Maus Bilong Bel God i Givim long Yumi-Em Inap Helpim Yumi

“Lo bilong God i stap long bel bilong en, na em i save bihainim God, na i no save lusim dispela lo.”—Sam 37:31, NT.

1, 2. Bilong wanem yumi mas tingting gut long maus bilong bel i bosim yumi? (Provep 12:15; 14:12

God i no givim planti planti lo long ol Kristen, tasol em i givim sampela lo long yumi na em i kolim stret ol dispela lo. Tasol em i givim planti tok long yumi, na ol dispela tok i olsem as bilong ol lo, tasol God no kolim stret olsem wanpela lo o tambu. Nogat. Bilip bilong yumi na maus bilong bel i kirapim yumi long dispela tok. Tru yumi gat maus bilong bel, tasol maus bilong bel helpim yumi o nogat? Em i bikpela samting. Planti man i save tok, ‘sapos bel bilong mi i no gat tok long wanpela samting, mi ken mekim.’ Tasol olsem wanem? Dispela kain tingting i stret?

² Olsem Baibel i tok, yumi gat sin na yumi save mekim rong, olsem na maus bilong bel inap giamanim yumi; ating em i malumalum, o i kranki, o i nogut pinis. Dispela tok bilong ol man, olsem “larim maus bilong bel i stiaim wokabaut bilong yu,” dispela inap bagarapim yumi na yumi bihainim rot nogut. Yumi ken save long dispela, taim yumi tingim ol manmeri bilong Krit ol i bin i stap long taim bilong ol aposel. Baibel i tok sampela man ol i save tok, ol Krit “ol i man bilong giaman tasol. Ol i wel abus nogut. Ol i save kaikai planti na les tumas.”—Taitas 1:10-12, NT.

3. Maus bilong bel i mekim wanem long ol man bilong Krit?

³ Ol Krit i gat maus bilong bel, olsem olgeta lain i gat. Tasol maus bilong bel i no helpim ol. Aposel Pol i rait pas long Taitas na em i tok: “Long tingting bilong ol man i gat klinpela bel, olgeta samting i klin. Tasol long tingting bilong ol man i gat bel doti na i no save bilip long Krais, i no gat wanpela samting i klin. Nogat. Tingting bilong ol wantaim bel bilong ol em i doti pinis.” (Taitas 1:15, NT; Rom 2:14, 15) Planti manmeri bilong Krit, bel bilong ol i strong pinis na i no inap pilim samting i stret o i no stret, olsem na maus bilong bel bilong ol i no helpim ol long bihainim pasin i stret o klin. (1 Timoti 4:2) Long tingting bilong planti Krit, “i no gat wanpela samting i klin.” Long wanem, bel bilong ol i nogut pinis, olsem doti, na taim wanpela samting i kamap, ol i ting dispela i givim rot long ol long mekim pasin nogut. Ating ol i bin tok, ‘Bel bilong mi i no gat tok long dispela samting.’ Tasol bel i mas i gat tok long dispela pasin ol i mekim! Tasol i gat sampela Juda o man i kisim pasin bilong Juda ol i bilong Krit ol i bin i kam long Jerusalem long Pentikos 33 CE. Ol i gat save long ol samting bilong spirit, na dispela save helpim ol long abrusim pasin bilong giaman, na pasin olsem wel abus nogut, na kaikai planti tumas. Na ol man i bilip long Jisas ol i tingim tok bilong em, em i tok maus bilong bel i mas gutpela na i mas mekim wok.—Aposel 2:5, 11; Taitas 1:5; 2:2-5; 3:3-7.

4, 5. Stori bilong Pol i lainim yumi olsem wanem long maus bilong bel?

