Ol i Wet Long Jerusalem

OL MANMERI long dispela piksa ol i disaipel bilong Jisas. Ol i bihainim tok bilong em na wet long Jerusalem. Ol i bung wantaim na wet i stap na nau wanpela bikpela nois i kamap insait long haus. Em i olsem krai bilong strongpela win. Na ol i lukim paia i olsem tang i stap antap long het bilong olgeta wan wan disaipel. Yu inap lukim paia long het bilong ol? Wanem mining bilong ol dispela samting?

Em wanpela mirakel! Jisas i stap pinis long heven wantaim Papa bilong em, na em i kapsaitim holi spirit bilong God long ol disaipel bilong em. Yu save dispela spirit i kirapim ol long mekim wanem? Olgeta i kirap long mekim tok long kain kain tok ples.

Planti man long Jerusalem i harim dispela nois na ol i kam bilong lukim wanem samting i kamap. Sampela ol i bilong ol narapela hap na ol i kam bilong mekim bung bilong Pentikos, em wanpela bikpela bung bilong ol Israel. Samting i kamap i mekim ol dispela man i kirap nogut tru! Ol i harim ol disaipel i autim tok long ol strongpela wok bilong God long wan wan tok ples bilong ol!

Ol dispela lain i kam long Jerusalem i tok: ‘Olgeta dispela manmeri ol i bilong Galili. Tasol olsem wanem na ol i toktok long tok ples bilong yumi ol man i kam long ol narapela hap?’

Nau Pita i kirap na tokaut klia long ol. Em i tokim ol long ol man i kilim i dai Jisas na bihain Jehova i kirapim em bek long matmat. Pita i tok: ‘Nau Jisas i stap long han sut bilong God long heven. Na em i kapsaitim holi spirit olsem em i bin tok promis pinis. Em as bilong ol dispela mirakel.’

Taim Pita i mekim dispela tok, planti manmeri i sori tru long pasin nogut ol man i bin mekim long Jisas. Ol i tok: ‘Mipela i mas mekim wanem?’ Pita i tok: ‘Yupela i mas senisim pasin bilong yupela na kisim baptais.’ Olsem na long dispela de, inap olsem 3,000 manmeri i kisim baptais na kamap disaipel bilong Jisas.