Jon i Lukim Ol Samting Bai Kamap Bihain

Taim aposel Jon i kalabus long ailan Patmos, Jisas i soim em 16 visen, o piksa, bilong ol samting bai kamap bihain. Ol dispela visen i kamapim klia hau nem bilong Jehova bai kamap holi, Kingdom bilong em bai kam, na laik bilong em bai kamap long graun olsem i kamap long heven.

Long wanpela visen, Jon i lukim Jehova i sindaun long naispela sia king bilong em long heven, na 24 hetman i putim waitpela klos na ol gol kraun long het bilong ol, i raunim Em. Laitning i wok long sut i kam ausait long sia king wantaim pairap bilong tanda. Na 24 hetman i brukim skru long ai bilong Jehova na lotu long em. Long narapela visen, Jon i lukim bikpela lain manmeri bilong olgeta kantri, pipol, na tokples i lotu long Jehova. Pikinini Sipsip, em Jisas, i lukautim ol na kisim ol i go long wara bilong laip. Bihain, long narapela visen, Jisas i kirap mekim wok bos olsem King long heven, wantaim 24 hetman. Long dispela visen, Jon i lukim Jisas i pait long bikpela snek, em Satan, na ol dimon bilong em. Jisas i tromoi ol i go aut long heven, i kam daun long graun.

Nau Jon i lukim naispela piksa bilong Pikinini Sipsip na 144,000 i sanap long Maunten Saion. Em i lukim tu wanpela ensel i flai raunim graun, na tokim ol manmeri long pret long God na givim glori long Em.

Long neks visen, em pait bilong Armagedon. Long dispela pait, Jisas na ami bilong em i pait na daunim dispela taim nogut bilong Satan. Long laspela visen, Jon i lukim pasin wanbel tru long heven na long graun. Satan na lain bilong em i bagarap olgeta. Olgeta man long heven na long graun i mekim nem bilong Jehova i stap holi na lotuim em wanpela tasol.