam, olgeta wan wan i kisim wanpela denarius. Orait taim ol fes lain i kam, ol i ting ol bai kisim bikpela mani moa, tasol ol tu i kisim pe inap olsem wanpela denarius. Taim ol i kisim pe ol i kirap toktok planti long dispela papagraun. Ol i tok: ‘Ol dispela man i kam las ol i wok wanpela aua tasol na yu givim wankain pe long ol olsem yu givim long mipela husat i bin wok hat long traipela san inap de olgeta!’ Papa bilong gaden i bekim tok long wanpela bilong ol dispela wokman olsem: ‘Pren, mi no mekim rong long yu. Yumi bin pasim tok long pe inap olsem wanpela denarius, o nogat? Kisim samting bilong yu na go. Wankain samting mi givim long yupela mi laik givim long ol dispela man i kam las. Olsem wanem? Ating i no stret long mi mekim samting mi laik mekim long mani bilong mi yet, a? O ating yu bel nogut, long wanem, mi gutpela man, a?’ Long dispela pasin ol man i stap las bai ol i stap fes, na ol man i stap fes bai ol i stap las.”—Matyu 20:8-16.

Ating ol disaipel i tingting planti long olsem wanem dispela tok piksa bilong Jisas bai kamap tru. Ol hetman bilong lotu Juda i ting ol i stap “fes,” tasol olsem wanem ol i stap “las”? Na olsem wanem ol disaipel bilong Jisas bai stap “fes”?

Ol Farisi na ol narapela i ting ol disaipel bilong Jisas ol i stap “las,” tasol nau ol i stap “fes” long kisim pe. Long rot bilong dai bilong Jisas, em bai bagarapim Jerusalem bilong graun, na God bai makim wanpela nupela lain em “lain Israel bilong God.” (Galesia 6:16; Matyu 23:38) Jon Bilong Baptais i mekim dispela tok taim em i tokaut long baptais bilong holi spirit. Ol man husat i bin stap “las” ol bai fes lain long kisim dispela baptais na stap olsem witnes bilong Jisas na autim tok “i go inap long olgeta hap bilong graun.” (Aposel 1:5, 8; Matyu 3:11) Ol disaipel i kliagut long bikpela senis Jisas i toktok long en, long wanem, ating ol i lukim ol hetman bilong lotu i belhat bikos ol i stap “las.”