Sampela Beten Long Ol Sam Ol Inap Mekim Gut Bel Bilong Yu
NO GAT planti man em ol i go daun insait long solwara na draipela pis i daunim ol na bihain pis i trautim ol na ol inap stori long ol samting i bin painim ol. Tasol dispela samting i bin painim wanpela man, em Jona. Taim dispela narapela kain samting i painim Jona, Jona i beten long God. Jona i kolim sampela tok bilong Ol Sam. Lukim ol dispela tok bilong Jona i wankain long sampela tok bilong Ol Sam:
“O Bikpela, mi bin karim hevi, na mi singaut long yu, na yu harim singaut bilong mi.”—Jona 2: 2 namba wan hap.
“Taim hevi i kamap long mi, mi singaut long Bikpela, na em i harim beten bilong mi.”—Sam 120:1.
“Mi stap long ples nogut bilong ol daiman, na mi krai long yu.”—Jona 2:2 namba tu hap.
“Bikpela, mi bel hevi tumas na mi singaut long yu.”—Sam 130:1.
“Na yu harim krai bilong mi.”—Jona 2:2 namba tri hap.
“Bikpela, harim krai bilong mi.”—Sam 130:2.
“Yu bin tromoi mi na mi kam daunbilo tru long solwara. Solwara i karamapim mi olgeta.”—Jona 2:3 namba wan hap.
“Mi wokabaut long wara i daun moa na tait i laik karamapim mi olgeta.”—Sam 69:2 namba tu hap.
“Yu mekim biksi i bruk antap long mi.”—Jona 2:3 namba tu hap.
“Yu save mekim biksi i bruk na kalap nabaut, na … i karamapim mi.”—Sam 42:7.
“Mi bin tok olsem, Yu rausim mi pinis. Ating bai mi no inap lukim gen bikpela haus lotu bilong yu.”—Jona 2:4.
“Bikpela, bipo mi pret tru na mi ting yu rausim mi pinis na mi no moa i stap klostu long yu.”—Sam 31:22.
“Si i bruk antap long mi, na i pasim win bilong mi. Na solwara i karamapim mi olgeta. Gras bilong solwara em i raunim het bilong mi.”—Jona 2:5.
“Wara i kamap pinis inap long nek bilong mi.”—Sam 69:1.
“Mi go daun tru long as bilong olgeta maunten insait long solwara. Dispela ples nogut i kalabusim mi tru. Tasol Bikpela, yu God bilong mi, yu kisim bek mi. Na mi lusim ples nogut na mi stap laip.”—Jona 2:6.
“Bikpela, mi dai pinis na yu kirapim mi bek gen. Mi go daun pinis long ples bilong ol daiman. Tasol yu givim laip long mi gen.”—Sam 30:3.
“O Bikpela, mi pilim olsem mi laik i dai, olsem na mi tingting long yu.”—Jona 2:7 namba wan hap.
“Mi save tokim em long olgeta wari na olgeta hevi i kamap long mi. Taim bel bilong mi i hevi moa, na mi ting bai mi bagarap.”—Sam 142:2, 3.
“Prea bilong mi i kamap long yu long bikpela haus lotu bilong yu.”—Jona 2:7 namba tu hap.
“Mi prea long God bilong mi bai em i helpim mi. Em i stap long haus holi bilong em na i harim tok bilong mi.”—Sam 18:6.
“Ol man i save lotu long ol god giaman, ol i lusim pasin bilong bihainim yu.”—Jona 2:8.
“Yu no laikim tru ol man i save lotu long ol god giaman. Tasol mi bilip long yu.”—Sam 31:6.
“Tasol mi laik mekim song bilong litimapim nem bilong yu, na givim ofa long yu. Olgeta samting mi promis pinis long yu, em bai mi mekim.”—Jona 2:9 namba wan hap.
“Mobeta yupela tenkyu tru long mi. Em i ofa yupela mas mekim. Olgeta presen yupela tok pinis long givim long mi, God Antap Tru, yupela mas givim long mi:”—Sam 50:14.
“Bikpela, yu wanpela tasol i save kisim bek mipela, na mipela i stap laip!”—Jona 2:9 namba tu hap.
“Bikpela, yu wanpela tasol i save kisim bek mipela na mipela i no save bagarap.”—Sam 3:8.
Taim hevi i painim Jona, em i tingim ol dispela tok bilong Ol Sam na yumi tu ken mekim olsem. Maski nau yu stap gutpela o nogat, tasol ol beten i stap long Ol Sam ol inap mekim gut bel bilong yu na strongim bel bilong yu.