⁴ Tasol maski man i save long sampela bilong Baibel na em i laik mekim i stret, tasol sampela taim maus bilong bel inap giamanim em tu long mekim pasin kranki. Yumi ken tingim stori bilong Pol. Pastaim nem bilong em Sol, na em i gat sampela save long Baibel na em i strong long lotuim God olsem Lo i makim. Tasol em i no wok long kisim save long tupela nupela samting God i wok long mekim bilong kamapim laik bilong Krais i kam pinis na em i autim tok na em i dai, na ol dispela samting i truim ol tok profet bilong Baibel. Tasol Pol i wok yet long bihainim pasin bilong ol Farasi long lotu, na em i pas yet long lotu Juda. Maus bilong bel bilong em i no pasim em long “tok strong yet long bagarapim ol disaipel bilong Bikpela na kilim ol i dai.”—Filipai 3:4-6; Aposel 9:1, 2, NT.

⁵ Yumi tingim stori bilong ol dispela man na yumi save, maus bilong bel inap giamanim yumi. I gat planti samting i save kamap na yumi mas skelim wanem samting yumi mas mekim, tasol Baibel i no kolim stret wanpela lo bilong dispela tingting na bai yumi ken lukim na bihainim. Nogat. Maus bilong bel i mas soim rot long yumi. Olsem na yumi mas save, olsem wanem yumi ken lainim maus bilong bel na nau em i helpim yumi gut na soim rot long yumi. Orait nau yumi ken skelim 3-pela bilong lainim maus bilong bel bilong yumi.

Baibel i Givim Wanem Tingting long Yumi?

6, 7. Wanem wanpela rot na Baibel inap help yumi taim maus bilong bel i mas givim tingting bilong yumi?

⁶ Baibel em i Tok bilong God na i stret olgeta, na em i gat planti tok bilong helpim yumi long kisim tingting bilong God na lainim maus bilong bel. Olsem yumi toktok pinis long en, Josep i no gat wanpela hap rait bilong God i tambuim pamuk. Tasol bipo Josep i bin lainim stret maus bilong bel bilong em na em i save long tingting bilong God long pasin pamuk. Ating Josep i tingim laik bilong God bilong pastaim, em i laik bai man wantaim meri bilong em (“tupela”) bai kamap wanpela, na i no gat rot long namba 3 i kam insait na bagarapim marit bilong tupela. Na Josep i save pinis long samting i bin painim pren bilong God em Ebraham, na long dispela as tu em inap save long tingting bilong God long pasin pamuk.—Matyu 19:5; Jenesis 2:24; 20:1-18.

⁷ Samting i bin helpim Josep em inap helpim yumi tu. Olsem: Ating wanpela man bilong narapela ples o bilong narapela lain bai singautim yumi long i go kaikai wantaim em o mekim sampela wok bisnis wantaim em. Orait, yumi yet i mas tingim wanem samting bai yumi mekim. Tasol sapos yumi bin kisim save long Baibel, yumi save long tingting bilong God long man bilong narapela ples na skin—God i no save tingim lain o skin bilong man. Orait nau maus bilong bel inap daunim sampela tingting kranki yumi bin kisim taim yumi liklik yet, na nau bai yumi kirap bihainim maus bilong bel. (Aposel 10:34, 35; Jems 2:1-4) Ol dispela tok bilong Baibel i gat lo i stap insait long en, na ol dispela tok inap helpim yumi tu taim yumi laik skelim wanpela samting yumi mas mekim.

8. Taim yumi laik mekim wanpela samting na bel i mas stiaim tingting bilong yumi mas mekim wanem?

⁸ Taim wanpela samting i kamap na yumi mas tingim samting bai yumi mekim, yumi laik bai ‘bel bilong yumi i stap stret.’ Olsem na yumi mas wok long painim sampela tok bilong Jehova long dispela samting, long wanem, dispela bai helpim na lainim maus bilong bel bilong yumi na i stiaim tingting bilong yumi. (1Peter 3:16) Yumi ken wok long painim sampela lo stret bilong Baibel, tasol yumi mas lukluk tu long sampela tok bilong Baibel i gat lo bilong dispela samting i stap insait long en. Olsem wanem? Jisas i bin mekim wanpela tok o wanpela samting na em i kamapim tingting bilong em long dispela samting yumi mas skelim? Yumi ken lukluk long sampela buk i kamapim tok bilong Baibel long dispela samting. Na yumi ken toktok wantaim sampela Kristen na ating ol i ken helpim yumi long painim sampela tok bilong Baibel long dispela samting. Tasol yumi no ken ting ol yet i mas skelim ol samting yumi mas mekim. Nogat. Dispela em i wok bilong yumi. Na yumi no ken askim ol, ‘Sapos yu yet yu mas tingim na skelim dispela samting, bai yu mekim wanem?’—Galesia 6:5.

