Jisas i Kamap Long Ol Man Bilong Kisim Pis

Sampela taim bihain long Jisas i kamap long ol aposel, Pita i plen long go painim pis long Raunwara Galili. Tomas, Jems, Jon, na ol narapela disaipel i go wantaim em. Long nait olgeta ol i painim pis, tasol ol i no kisim wanpela.

Long bikmoning long neks de, ol i lukim wanpela man i sanap long nambis. Em i singaut long ol long solwara: ‘Yupela kisim sampela pis?’ Ol i tok: “Nogat!” Dispela man i tok: “Tromoi umben i go long rait sait bilong bot.” Taim ol i mekim olsem, umben i pulap tru long planti pis na ol i no inap pulim i kam antap. Wantu Jon i luksave dispela man em Jisas na em i tok: “Em Bikpela tasol!” Kwiktaim, Pita i kalap long wara na swim i go long nambis. Ol narapela disaipel i bihainim em long bot.

Taim ol i kam long nambis, ol i lukim bret na pis i kuk i stap long paia. Jisas i tokim ol long bringim sampela pis na bungim wantaim dispela kaikai. Na em i tok: ‘Kam na kaikai.’

Taim ol i kaikai pinis, Jisas i askim Pita: ‘Yu laikim mi moa winim wok bilong kisim pis o nogat?’ Pita i tok: ‘Yes Bikpela, yu save mi laikim yu tumas.’ Jisas i tok: ‘Givim kaikai long ol pikinini sipsip bilong mi.’ Jisas i askim gen: ‘Pita, yu laikim mi o nogat?’ Pita i tok: ‘Bikpela, yu save mi laikim yu tumas.’ Jisas i tok: “Lukautim ol liklik sipsip bilong mi.” Jisas i askim em namba 3 taim. Pita i bel hevi tru. Em i tok: ‘Bikpela, yu save long olgeta samting. Yu save olsem mi laikim yu tumas.’ Jisas i tok: “Givim kaikai long ol liklik sipsip bilong mi.” Na em i tokim Pita: “Wok yet long bihainim mi.”