Bilong Wanem Yumi Mas Beten Olsem “Kingdom Bilong Yu i Mas i Kam”?
“Taim kingdom bilong God i kam, ol manmeri i no inap lukim long ai. Bai ol i no inap i tok, ‘Lukim, em i stap hia,’ o ‘Em i stap long hap.’ Harim. Kingdom bilong God em i stap namel long yupela.”—Luk 17:20, 21, NT.
1, 2. Ol nius i tok wanem na yumi ken tok yumi stop long taim nogut bilong pret?
OLSEM WANEM? Yumi laikim kingdom bilong God? Yumi laikim tru! Long wanem yumi stap long taim nogut bilong planti hevi. Na ol manmeri i pret! Wanpela nius bilong Englan (Guardian Weekly bilong Manseste, 7 Jun 1981) i tok: ‘Ol roketbom (SS-20) Rasia i bin mekim wok long en kirap long dispela mun, ol inap bagarapim olgeta biktaun olsem London na Paris na Bon na Rom na Brasel. … olgeta wan wan roketbom i gat tripela bom long en na ol dispela bom wan wan i gat bikpela strong (inap olsem 150 kiloton), winim tru bom i bin bagarapim Hirosima. Sapos Rasia i sutim 5-pela roketbom olsem i go bagarapim 5-pela biktaun, bai ol i gat 210 roketbom i stap yet bilong mekim wok long en na ol i no ken singautim ol balus i gat bom bilong helpim ol o ol sip i stap insait long solwara, em ol sabmarin, o ol 1,400 inta-kontinental roketbom ol i holim i stap bilong mekim wok long en long wanpela bikpela taim.’
2 Nius Time bilong 26 Oktoba 1981 i stori long ol samting bilong pait ol lain i holim long nau na nius i tok, ‘Ol i hipim planti samting bilong pait na i no gat rot bilong pasim.’ Nius i tok, ‘wok bilong baim i go ol samting bilong pait em i as bilong wok politik bilong ol bikpela lain na liklik lain wantaim long nau.’
3. (a) Olsem wanem taim bilong yumi i wankain olsem taim bilong Noa, olsem Jenesis 6:11, 13 i tok? (b) Wanem tok Bilong Jisas i makim stret tru taim bilong yumi long nau?
3 Tru tumas “pasin ol i bin mekim long taim bilong Noa,” pasin olsem tasol ol i mekim long nau. “Pasin pait em i go pulap pinis long olgeta hap,” na dispela pasin bai kamap moa yet i go inap long taim bikpela bagarap tru i kamap. (Jenesis 6:11, 13, Baibel Pisin; Matyu 24:37, NT) Olsem na taim Jisas i tok profet long “olgeta dispela samting i laik kamap” long taim bilong pinis bilong dispela pasin bilong nau, Jisas i tok: “bel bilong olgeta man bai i bagarap tru na ol i pret … Planti manmeri bai ol i tingting long ol samting i laik kamap long graun, na bai bel bilong ol i pret tru.”—Luk 21:25, 26, 36, NT.
Strongim Bel!
4. Bilong wanem yumi no ken pret na tingting planti?
4 Tasol Man bilong wokim dispela graun na olgeta gutpela samting i stap long graun, yu ting em bai larim ol man bilong pait ol i bagarapim dispela graun olgeta? Yu ting God Jehova bai larim ol birua bilong em i bagarapim ol manmeri ol i bin ‘wokim ol bainat i kamap samting bilong wokim gaden’ na ol i lotu long Em “long spirit na long pasin i tru”? (Aisaia 2:2-4; Jon 4:24, NT) Nogat tru! Olsem na taim Jisas i stori long ol samting bai kamap nau long dispela taim, em i tok: “Bihain ol dispela samting i stat long kamap, long dispela taim yupela i mas sanap na litimapim het bilong yupela. Taim bilong God i kisim bek yupela em i kam klostu nau.” (Luk 21:28, NT) Jisas i tok, taim yumi lukim ol kain kain pasin i kamap nau long taim “[pasin bilong] dispela graun i laik pinis,” yumi no ken pret na tingting planti.—Matyu 24:3-8, 33, NT.
5. Yumi stap namel long ol manmeri i mekim wanem kain pasin? Tasol yumi mas i gat wanem kain tingting?
5 Long planti hap bilong graun long nau ol manmeri i pret long wokabaut long rot long taim bilong tudak. Planti man na meri marit ol i katim marit. Planti famili i bruk. Planti manmeri i kisim drak na mekim pasin pamuk na kain kain pasin i gat sem. Ol manmeri i lotuim Jehova ol i stap namel long ol dispela manmeri. Tru, yumi stap long dispela graun, tasol sapos yumi was gut, pasin nogut bilong dispela graun i no ken daunim yumi. Yumi mas kisim tingting wankain olsem bilong Jisas, em i tok: “Long graun bai yupela i gat hevi. Tasol bel bilong yupela i ken i stap strong. Mi winim pinis pasin bilong dispela graun.”—Jon 16:33, NT.
6. (a) Jisas i makim wanem gutpela pasin yumi ken bihainim bilong helpim yumi long ‘winim pasin bilong dispela graun’? (b) Bilong wanem Jisas i lainim yumi long beten, olsem: “Kingdom bilong yu i mas i kam”?
6 Olsem wanem Jisas inap ‘winim pasin bilong dispela graun’? Long wanem em i bilip tru long dispela Kingdom God i tok promis long kamapim. Em i save, long taim Jehova yet i makim na long rot Jehova yet i makim, bai Jehova i kamapim dispela kingdom. Jisas i pilim tru bikpela wok Jehova i givim long em—Jehova i makim em bilong i stap King bilong dispela kingdom. Jisas i laik tru long kisim dispela kingdom, olsem na em i redi long lusim olgeta samting em inap kisim olsem wanpela man bilong graun i gutpela olgeta. Em i laik bai yumi tu yumi kisim ol gutpela samting bilong Kingdom. Olsem na em i lainim ol disaipel long beten, olsem: “Kingdom bilong yu i mas i kam.” (Matyu 6:l0, NT) Inap planti handet yia pinis planti milion manmeri i bin kolim dispela beten. Tasol wanpela wanpela tasol i save tru long dispela Kingdom.
Kingdom—Em i Stap Tru
7. (a) Yumi ken skelim wanem samting long nau na yumi ken save, kingdom bilong God em i stap tru. (b) Husat i makim ol king bilong Kingdom? Olsem wanem yumi ken save ol bai lukautim gut ol man na bosim ol gut?
7 Kingdom bilong God em i wanpela kingdom i stap tru. Olsem long nau yumi gat sampela kingdom bilong graun i stap yet, olsem Yunaitet Kingdom na Kingdom bilong Nepal na Kingdom bilong Denmak, olsem tasol kingdom bilong God em i wanpela gavman i stap tru. Ol kingdom bilong graun i gat lain bilong bosim ol, olsem ol memba bilong gavman ol i eleksen na makim ol. Na olsem tasol kingdom bilong heven i gat King bilong en God i bin makim em, em Jisas, na i gat sampela manmeri bilong wok king wantaim em. God yet i makim ol dispela manmeri. Baibel i tok, God i “makim” ol na ol i “stap manmeri long em,” na em i save “marimari” long ol. (Kolosi 3:12, NT) God tasol i save long ol gutpela pasin ol dispela king i mas bihainim bambai ol inap mekim stretpela pasin na bosim gut ol manmeri. Taim ol dispela 144,001 king bilong heven i kirap bek na i stap long kingdom bilong heven, ol inap lukautim gut ol wok bilong dispela Kingdom long graun.—Revelesen 14:1.
8, 9. (a) Bilong wanem ol misin bilong Krisendom ol i no save lainim ol man olsem i gat sampela manmeri ol bai stap long graun aninit long Kingdom? (b) Tasol husat ol bai stap aninit long dispela Kingdom? Na ol i ken amamas long wanem ol tok promis bilong Baibel? (c) Husat tasol long nau ol i autim dispela “gutnius” bilong Kingdom? Yu ken amamas long wanem ol samting long nau?
8 Orait, husat ol bai stap aninit long dispela Kingdom? Sapos yu givim dispela askim long ol misin bilong Krisendom, ol bai tok, ‘I no gat sampela man bai stap long graun aninit long dispela Kingdom.’ Ol i bihainim tingting bilong ol Grik na ol i ting olgeta man i gat tewel na taim ol i dai, tewel i go long “heven” o long “hel.” Ol i no bilip long gutpela tok promis bilong Baibel i tok ol manmeri bai kirap bek i stap long graun, na God bai “stap wantaim ol man,” na bai em i “mekim drai olgeta wara i stap long ai bilong ol. Bai ol man i no i dai moa, na ol i no bel hevi moa, na ol i no krai na kisim pen gen.” (Jon 5:28, 29; Revelesen 21:3, 4, NT) Tru tumas, ol manmeri bilong i stap aninit long dispela Kingdom em ol planti milion milion manmeri ol bai stap oltaim long gutpela ples paradais hia long graun. Na i gat wanpela lain tasol bilong lotu ol i save tokim ol manmeri bilong olgeta hap long dispela “gutnius,”em Ol Witnes Bilong Jehova.—Sam 37:9, 29.
9 Sapos yu bilip pinis long dispela “gutnius,” yu amamas wanpela man i bin tokim yu long ol dispela gutpela samting yu ken bilip long en na wetim i kamap, a? Yu amamas tru long save long ol samting kingdom bilong God bai mekim bilong helpim ol man, a? Yu tingim ol gutpela samting dispela Kingdom bai mekim na yu amamas yu inap litimapim nem bilong Man bilong kamapim dispela Kingdom, em God Jehova, laka? Tru tumas yumi gat gutpela wok tru yumi inap mekim nau long dispela taim, em wok bilong autim ‘dispela gutpela tok bilong kingdom’ long ol narapela manmeri bilong dispela graun ol tu i laikim kingdom bilong God!—Matyu 24:14, NT; Sam 145:10, 11.
Yumi Beten Strong
10. Bilong wanem yumi mas beten strong long Kingdom? Na yumi ken bilip tru olsem wanem?
10 Olsem na yumi mas beten strong tru long kingdom bilong God i mas i kam na bai nem bilong God i ken i stap holi. Yumi mas bilip tru olsem liklik taim bai dispela Kingdom “i kam” bilong kamapim laik bilong God hia long graun! Yumi tok promis pinis long mekim laik bilong God na yumi kisim baptais pinis, olsem na yumi ken bilip tru olsem Jehova bai harim beten bilong yumi na givim kaikai long yumi inap long dispela de, na em bai lusim ol rong bilong yumi, na em bai lukautim yumi bambai dispela “snek” Seten em i no ken giamanim yumi. Jisas i tok yumi mas beten askim God long ol dispela samting.—Matyu 6:9-13; Revelesen 12:9, NT.
11. I gat planti hevi long Braun long nau, olsem na wanem tok bilong Pol i gutpela bilong dispela taim nau? Bilong wanem i gutpela?
11 Pasin bilong dispela graun i go nogut na i gat planti hevi. Ol papa i gat hatwok long painim wok na liklik wansiling bilong lukautim famili. Na oltaim yumi mas was gut, nogut Seten i pundaunim yumi na yumi lusim bilip o mekim pasin pamuk samting. Yumi mas bihainim gutpela tok bilong aposel Pol long Efesas 6:11-18 (NT) em i tok: “Long strong bilong Holi Spirit yupela i mas prea oltaim. Yupela i mas strong long mekim kain kain beten na singaut long God.” Na God i save harim beten bilong ol man i givim bel tru long em na ol i bihainim laik bilong em.—Sam 65:2, 4, 5.
12. Bilong wanem oltaim yumi mas beten long dispela Kingdom i mas i kam?
12 Yumi mas givim bel tru long beten long God na tok olsem: “Kingdom bilong yu i mas i kam” Na bilong wanem yumi mas beten oltaim long dispela Kingdom i mas i kam? Long wanem long rot bilong dispela Kingdom bai God i pinisim nambawan birua bilong em na olgeta manmeri i larim Seten i bosim ol. Inap 6,000 yia pinis ol dispela man i bin bagarapim nem bilong God, tasol nau, long rot bilong Krais, God i laik stretim bek nem bilong em. Dispela kingdom i stap long han bilong Pikinini bilong God Krais Jisas bai mekim wok long ofa bilong Krais, em bilong baim bek ol man, na ol planti milion manmeri nau ol i stap long matmat bai ol i kirap bek. (1 Timoti 2:3-6; Revelesen 20:12) Olsem wanem? Wanpela man o meri yu laikim tumas em em i dai pinis na yu bel hevi i stap? Taim yu lukim ol pasin nogut i kamap long graun, yu bel hevi? Tasol yu inap insait long dispela lain ol tasol i bilip long Jehova na ol gutpela tok promis em i mekim long Kingdom. Em gutpela samting tru yu ken amamas long en, a? (Sam 144:15; 146:5) Yu mas amamas! Na yu mas bilip tru na beten olsem: “Kingdom bilong yu i mas i kam.”
TAIM KINGDOM I KAM EM BAI MEKIM OL DISPELA SAMTING
□ Pinisim pasin nogut, pait, hatpela pasin
□ Kisim bek olgeta manmeri i lotu long God “long spirit na long pasin i tru”
□ Givim wanpela gavman tru long ol man, em God yet i makim ol manmeri bilong wok king long en
□ Kirapim bek ol man i dai pinis na mekim ol manmeri bilong olgeta lain ol i stap wanbel long graun aninit long Kingdom
□ Pinisim pasin bilong i stap rabis na pasin giaman na kamapim stretpela pasin long graun bambai olgeta manmeri i gat gutpela sindaun
[Piksa long pes 15]
Ol gavman bilong graun ol i stap tru, na olsem tasol Kingdom gavman bilong heven em i stap tru
[Piksa long pes 17]
Kingdom bilong God long han bilong Krais bai ‘i kam’ bilong pinisim ol birua na kamapim paradais long graun. Ol manmeri i stap long matmat bai ol i kirap bek