Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • lfb lesen 67 p. 158-159
  • Banis Bilong Jerusalem

No gat vidio bilong dispela seksen.

Sori, popaia kamap long lodim vidio.

  • Banis Bilong Jerusalem
  • Ol Lesen Yu Inap Lainim Long Baibel
  • Wankain Infomesen
  • Banis Bilong Jerusalem
    Baibel Stori Buk Bilong Mi
  • Sampela Bikpela Tok Bilong Buk Nehemia
    Wastaua i Tokaut Long Kingdom Bilong Jehova—2006
  • “Mekim Gutpela Pasin na Bai Yu Daunim Pasin Nogut”
    Wastaua i Tokaut Long Kingdom Bilong Jehova—2007
  • ‘God, Tingim Olgeta Pasin Mi Bin Mekim na Mekim Gut Long Mi’
    Wastaua i Tokaut Long Kingdom Bilong Jehova—2011
Lukim Moa
Ol Lesen Yu Inap Lainim Long Baibel
lfb lesen 67 p. 158-159
Nehemia i dairektim wok bilong bildim gen banis bilong Jerusalem na putim ol gad

LESEN 67

Banis Bilong Jerusalem

Yumi laik stori long ol samting i bin kamap sampela yia i go pinis. Nehemia, wokman bilong King Artaserksis, em wanpela Israel i stap long taun Susan long Persia. Brata bilong Nehemia i lusim Juda na kam wantaim nius nogut: ‘Ol manmeri i bin go bek long Jerusalem ol i no seif. Ol Babilon i bagarapim banis na ol geit bilong Jerusalem na ol i no wokim gen.’ Nehemia i bel hevi tru. Em i laik go long Jerusalem long helpim ol, so em i beten long God olsem king i mas larim em i go.

Bihain, king i lukim olsem Nehemia i bel hevi. Em i tok: ‘Mi no bin lukim yu olsem. Wai na yu no amamas?’ Nehemia i tok: ‘Mi bel hevi, bikos taun bilong mi, Jerusalem, i bagarap i stap.’ Na king i askim: ‘Yu laik bai mi mekim wanem long helpim yu?’ Kwiktaim, Nehemia i beten long tingting. Bihain em i tok: ‘Plis, larim mi go long Jerusalem long wokim gen banis.’ King Artaserksis i tokim Nehemia olsem em i ken go, na king i mekim olgeta samting bambai em i go seif long dispela wokabaut bilong em. Na tu, em i makim Nehemia olsem gavana bilong Juda, na givim em ol diwai bilong wokim ol geit bilong taun.

Taim Nehemia i kamap long Jerusalem, em i raun na sekim banis bilong taun. Bihain em i bungim ol pris na ol ofisa na tokim ol: ‘Yumi gat bikpela hevi. Yumi mas kirap long wok.’ Ol manmeri i wanbel, na ol i wokim gen banis.

Tasol sampela birua bilong ol Israel i tok bilas long ol: ‘Wanpela foks inap brukim banis yupela i wokim.’ Ol wokman i no bisi long tok bilas bilong ol na wokim yet banis. Banis i wok long go antap na i kamap strong moa.

Ol birua i plen long kam long kain kain rot na pait long Jerusalem taim ol i no redi. Ol Juda i harim stori long dispela plen, na ol i pret. Tasol Nehemia i tokim ol: ‘No ken pret. Jehova i stap wantaim yumi.’ Nehemia i putim ol gad long protektim ol wokman, na ol birua i no inap pait long ol.

Insait long 52 de, ol i pinisim wok bilong bildim banis na ol geit. Nehemia i bringim olgeta Livai i kam long Jerusalem bilong dediketim banis bilong Jerusalem. Em i oganaisim ol singa long tupela grup. Ol i bihainim ol step long Geit Bilong Hulwara na go antap long banis, na bihain ol i mats i go long narapela sait bilong taun. Ol i pilaim ol trampet, simbol, na ol harp na singsing long Jehova. Esra i go wantaim wanpela grup, na Nehemia wantaim narapela grup, bihain ol i kam bung long tempel. Olgeta man, meri, na ol pikinini i mekim ofa long Jehova na amamas. Saun bilong amamas bilong ol i go longwe tru na ol man i harim.

“I no gat wanpela samting bilong pait em ol i wokim bilong pait long yu inap bagarapim yu.”—Aisaia 54:17

Ol Askim: Wai na Nehemia i go long Jerusalem? Ol i wokim gen banis bilong Jerusalem insait long hamas de?

Nehemia 1:1-11; 2:1-20; 4:1-23; 5:14; 6:1-19; 12:27-43

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim