BEL HEVI NA TINGTING PLANTI “Kain Kain Hevi i Banisim Mipela”

OLGETA man i save bel hevi na tingting planti, na dispela inap kamap long lain bilong God tu. Man bilong raitim song i tok: “Mi bel hevi na mi gat planti tingting long ol samting.” (Song 94:19) Na tu, Jisas i tok, klostu long taim bilong pinis “ol wari bilong laip” bai mekim na i hatwok long yumi mekim laik bilong Jehova. (Luk 21:34) Olsem wanem? Yu tingting planti long hevi bilong mani, famili, na helt? Olsem wanem Jehova inap helpim yu long karim ol dispela hevi?

“Strong i Winim Strong Bilong Yumi Ol Man”

Yumi yet i no inap long daunim pasin bilong bel hevi na tingting planti. Aposel Pol i tok: “Kain kain hevi i banisim mipela, tasol ol i no pasim mipela olgeta. Mipela i no kliagut long mipela bai mekim wanem, tasol i no olsem mipela i no gat rot mipela i ken bihainim. . . . Bel hevi i daunim tru mipela, tasol mipela i no bagarap olgeta.” Wanem samting i helpim yumi long sanap strong na karim hevi? Aposel Pol i tok: “Mipela i bin kisim strong i winim strong bilong yumi ol man,” em strong i kam long Jehova, em God i Gat Olgeta Strong.​—2 Korin 4:7-9.

Tingim bek olsem wanem yu bin kisim “strong i winim strong bilong yumi ol man.” Yu inap tingim wanpela tok yu bin harim na dispela i helpim yu long tingim pasin bilong Jehova long tingim na lukautim ol man i lotuim em? Olsem wanem? Bilip bilong yu long ol tok promis bilong Jehova i kamap strong taim yu skulim ol narapela long tok promis bilong Paradais? Taim yumi go long ol miting Kristen na strongim bilip bilong narapela, dispela i helpim yumi long daunim pasin bilong tingting planti, na long dispela rot bel bilong yumi i stap isi na yumi amamas long mekim wok bilong Jehova.

“Traim na Lukim Olsem Jehova i Gutpela Tru”

Sampela taim, bai yu pilim olsem i gat planti wok long mekim. Olsem, Jehova i tokim yumi long painim Kingdom pastaim, na wok strong long bihainim pasin bilong redim ol miting na mekim Baibel stadi samting. (Matyu 6:33; Luk 13:24) Tasol olsem wanem? Pasin birua, sik, o sampela hevi long famili i pasim yu long mekim wok bilong God? O wok mani bilong yu i kisim bikpela taim na strong bilong yu, na yu no bung moa wantaim kongrigesen? I gat planti wok em yu mas mekim, na yu nogat taim na strong na dispela i daunim yu. Na ating sampela taim yu pilim olsem Jehova i laik bai yu mas mekim planti wok.

Jehova i save olsem yumi inap long mekim ol dispela wok, tasol em i save tu olsem yumi inap mekim ol wok long skel bilong yumi wan wan. Na tu, em i save olsem sampela haptaim i mas lus na bai yumi inap daunim pasin bilong bel hevi na tingting planti.​—Song 103:13, 14.

Tingim pasin bilong Jehova long lukautim profet Elaija. Taim Elaija i bel hevi na pret, na em i ranawe i go long ples drai, Jehova i no bin givim tok long stretim Elaija na salim em i go bek long asainmen bilong em, nogat. Tupela taim Jehova i salim wanpela ensel i go bilong kirapim Elaija na givim kaikai long em. Tasol bihain long 40 de, Elaija i tingting planti yet na em i pret. Jehova i mekim wanem samting moa bilong strongim Elaija? Namba 1, Jehova i kamapim klia olsem em inap long lukautim Elaija. Namba 2, Jehova “i toktok isi tru” long Elaija bilong mekim gut bel bilong en. Na namba 3, Jehova i tokim Elaija olsem planti tausen manmeri i stap gut long Em na i lotuim em. I no longtaim na Elaija i mekim wok olsem wanpela strongpela profet gen. (1 King 19:1-19) Yumi kisim wanem skul long stori bilong Elaija? Taim Elaija i bel hevi na tingting planti, Jehova i no les kwik na em i mekim pasin sori long Elaija. Jehova i no save senis. Olsem na yumi ken bilip tru olsem Em bai lukautim na strongim yumi long nau wankain olsem em i bin mekim long Elaija.

Taim yu laik mekim ol wok bilong Jehova, skelim gut ol samting yu inap long mekim. No ken skelim ol wok bilong yu long nau wantaim ol wok yu mekim long bipo. Yumi ken tok piksa olsem: Sapos wanpela man bilong ran long resis i no trening inap sampela mun o yia, orait em i mas lusim sampela haptaim long trening gen na bai em inap long ran. Dispela man i mas putim ol liklik mak, na wok strong long winim ol mak em i putim. Ol Kristen i olsem dispela man bilong ran long resis. Ol i mekim trening bilong ol i ken winim resis. (1 Korin 9:24-27) Olsem wanem? Yu putim wanpela mak long sait bilong wok lotu em yu inap long winim? Olsem, yu ken putim mak long go long olgeta miting bilong kongrigesen. Long rot bilong beten, askim Jehova long helpim yu long winim dispela mak. Taim yu wok long pas gut wantaim God, i olsem yu “traim na lukim olsem Jehova i gutpela tru.” (Song 34:8, NW) Tingim, olgeta samting yu mekim bilong soim olsem yu laikim Jehova, maski em i liklik samting, Jehova i tingim tru gutpela pasin bilong yu na em i amamas.​—Luk 21:1-4.

“Kibung i Strongim Mi Tru”

Olsem wanem Jehova i givim nupela strong long June long go bek long em? June i tok: “Oltaim mi beten long Jehova na askim em long helpim mi. Bihain, tambu pikinini meri bilong mi i tokim mi olsem i gat wanpela kibung long taun mipela i stap long en. Olsem na mi go long wanpela de bilong dispela kibung. Mi amamas tru long bung gen wantaim lain bilong Jehova! Dispela kibung i strongim mi tru. Nau mi amamas olsem mi inap long mekim wok bilong Jehova gen. Na mi pilim olsem laip bilong mi i gat as bilong en. Nau mi luksave olsem em i bikpela samting long pas gut wantaim ol bratasista bilong mi na kisim helpim long ol. Mi amamas olsem mi bin kam bek long Jehova.”