9. Taim maus bilong bel i mas stiaim yumi long mekim wanpela samting, yumi gat wanem laik long dispela?

⁹ Taim wanpela samting i kamap na Kristen i mas tingim wanem samting em bai mekim, gutpela Kristen i mas mekim ol samting bambai bel bilong em i stap stret na i stap isi long ai bilong God. Ol Kristen i mas amamas long tok olsem: “Bel bilong mipela i save tokaut long mipela i bin wokabaut long pasin holi na long pasin bilong klinpela bel God i bin givim mipela. … Mipela i bin wokabaut long dispela pasin namel long olgeta man. Na long yupela, mipela i bin mekim olsem moa yet.” (2 Korin 1:12, NT) Taim maus bilong bel i mas skelim ol samting man i mas mekim, orait ol samting Kristen i mekim long dispela taim i kamapim bel bilong em, em i laikim tumas Jehova na lo bilong em o nogat.

Dispela Bai Mekim Wanem long Narapela Man?

10, 11. Long kongrigesen bilong Korin bipo i gat sampela tok i kamap long kaikai, na dispela i givim wanem tingting long yumi long ol samting maus bilong bel i mas skelim?

¹⁰ Ol Kristen i laik bai maus bilong bel i kirapim ol long bihainim pasin bilong God, olsem na taim ol yet i mas skelim wanpela samting ol i mas mekim na i no gat wanpela lo stret long Baibel na ol i ken lukim, ol i mas tingim ol narapela man, nogut dispela samting ol i tingting long mekim em i nogutim bel bilong narapela Kristen. Kain samting olsem i bin kamap long bipo na aposel Pol i rait pas long ol Kristen long ol samting bilong kaikai.

¹¹ Long kongrigesen bilong Korin wanpela hevi i bin kamap; sampela Kristen i tingting planti long pasin bilong baim abus ol i bin ofaim long ol god giaman. Sapos ol man i bung na ofaim abus long god giaman bilong ol na Kristen i bung wantaim ol na kaikai dispela abus, em nau, dispela Kristen i lotuim god giaman. Tasol Pol i tok, sapos sampela hap abus i stap yet na ol i putim long wanpela haus kaikai klostu long haus lotu bilong ol, o ol i putim long maket bilong ol man nabaut ol i kam baim, i no gat rong long Kristen i balm dispela abus na em i kaikai. (1 Korin 8:10; 10:25; Aposel 15:29) Tasol sampela Kristen bipo ol i bin lotuim ol god giaman na nau ol i pret long kaikai ol kain abus olsem, maski dispela abus i stap long stua o maket na nau ol i no mekim samting bilong lotu long en. Tru, Pol i no laik helpim ol kain man bel bilong ol i no gat strong na bel i gat tok long ol liklik liklik samting i no gat rong long en. Tasol Pol i laik kirapim ol Kristen long tingim ol dispela brata bilong ol, nogut ol i mekim wanpela samting na i pundaunim ol dispela brata, o ol dispela brata i ting nau ol i gat rot bilong lotuim gen ol god giaman na bel bilong ol i orait long en.

12, 13. Bilong wanem yumi mas tingim maus bilong bel na tingting bilong ol narapela man? Stori long wanpela samting i bin kamap.

