Tok Promis Long Jehova

Klostu tupela mun bihain long lain Israel i lusim Isip, ol i kamap long Maunten Sainai na wokim kem. Jehova i singaut long Moses, husat i go antap long maunten, na tokim em: ‘Mi bin seivim lain Israel. Sapos ol i bihainim ol lo bilong mi, ol bai kamap spesel lain bilong mi.’ Moses i go daun bek na tokim ol Israel long tok bilong Jehova. Ol i bekim olsem wanem? Ol i tok: ‘Mipela bai mekim olgeta samting Jehova i tokim mipela long mekim.’

Moses i go antap gen long maunten. Long dispela hap, Jehova i tok: ‘Insait long tripela de bai mi toktok long yu. Tokim ol manmeri long ol i no ken kam antap long Maunten Sainai.’ Moses i go daun na tokim ol Israel long redi long harim tok bilong Jehova.

Tripela de bihain, ol Israel i lukim laitning na bikpela klaut i tudak antap long maunten. Na tu, ol i harim tanda i pairap na saun bilong kom bilong pikinini sipsip. Bihain Jehova i kam daun long maunten long paia. Ol Israel i pret nogut tru na ol i guria. Maunten olgeta i guria nogut tru na smok i karamapim. Saun bilong kom bilong sipsip man i wok long go bikpela moa. Na God i tok: ‘Mi Jehova. Yupela i no ken lotuim ol arapela god.’

Moses i go bek antap long maunten, na Jehova i givim em ol lo bilong ol manmeri long hau ol i mas lotuim Em na ol samting ol i mas mekim. Moses i raitim ol dispela lo na bihain em i ritim long ol Israel. Ol i tok promis: ‘Mipela bai mekim olgeta samting Jehova i tokim mipela long mekim.’ Yes, ol i mekim promis long God. Tasol yu ting ol bai bihainim dispela promis?