Sapta 131

Em i Kamap Tupela Taim Moa Long Ol, na Pentikos Long Yia 33

JISAS i bin stretim tok long bung wantaim ol 11-pela aposel long wanpela maunten long Galili. Ol i tokim ol narapela disaipel long dispela na 500 samting ol i go bung. Ol i amamas, long wanem Jisas i kamap long ai bilong ol na em i kirap skulim ol!

Wanpela samting em i skulim ol long en, em olsem: God i bin givim namba long em bilong bosim olgeta samting long heven na long graun. Na em i tokim ol: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.”

Olaman! Em i givim wok long ol man na meri na pikinini wantaim bilong kamapim ol disaipel. Ol birua bai wok long pasim ol, tasol Jisas i strongim bel bilong ol, em i tok: “Harim. Mi save stap wantaim yupela olgeta de, i go inap long dispela taim i pinis.” Jisas i save stap wantaim ol disaipel bilong em long rot bilong spirit holi, bilong helpim ol long inapim wok bilong ol.

Jisas i kirap bek na inap 40 de bihain em i wok long kamap long ai bilong ol disaipel, na em i skulim ol long Kingdom bilong God, na em i kirapim ol long tingim gut wok ol i mas mekim. Wanpela taim em i kamap long ai bilong brata bilong em tu, em Jems. Bipo Jems i no bilip olsem Jisas em i Man bilong kisim bek ol, tasol nau Jisas i helpim em long bilip olsem.

Taim ol aposel i stap yet long Galili, Jisas i tokim ol, ol i mas i go bek long Jerusalem. Taim em i bung wantaim ol long Jerusalem, em i tokim ol: “Yupela i no ken lusim Jerusalem. Yupela i mas wetim dispela samting Papa i tok em i laik givim long yupela, na bipo mi tokim yupela long en. Jon i bin baptaisim ol manmeri long wara. Tasol i no planti de nau na bai yupela i kisim baptais long Holi Spirit.”

Bihain Jisas i bung gen wantaim ol aposel na em i kisim ol i go lusim Jerusalem na ol i go long taun Betani long hap sankamap long maunten Oliv. Planti taim em i bin tokim ol, i no longtaim na bai em i go bek long heven, tasol ol i tingting yet olsem Kingdom bilong em bai kamap long graun. Olsem na ol i askim em, ‘Ating nau long dispela taim bai yu kirapim gen kingdom bilong Israel?’

Jisas i no laik wok gen long stretim dispela tingting kranki bilong ol, olsem na em i tok tasol: “Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting.” Nau em i tok gen long dispela wok ol i mas mekim, em i tok: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”

Ol i lukluk i stap na Jisas i kirap long i go antap, na bihain wanpela klaut olsem smok bilong antap i haitim em, na ol i no lukim em moa. Em i wanpela spirit na em i pinisim bodi bilong man em i bin kisim na em i go antap. Ol 11-pela i lukluk yet long skai, na wantu tupela man i gat waitpela klos i sanap wantaim ol. Em tupela ensel i tanim i kamap man. Tupela i tok: “Yupela man bilong Galili, bilong wanem yupela i sanap nating na lukluk i go long skai? Dispela Jisas, nau . . . i go antap long heven, em bai i kam bek gen long wankain pasin olsem nau yupela i lukim em i go long heven.”

Taim Jisas i lusim graun, ol i no winim biugel na singautim ol man i kam bung. Nogat. Ol gutpela disaipel tasol i lukim em i go. Na em bai kam bek long wankain pasin​—bai i no gat bikpela bung samting; ol gutpela disaipel tasol bai save em i kam bek pinis olsem king bilong Kingdom.

Nau ol aposel i lusim maunten Oliv i go daun na ol i go bek long Jerusalem. Ol i bihainim tok bilong Jisas na wet i stap long Jerusalem. Tenpela de bihain, long bikpela de bilong lotu Juda, em de Pentikos, long yia 33, inap olsem 120 disaipel i bung long wanpela rum antap. Wantu wanpela nois olsem krai bilong strongpela win i pulap long rum. Na ol i lukim samting olsem paia i stap long olgeta wan wan disaipel, na olgeta i kirap long mekim tok long kain kain tok ples. Em nau, spirit holi i kam daun long ol, olsem Jisas i tok promis pinis! Matyu 28:​16-20; Luk 24:​49-52; 1 Korin 15:​5-7; Aposel 1:​3-15; 2:​1-4.

▪ Long wanpela maunten long Galili Jisas i givim laspela tok long wanem lain? Em i givim wanem tok long ol?

▪ Jisas i givim wanem tok long ol disaipel bilong strongim bel bilong ol? Olsem wanem em bai stap wantaim ol?

▪ Jisas i kirap bek na inap hamas de em i wok long kamap long ai bilong ol disaipel? Em i skulim ol long wanem samting?

▪ Jisas i kamap long ai bilong husat, ating em i bin kamap disaipel bihain long taim Jisas i dai?

▪ Wanem tupela taim moa Jisas i bung wantaim ol aposel? Wanem samting i kamap long dispela tupela taim?

▪ Olsem wanem Jisas bai kam bek long wankain pasin olsem em i go?

▪ Wanem samting i kamap long de Pentikos long yia 33?