Jisas i Go Bek Long Heven

Long Galili, Jisas i bung wantaim ol disaipel bilong em. Em i givim ol wanpela bikpela tok: ‘Yupela go na kamapim ol disaipel long olgeta lain man. Skulim ol long bihainim olgeta samting mi tokim yupela long en, na baptaisim ol.’ Na em i promisim ol: ‘Tingim, mi bai stap wantaim yupela olgeta taim.’

Long dispela 40 de bihain long Jisas i kirap bek, em i kamap long planti handret disaipel bilong em long Galili na Jerusalem. Em i skulim ol long ol bikpela tok na mekim planti mirakel. Bihain em i bung wantaim ol disaipel bilong em long laspela taim, antap long Maunten Oliv. Em i tok: ‘No ken lusim Jerusalem. Yupela i mas wetim dispela samting Papa i tok promis long en.’

Ol aposel bilong em i no kliagut long tok bilong em. Ol i askim em: ‘Ating nau bai yu kamap King bilong Israel?’ Jisas i tok: ‘Em i no taim yet Jehova i makim bilong mi long kamap King. Klostu nau yupela bai kisim strong long holi spirit, na yupela bai stap witnes bilong mi. Yupela go na autim tok long Jerusalem, Judia, Samaria, na i go inap long olgeta hap bilong graun.’

Bihain long dispela, Jisas i lusim graun na wok long go antap long skai na klaut i karamapim em. Ol disaipel bilong em i lukluk yet i go antap, tasol em i go pinis.

Ol disaipel i lusim Maunten Oliv na go long Jerusalem. Ol i save bung wantaim long wanpela rum antap na beten. Ol i wet long Jisas long givim sampela moa instraksen long ol.