Olsem Wanem Yumi Ken Stretim Ol Hevi

I NO gat wanpela man i bin karim ol bikpela hevi olsem Jop. Insait long liklik hap taim tasol, olgeta mani kago samting bilong em i lus, na ol pikinini bilong em i dai, na em i kisim wanpela sik nogut i givim bikpela pen long em. Ol pren na famili bilong em i givim baksait long em, na meri bilong em i tokim em long ‘tok nogut long God na dai’!​—⁠Jop 2:9; 19:​13, 14.

Tasol Jop i nambawan gutpela piksa bilong strongim ol man i gat kain hevi olsem em. Em i winim ol hevi na ol gutpela samting i painim em bihain. Dispela i soim yumi, sapos yumi givim bel tru long God na sanap strong, maski wanem hevi i painim yumi, na i no olsem yumi tingim skin bilong yumi na yumi mekim, em nau, bel bilong Jehova bai amamas.​—⁠Jop, sapta 1, 2; 42:​10-17; Sindaun 27:⁠11.

Dispela stori bilong Baibel i gat planti gutpela tok bilong skulim yumi long pasin bilong stretim ol hevi. Em i soim yumi long pasin bilong givim tok long man i gat hevi​—⁠na long pasin yumi no ken mekim bilong givim tok long man. Na samting i painim Jop inap helpim yumi long bihainim stretpela pasin long taim hevi i bagarapim yumi.

Pasin Yumi No Ken Mekim

Long sampela lain i gat wanpela tok olsem ‘man bilong strongim bel bilong Jop,’ na dispela i makim man i no save strongim tru bel bilong wanpela man i gat hevi​—⁠tok em i mekim i bagarapim moa yet bel bilong man. Tasol maski 3-pela pren bilong Jop i no bin strongim gut Jop, yumi no ken ting olsem tingting nogut i kirapim ol long mekim olsem. Ating ol i laik helpim Jop, tasol ol i no gat stretpela save. Olsem wanem ol i no bin helpim gut Jop? Satan i gat strongpela laik olsem Jop i mas lusim Jehova, orait olsem wanem Satan i mekim wok long rot bilong ol bambai em i ken bagarapim bilip bilong Jop?

Ol tok ol i givim long Jop bilong stretim em i kamap long wanpela tingting kranki bilong ol, olsem: Ol i ting ol man i mekim rong ol tasol i kisim pen na hevi. Long namba wan tok bilong em, Elifas i tok: “Jop, yu inap tingim wanpela man i bin bihainim stretpela pasin na i no gat rong, em i bin bagarap na i dai? Ating nogat. Tasol mi bin lukim ol man i save mekim planti pasin nogut, na bihain planti hevi na trabel i kamap long ol. I olsem man i planim gutpela kaikai long gaden, i kisim gutpela kaikai. Na man i planim kaikai nogut, i kisim kaikai nogut.” (Jop 4:​7, 8) Elifas i gat tingting kranki na em i bilip olsem hevi i no save painim ol man i no gat asua long wanpela rong. Em i ting Jop i bin mekim rong long God, na long dispela as em i gat bikpela hevi na pen.a Bildat na Sofar tu i tok strong long Jop i mas tanim bel.​—⁠Jop 8:​5, 6; 11:​13-15.

Tripela pren bilong Jop i kamapim tingting bilong ol yet​—⁠ol i no kamapim gutpela save na tingting bilong Jehova, na dispela tu i bagarapim bel bilong Jop. Elifas i bin tok, ‘God i no bilip long ol wokboi bilong em,’ na Jehova i no tingim Jop em i stretpela man o nogat. (Jop 4:18; 22:​2, 3) Dispela tok i no stret liklik na i bagarapim tru bel bilong Jop! Elifas na ol poroman bilong em i tok bilas long God, olsem na yumi no ken kirap nogut long Jehova i stretim ol. Em i tok: “Yupela i no bin autim tok tru long pasin bilong mi.” (Jop 42:⁠7) Tasol bihain ol i kamapim sampela tingting nogut moa yet.

