KAMAPIM OL DISAIPEL
LESEN 10
Tingting Strong Long Kamapim Ol Disaipel
Stiatok: “Mipela i tingting strong long givim gutnius bilong God long yupela na mipela i amamas tu long givim laip bilong mipela bilong helpim yupela. Long wanem, yupela i kamap pren tru bilong mipela.”—1 Tes. 2:8.
Samting Jisas i Mekim
1. Lukim VIDIO, o ritim Jon 3:1, 2. Na skelim ol dispela askim:
Wai na Nikodimas i laik go lukim Jisas long nait?—Lukim Jon 12:42, 43.
Taim Jisas i bungim Nikodimas long nait, olsem wanem dispela i soim olsem em i tingting strong long kamapim disaipel?
Yumi Kisim Wanem Skul Long Jisas?
2. Yumi soim olsem yumi laikim ol manmeri taim yumi tingting strong long helpim ol long kamap disaipel.
Bihainim Pasin Bilong Jisas
3. Stadi long taim na ples i stret long Baibel sumatin. Ating em i laik stadi long wanpela de stret long wik o wanpela taim stret long de. Yu ting em bai amamas long stadi long ples wok bilong em, long haus bilong em, o long pablik ples? Sapos inap, yu ken senisim sediul bilong yu bambai yu ken stadi wantaim em long taim na ples i stret long em.
4. Mekim stadi long olgeta taim. Sapos yu bai go long wanpela hap, no ken kenselim stadi bilong em. I gutpela, yu skelim:
Yu inap mekim stadi long narapela taim long wik?
Yu inap mekim stadi long rot bilong fon o vidio konferens?
Yu inap askim narapela pablisa long mekim stadi?
5. Beten long kisim stretpela tingting. Askim Jehova long helpim yu long no ken givap long sumatin bilong yu, maski sapos em i no stadi long olgeta taim o em i no hariap long bihainim ol tok bilong Baibel em i lainim. (Fili. 2:13) Ating sumatin bilong yu i gat planti gutpela pasin; beten askim God long helpim yu long tingim ol dispela gutpela pasin bilong em.