Etpela i Abrusim Bagarap

Noa, famili bilong em, na ol animal i go insait long sip. Jehova i pasim dua, na ren i stat long pundaun. Bikpela ren tru i pundaun na sip i stat long flot. I no longtaim, na wara i karamapim graun olgeta. Olgeta man nogut ausait long sip i dai. Tasol Noa na famili bilong em i seif insait long sip. Yu inap piksaim amamas bilong ol bikos ol i bihainim tok bilong Jehova?

Ren i pundaun insait long 40 de na 40 nait, na bihain em i stop. Isi isi wara i go daun. Na nau sip i pas antap long ol maunten. Tasol wara i stap yet long olgeta hap, so Noa na famili bilong em i no hariap long go ausait long sip.

Isi isi wara i drai. Noa na famili bilong em i stap insait long sip winim wanpela yia. Bihain Jehova i tokim ol olsem ol i ken go ausait long sip na stap long graun i no gat ol man nogut long en. Ol i tenkyu olsem Jehova i seivim ol, na ol i soim long rot bilong ofa ol i mekim long Jehova.

Jehova i amamas long dispela ofa. Em i promis olsem em bai i no inap bagarapim gen olgeta samting long graun long rot bilong tait wara. Em i kamapim fes renbo long skai olsem sain bilong dispela promis. Yu bin lukim wanpela renbo?

Bihain Jehova i tokim Noa na famili bilong em long kamapim ol pikinini na i go sindaun long olgeta hap bilong graun.