Ol Disaipel i Kisim Holi Spirit

Tenpela de bihain long Jisas i go bek long heven, ol disaipel bilong em i kisim holi spirit. Em Pentikos 33 C.E., na ol manmeri long planti narapela hap i kam long Jerusalem bilong mekim dispela bung. Inap 120 disaipel bilong Jisas i bung long wanpela rum antap long wanpela haus long Jerusalem. I no longtaim, wanpela narakain samting i kamap. Wanpela samting olsem paia i kamap long het bilong olgeta disaipel, na ol i stat long mekim kain kain tokples. Wanpela nois olsem strongpela win i pulapim dispela haus.

Ol manmeri bilong ol narapela hap i bin kam long Jerusalem, i harim nois na ran i go long dispela haus long lukim wanem samting i wok long kamap. Ol i kirap nogut taim ol i harim ol disaipel i mekim ol dispela tokples. Ol i tok: ‘Ol dispela lain i bilong Galili. Hau na ol inap mekim tokples bilong mipela?’

Bihain Pita na ol arapela aposel i sanap long ai bilong bikpela lain manmeri. Pita i tokim ol manmeri long hau Jisas i bin dai na Jehova i bin kirapim em bek. Pita i tok: ‘Nau Jisas i stap long heven long rait sait bilong God, na em i kapsaitim holi spirit long mipela olsem em i bin promis. Em as na yupela i bin harim na lukim ol dispela mirakel.’

Ol manmeri i pilim tru tok bilong Pita, na ol i askim: “Bai mipela i mekim wanem?” Em i tokim ol: ‘Tanim bel long ol sin bilong yupela na kisim baptais long nem bilong Jisas. Na yupela tu bai kisim holi spirit olsem presen.’ Long dispela de, inap olsem 3,000 manmeri i kisim baptais. Kirap long dispela taim, wantu namba bilong ol disaipel long Jerusalem i wok long i go bikpela. Long rot bilong helpim em holi spirit i givim, ol aposel i kirapim planti kongrigesen so ol inap skulim ol disaipel long olgeta samting Jisas i bin tokim ol.