Go Klostu Long God

“JEHOVA i save gut long mi, olsem na mi ting em i no inap laikim mi o em i no inap orait long mi.” Em tok bilong wanpela meri Kristen husat i bin stap gut long God, tasol em i ting em i no gutpela meri inap long God i ken laikim em. Olsem wanem? Yu bin kisim dispela kain tingting olsem God i no inap tingim yu, na em i no inap orait liklik long yu? Sapos olsem, ating ol tok i stap long Nehemia 13:31 bai strongim bel bilong yu.

Nehemia, em namba wan gavena bilong ol Juda long yia 450 B.C.E. samting, em i bin wok strong bambai God i ken laikim em. Em i kirapim wok bilong wokim gen banis bilong Jerusalem, maski ol birua i laik pasim rot bilong em. Em i strong long ol manmeri i mas bihainim Lo Bilong God, na lukautim ol lain i stap tarangu, na tu, em i wok long strongim bilip bilong ol wanlain Israel. Yu ting God i lukim ol wok dispela gutpela man i bin mekim? Yu ting Jehova i orait long Nehemia? Yumi ken save long bekim bilong ol dispela askim taim yumi ritim laspela tok bilong buk i gat nem bilong em.

Nehemia i tok: “God, yu ken tingim olgeta dispela pasin mi bin mekim na yu ken mekim gut long mi.”a Yu ting Nehemia i tingting planti, nogut God i no lukim ol dispela gutpela wok em i bin mekim o God bai lusim tingting long em? Nogat. Yumi ken ting Nehemia i save gut long ol tok em ol man bilong raitim Baibel paslain long em i bin kamapim, olsem Jehova i save tingim tru ol man i stap gut long lotuim em na ol gutpela wok ol i bin mekim. (Kisim Bek 32:​32, 33; Song 56:⁠8) Olsem na em i askim God long mekim wanem? Wanpela dikseneri bilong Baibel i tok, long tok Hibru dispela tok “tingim” i makim “pasin laikim i kamap long tingting bilong yumi na yumi kirap mekim sampela samting taim yumi tingim bek wanpela man o wanpela samting.” Nehemia i bilip tru olsem beten i gat strong, olsem na em i askim God long tingim na laikim em na mekim gut long em.​—⁠Nehemia 2:⁠4.

Nehemia i bin beten askim Jehova long tingim em. Yu ting Jehova i bin harim beten bilong em? Long sampela samting em i bin mekim pinis. Em i stretim ol samting na bai beten bilong Nehemia i stap insait long Baibel inap long olgeta taim bihain, na dispela em i wanpela rot na yumi ken save, Jehova i laikim na tingim Nehemia. Tasol dispela Man bilong “harim beten” em bai mekim sampela samting moa bilong kamapim klia olsem em i bin harim beten bilong Nehemia.​—⁠Song 65:⁠2.

God bai givim gutpela pe long Nehemia long ol gutpela wok em i bin mekim bilong helpim lotu i tru. (Hibru 11:⁠6) Na long nupela taim we i gat stretpela pasin em Jehova i promis pinis long kamapim, em bai blesim em long rot bilong kirapim bek em.b (2 Pita 3:13; Revelesen 21:​3, 4) Long dispela taim Nehemia i gat rot long kisim laip i stap oltaim long Paradais bai kamap long graun, na em bai lukim olsem tru tru Jehova i bin tingim ol gutpela pasin bilong em.

Beten bilong Nehemia i kamapim klia olsem tok bilong King Devit i tru, em i tok: “Bikpela, yu save mekim gut long ol man i bihainim tru tok bilong yu. Yu stap olsem hap plang bilong pait na yu haitim ol. Yu lukautim ol gut tumas na ol i stap gut tru.” (Song 5:12) Tru tumas, God i save lukim na tingim tru ol wok yumi mekim bilong amamasim em. Sapos yu wok strong long mekim wok bilong em, yu ken bilip tru olsem em bai tingim na laikim yu na mekim gut tru long yu.

Baibel Ritim Bilong Februeri:

◼ Nehemia 1-​13

[Ol Futnot]