Bihain Elifas i sutim sampela tok moa long Jop​—⁠i olsem em i kotim em. Em i no inap subim Jop long tokaut olsem em i mekim rong, olsem na em i tokaut long sampela sin em i ting Jop i bin mekim. Elifas i tok: “Yu bin mekim kain kain pasin nogut, na ol sin bilong yu i planti tru. Na long dispela as tasol God i kotim yu. Yu bin mekim pasin olsem. Taim ol wantok bilong yu i bin dinau long yu, na yu bin kisim ol samting bilong ol olsem mak bilong ol i mas bekim dinau, yu bin holimpas ol dispela samting, na yu no bin givim bek long ol. Na sampela i bin givim klos bilong ol long yu, tasol yu no bin givim bek, na nau ol i no gat klos bilong karamapim skin bilong ol. Yu no bin givim wara long ol man, nek bilong ol i drai. Na yu no bin givim kaikai long ol man i hangre.” (Jop 22:​5-7) Olgeta dispela tok em i bin sutim long Jop ol i no stret liklik. Jehova yet i tok Jop em i “gutpela man tru na i no gat asua.”​—⁠Jop 1:⁠8.

Jop i mekim wanem taim ol i sutim tok long em olsem em i no stap gut long God? Tru yumi save, dispela tok i mekim na em i bel hevi, tasol em i strong long kamapim ples klia olsem ol dispela tok ol i sutim long em i no stret. Em i tingting strong tumas long kamapim stretpela pasin bilong em, na i olsem em i tok em asua bilong Jehova na ol dispela hevi i painim em. (Jop 6:4; 9:​16-18; 16:​11, 12) Em i no tingting long kamapim stretpela pasin bilong Jehova, na ol i tok pait i go i kam olsem Jop i stretpela man o nogat. Ol dispela toktok nabaut bilong stretim Jop i ken skulim ol Kristen long wanem samting?

1. Kristen i gat pasin sori i no ken ting sapos wanpela brata i gat hevi em asua bilong em yet. Sapos yu sutim tok long man long ol rong em i mekim bipo​—⁠em i mekim tru o nogat​—⁠dispela inap bagarapim tru man i wok strong long winim hevi bilong em. Yumi mas strongim bel bilong man i bel hevi; yumi no ken krosim em. (1 Tesalonaika 5:14) Jehova i laik ol wasman i mas stap olsem “ples hait . . . long taim bilong bikpela win”; em i no laik ol i mekim pasin olsem Elifas, na Bildat, na Sofar.​—⁠Aisaia 32:​2; Jop 16:⁠2.

2. Yumi no ken kotim man sapos yumi no save tru em i bin mekim rong. Sapos yumi harim tok win olsem wanpela man i mekim rong o yumi ting em i bin mekim rong, na yumi no save tru em i mekim dispela rong o nogat, yumi no ken givim tok bilong stretim em, olsem Elifas i bin mekim. Sapos wanpela elda i kotim nating wanpela brata, dispela inap mekim na ol brata i no bilip moa long dispela elda na brata bai bel hevi. Jop i pilim olsem wanem taim em i harim ol dispela tok ol i sutim long em? Em i kamapim bel hevi bilong em na i singaut: “Olaboi, ating yu hapman tru bilong helpim ol man i no gat strong.” (Jop 26:⁠2) Wasman i tingim tru brata, em bai ‘apim han i hangamap i stap nating,’ bai em i no givim sampela hevi moa long em.​—⁠Hibru 12:⁠12.

3. Ol lo bilong Baibel i as bilong tok bilong stretim man​—⁠no ken stretim man long tingting bilong yu yet. Tok ol pren bilong Jop i mekim i no stret na i bagarapim bel bilong Jop. Ol i no helpim Jop long go klostu moa long Jehova​—⁠ol i mekim na Jop i bilip olsem Papa bilong em long heven i stap longwe long em. (Jop 19:​2, 6, 8) Tasol sapos yu mekim gutpela wok long Baibel, dispela inap stretim hevi na givim strong long man, na mekim gut bel bilong em.​—⁠Luk 24:32; Rom 15:4; 2 Timoti 3:​16; 4:⁠2.

Buk Jop i helpim ol Kristen long save wanem kain pasin ol i no ken mekim taim ol i givim tok long man, na i skulim ol tu long gutpela pasin bilong givim tok long man.

Gutpela Pasin Bilong Givim Tok

Tok na pasin Elihu i mekim i narapela kain tru long 3-pela pren bilong Jop. Em i kolim nem bilong Jop na i toktok long em olsem em i wanpela pren​—⁠i no olsem jas bilong em. Em i tok: “Jop, harim. Nau mi laik toktok long yu, na mi laik bai yu putim yau gut long olgeta tok bilong mi. Long ai bilong God mitupela i wankain tasol. Em i bin kisim graun na wokim mi, wankain olsem em i bin wokim yu.” (Jop 33:​1, 6) Na wantu Elihu i tok amamas long gutpela pasin bilong Jop. Em i tokim Jop: “Yu no gat asua.” (Jop 33:32) Long pasin isi Elihu i givim tok long Jop, tasol tok bilong em i helpim Jop long narapela samting tu.

Elihu i wetim ol narapela i pinisim tok bilong ol pastaim na dispela i helpim em long save gut long ol bikpela tok i bin kamap, na bihain em i givim sampela tok long Jop. Em i bilip olsem Jop i stretpela man na Jehova i no ken givim strafe long em, olsem na Elihu i tok: “God I Gat Olgeta Strong i no inap mekim pasin nogut. Nogat tru. Em i save lukautim gut ol stretpela manmeri.”​—⁠Jop 34:10; 36:⁠7.

Olsem wanem? Stretpela pasin bilong Jop em i nambawan bikpela samting? Elihu i helpim Jop long pilim tingting kranki bilong em. Em i tok: “Jop, yu bin tok, ‘Pasin bilong mi i stret na i winim pasin bilong God.’ Yu lukluk i go antap long skai na lukim ol klaut. Ol i stap antap tru.” (Jop 35:​2, 5) Olsem ol klaut i antap tru, winim man, olsem tasol pasin bilong Jehova i winim pasin bilong yumi. Yumi no ken kotim Jehova long ol samting em i mekim. Olsem na Elihu i tok: “Ol manmeri i save pret long em. Na em i no save putim yau long ol man i ting ol i gat planti save.”​—⁠Jop 37:24; Aisaia 55:⁠9.

Gutpela tok Elihu i givim long Jop i redim tingting bilong Jop bilong kisim sampela tok moa Jehova yet i givim long em. Long Jop sapta 37, Elihu i stori long “ol kain kain strongpela wok God i save mekim,” na dispela tok i klostu wankain olsem tok Jehova yet i givim long Jop long sapta 38 i go inap long sapta 41. Elihu i gat wankain tingting olsem Jehova. (Jop 37:14) Olsem wanem ol Kristen i ken bihainim gutpela pasin bilong Elihu?

Olsem Elihu i bin mekim, ol wasman tu i mas mekim pasin sori na gutpela pasin; ol i mas save ol tu i sinman. Paslain long givim tok long man ol i mas putim gut yau long kisim save long ol samting i bin kamap na ol bai save gut long as bilong hevi. (Sindaun 18:13) Na taim ol i mekim wok long Baibel na ol nius na buk bilong Baibel, ol bai kamapim tingting bilong Jehova i olsem nambawan bikpela samting.​—⁠Rom 3:⁠4.

Ol tok long hap bilong Jop inap lainim ol elda long gutpela pasin bilong givim tok long man, na i helpim yumi tu long kisim stretpela tingting long karim ol hevi.

Samting Yumi No Ken Mekim Taim Hevi i Painim Yumi

Bel bilong Jop i bagarap stret long hevi na pen em i kisim, na em i bel nogut long tok bilong ol pren giaman bilong em, olsem na tingting bilong Jop i no stap isi. Em i tok: “God i no laik bagarapim dispela nait mama . . . i karim mi long en. Mi les pinis long i stap laip.” (Jop 3:3; 10:⁠1) Em i no save Satan i as bilong ol hevi bilong em​—⁠em i ting God i givim ol hevi na pen long em. Em i pilim olsem i no stret em i mas karim hevi na pen​—⁠em wanpela stretpela man. (Jop 23:​10, 11; 27:2; 30:​20, 21) Dispela tingting kranki i mekim na Jop i no moa tingim gut ol samting na em i sutim tok long God long ol samting em i bin mekim long ol man. Jehova i askim em: “Yu bin tok strong olsem, ol pasin bilong yu i stret. Tasol bilong wanem yu bin kotim mi, na tok mi save mekim pasin i no stret?”​—⁠Jop 40:⁠8.

Ating taim hevi i painim yumi, wantu bai yumi ting olsem yumi no gat asua na ol samting nogut i painim yumi. Jop tu i bin ting olsem. Ating bai yumi tok: ‘Bilong wanem mi mas karim pen na hevi, na ol narapela man nogat? Bilong wanem sampela man​—⁠ol i no gutpela man olsem mi​—⁠ol i amamas na ol i no gat planti hevi?’ Sapos yumi tingim strong Tok Bilong God bai yumi inap sakim dispela tingting nogut.

Yumi save long bikpela tok i bin kamap, tasol Jop nogat. Yumi save Satan “i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:⁠8) Buk Jop i kamapim olsem Satan i gat strongpela laik long yumi lusim God, olsem na em i givim ol hevi long yumi. Em i wok strong long kamapim olsem yumi stap gut long God long gutpela taim tasol, na long taim nogut, nogat. (Jop 1:​9-11; 2:​3-5) Olsem wanem? Bai yumi strongim bel na stap gut long wok king bilong Jehova na dispela bai kamapim klia olsem Satan em i man bilong giaman?

Samting i painim Jisas na planti narapela gutpela wokman bilong Jehova, i soim yumi olsem yumi olgeta i mas karim sampela hevi long nau. Jisas i tok ol disaipel bilong em i mas redi long “karim diwai” taim ol i laik bihainim em. (Luk 9:23) Ating “diwai” yumi yet i mas karim i wanpela o sampela hevi olsem Jop i bin karim​—⁠sik, wanpela long famili i dai, bel hevi, hevi long mani, ol man i no bilip ol i birua long yumi. Tasol maski wanem hevi i painim yumi, yumi mas tingim ol gutpela samting dispela i kamapim. Yumi ken ting, long rot bilong ol samting i painim yumi, yumi ken kamapim long ples klia olsem yumi redi long sanap strong na karim hevi na stap gut long Jehova maski wanem hevi i painim yumi.​—⁠Jems 1:​2, 3.

Ol aposel bilong Jisas i bin ting olsem. Bihain liklik long de Pentikos ol man i wipim ol, long wanem, ol i autim tok long Jisas. Tasol ol i no bel hevi long dispela, nogat; ol i “amamas” na ol i wokabaut i go. Ol i no amamas long hevi ol i bin kisim, nogat; “ol i amamas long God i ting ol inap long kisim sem long nem bilong Jisas.”​—⁠Aposel 5:​40, 41.

Yumi save, i no olgeta hevi i painim yumi long wanem yumi mekim wok bilong Jehova. Sampela taim em asua bilong yumi yet na ol hevi i painim yumi​—⁠o em i hap asua bilong yumi. O ating i no asua bilong yumi na wanpela hevi i bin daunim yumi long samting bilong spirit. Maski hevi i kamap long wanem wanem rot, sapos yumi gat pasin daun olsem Jop bai yumi inap save long as bilong hevi. Jop i tokim Jehova: “Mi bin mekim planti kranki toktok long ol samting mi no klia olgeta long as bilong en.” (Jop 42:⁠3) Sapos man i gat dispela kain tingting long ol rong em i bin mekim, ating em i no inap mekim wankain rong gen long bihain. I olsem Sindaun 22:3 i tok: “Man i gat gutpela tingting, em i save olsem, hevi i laik kamap long em na em i abrusim.”

Na bikpela samting, buk Jop i soim yumi ol hevi bilong yumi bai pinis. Baibel i tok: “Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi, na oltaim em i save marimari long yumi.” (Jems 5:11) Yumi save Jehova bai blesim ol wokman bilong em long nau ol i stap gut long em.

Na yumi wetim taim “ol dispela samting bilong bipo”​—⁠em olgeta hevi​—⁠bai pinis olgeta. (KTH 21:⁠4) Inap long dispela taim i kamap, buk Jop bai helpim yumi long stretim ol hevi long gutpela tingting na save na pasin bilong strongim bel.

[Ol Futnot]

[Piksa long pes 28]

“Lukim ol klaut, ol i stap antap tru. Olsem tasol, God tu i stap antap tru.” Long dispela tok Elihu i helpim Jop long save olsem tingting bilong God i winim tingting bilong man