Jisas i Skulim Ol Disaipel Long Beten

Olgeta samting ol Farisi i mekim i bilong amamasim ol man. Sapos ol i mekim gutpela pasin, em bikos ol i laik bai ol man i luksave long dispela. Ol i save beten long ol pablik ples na ol manmeri i ken lukim ol. Ol Farisi i save tingim tingim ol longpela beten na kolim planti taim long ol sinagog na ol kona bilong ol strit na bai ol man i ken harim ol. So ol man i kirap nogut taim Jisas i tokim ol: ‘Yupela i no ken beten olsem ol Farisi. Ol i ting God bai amamas long planti tok bilong ol, tasol nogat. Beten em samting namel long yu na Jehova. No ken kolim ol seim tok planti taim. Jehova i laik bai yu tokim em long tingting tru i stap long bel bilong yu.

‘Yupela i mas beten olsem: “Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.”’ Jisas i tokim ol tu long beten askim God long givim ol kaikai inap long dispela de, fogivim sin bilong ol, na ol narapela samting bilong ol yet.

Jisas i tok: ‘No ken stop long beten. Wok yet long askim Papa bilong yupela, Jehova, long ol gutpela samting. Ol papamama i save givim ol gutpela samting long pikinini bilong ol. Sapos pikinini bilong yu i askim long bret, bai yu givim em ston? Sapos em i askim long pis, bai yu givim em snek?’

Bihain Jisas i eksplenim dispela skultok: ‘Sapos yupela i save givim ol gutpela presen long ol pikinini bilong yupela, orait yupela i ken save tru olsem Papa bilong yupela long heven, Jehova, bai givim holi spirit long yupela. Olsem na yupela i mas askim em.’ Yu save bihainim edvais bilong Jisas? Yu save beten long wanem ol samting?