Skulim Man Long Rot i Isi Long Kisimgut Tok

Samting Jisas i Mekim

VIDIO: Jisas i Tok Piksa Long Pasin Bilong Papa Bilong Yumi Long Tingim Gut Yumi

1. Lukim VIDIO, o ritim Matyu 6:​25-27. Na skelim ol dispela askim:

1. Olsem wanem Jisas i soim olsem Jehova i save tingim yumi?

2. Maski Jisas i save long planti samting long ol pisin, em i stori tasol long wanem samting? Bilong wanem dispela em i gutpela rot bilong skulim man?

Yumi Kisim Wanem Skul Long Jisas?

2. Taim yumi skulim ol man long rot we i isi long ol i kisimgut tok, ol bai tingim gut dispela tok na pilim tru long bel.

Bihainim Pasin Bilong Jisas

3. No ken toktok tumas. Sapos yupela stadi long wanpela topik em yu save gut long en, i gutpela moa stori tasol long samting yupela stadi long en. Taim yu givim wanpela askim, stap isi na wet long sumatin bilong yu i bekim tok. Sapos em i no save long bekim o em i kamapim wanpela tingting i pait wantaim tok bilong Baibel, kamapim sampela askim moa bilong helpim em long wokim tingting long samting em i lainim. Taim sumatin i kliagut long bikpela poin, go long neks poin.

4. Helpim sumatin bilong yu long bungim nupela save em i lainim wantaim samting em i save pinis long en. Olsem, paslain long yu kirapim lesen i stori long kirap bek, i gutpela yu stori liklik long save em sumatin i kisim pinis long wanem samting i painim man taim em i dai.

5. Skelim gut tok piksa yu yusim. Paslain long yu yusim wanpela tok piksa, askim yu yet:

1. ‘Dispela tok piksa i isi long kliagut long en?’

2. ‘Sumatin bilong mi bai kliagut long en?’

3. ‘Dispela tok piksa bai helpim sumatin long tingim gut bikpela poin—na i no tingim tasol tok piksa?’