Pas i Kam Long Gavening Bodi
Yes ol wanbilip:
Planti taim Baibel i kamapim stori bilong ol man. Na planti bilong ol em ol bilipman na bilipmeri husat i bungim ol hevi wankain olsem bilong yumi. Ol i gat laik na tingting “wankain olsem yumi.” (Jems 5:17) Sampela i bin karim ol hevi na dispela i mekim ol i tingting planti. Na sampela i bel hevi tru long ol wanfamili na wanbilip bilong ol. Na planti i bel hevi long ol rong ol i bin mekim.
Olsem wanem? Ol dispela manmeri i lusim Jehova na i no tingim em moa? Nogat. Planti i gat wankain tingting olsem man bilong raitim song. Em i beten olsem: “Mi lusim gutpela rot pinis olsem sipsip i lus. Olsem na yu mas kam painim mi, wokman bilong yu. Mi no save lusim tingting long lo bilong yu.” (Song 119:176) Sampela taim yu gat kain tingting olsem?
Jehova i no save lusim tingting long ol wokman bilong em husat i lusim lain sipsip bilong em, nogat. Em i singautim ol long kam bek long em, na planti taim em i mekim olsem long rot bilong ol wanbilip. Tingim, Jehova i helpim wokman bilong em Jop taim ol hevi i painim em. Jop i lusim planti kago bilong em, ol pikinini bilong em i dai, na em i kisim bikpela sik. Na tu, ol poroman bilong em i mekim ol tok bilong bagarapim bel bilong em. Maski sampela taim Jop i no holim stretpela tingting long ol samting i painim em, em i no givim baksait long Jehova. (Jop 1:22; 2:10) Olsem wanem Jehova i helpim Jop long karim ol hevi bilong em?
Wanpela rot Jehova i helpim Jop em long rot bilong wanbilip bilong em Elihu. Taim Jop i kamapim ol hevi bilong em long Elihu, em i pilim tru hevi bilong Jop. Elihu i mekim wanem tok long Jop? Em i sutim tok long Jop na mekim ol tok bilong soim olsem Jop i gat asua? Yu ting Elihu i pilim olsem em i gutpela moa winim Jop? Nogat tru! Spirit bilong God i kirapim Elihu na em i tok: “Long ai bilong God mitupela i wankain tasol. Em i bin kisim graun na wokim mi, wankain olsem em i bin wokim yu. Yu no ken pret long mi. Mi no laik putim bikpela hevi long yu na daunim yu.” (Jop 33:6, 7) Pasin laikim i kirapim Elihu long givim ol tok kaunsel, na kamapim ol tok bilong mekim gut bel bilong Jop.
Pasin laikim i kirapim mipela long redim dispela buklet bilong helpim na strongim yupela. Pastaim, mipela i bin toktok wantaim sampela man husat i lusim Jehova na kisim tingting bilong ol long ol samting i mekim na ol i lusim stretpela rot. (Sindaun 18:13) Bihain, mipela i prea na skelim ol tok bilong Baibel long hau Jehova i helpim ol wokman bilong em long bipo long karim ol wankain hevi olsem bilong yumi. Na nau, mipela i bungim ol dispela stori bilong Baibel wantaim ol ekspiriens bilong nau na kamapim tok bilong dispela buklet. Mipela i laik singautim yupela long ritim na skelim gut ol tok bilong en. Mipela i laik bai yupela i save olsem mipela i laikim na tingim tru yupela.
Gavening Bodi Bilong Ol Witnes Bilong Jehova