¹² Pol i gat stretpela tingting long dispela samting na yumi olgeta i mas kisim kain tingting olsem. Pol i tok : “Sapos kaikai [o narapela samting] i save mekim brata bilong mi i pundaun long sin, orait mi no ken kaikai mit gen moa, inap olgeta taim i pinis.” Sapos yumi tingting long mekim wanpela samting na em i samting bilong maus bilong bel i mas skelim, na yumi save i orait long yumi mekim olsem, tasol yumi no tingim maus bilong bel bilong ol narapela brata, em nau yumi “bagarapim dispela man i no gat strong, em dispela brata Krais i bin i dai bilong kisim bek em.” Sapos yumi mekim olsem bai God i no amamas long yumi. Pol i askim olsem: “Olsem wanem narapela man i skelim pasin bilong mi long tingting bilong em yet?” (1 Korin 8:3, 11-13; 10:29, NT) Maski man i ting, ‘Em i samting bilong mi yet, na mi ken bihainim maus bilong bel bilong mi,’ tasol dispela samting em i mekim i bagarapim bel bilong wanpela brata na i paundaunim em, ating Jehova bai bekim pe nogut long em. Olsem na nogut yumi ting sapos em i samting bilong maus bilong bel i skelim dispela samting, i orait long mi ken mekim.’ Sapos yumi ting olsem, yumi giamanim bel bilong yumi.

¹³ Yumi ken tingim stori bilong tupela marit ol i lainim tok bilong Baibel na ol i save go long ol miting na ol i tingting long kisim baptais. Wanpela elda bilong kongrigesen i tokim em long wanpela piksa wokabaut em i bin lukim, na em i tok em i laikim. Orait taim man i harim olsem, em i kirap nogut na em i tok, ‘Olsem wanem? Yu save go lukim kain piksa nogut olsem i gat pasin pamuk na pait na bagarapim man samting long en?’ Elda i lalk abrusim asua na em i tok, sampela piksa wokabaut olsem ol i gat sampela gutpela samting long en bilong helpim man sapos em i no tingim ol narapela hap bilong piksa i gat pasin nogut long en. Tasol ating tok bilong dispela elda i bagarapim bel bilong dispela nupela man na i pundaunim em liklik, long wanem, bihain long en dispela man i no kamap strong hariap olsem meri bilong em i mekim; i olsem dispela samting i pasim em liklik. Tasol sapos elda i bin tingim ol tok bilong Baibel olsem Kolosi 3:2-8, Efesas 5:3-5 na Matyu 7:12, ating ol dispela tok inap lainim gut bel bilong em na nau maus bilong bel bilong em inap stiaim gut ol tok na pasin bilong em.—1 Korin 9:22, 25-27.

14, 15. Sampela taim, olsem wanem maus bilong bel bilong lain elda i mas stiaim ol samting ol Kristen i tingting long mekim?

¹⁴ I gat narapela samting tu long pasin bilong tingim narapela man. Nogut yumi laik mekim wanpela samting na yumi askim ol long ol i ken orait long dispela samting, tasol bel bilong ol i gat tok long en. Sapos wanpela man na meri i laik marit insait long Haus Kingdom, tupela i mas askim ol elda pastaim, na ol elda i mas save tupela i laik wokim olsem wanem, na ol bai putim wanem ol bilas long Haus Kingdom, na ol kain samting olsem. Orait, ol elda yet i mas skelim samting, i gutpela o nogat. Ol elda bilong wanpela kongrigesen i bin rait pas na ol i tok: “Wanpela taim ol i wokim marit insait long Haus Kingdom na meri bilong marit i gat wanpela lain yangpela meri i bihainim em na i wokabaut i kam insait na olgeta ol i holim wanpela fen bilong ol na winim skin bilong ol. Orait bihain i gat narapela marit i kamap long Haus Kingdom na ol i tingting long ol samting ol i ken mekim na bai em i winim tru narapela marit bipo i kamap. Olsem na ol lain yangpela meri i bihainim meri bilong marit, olgeta wan wan i holim ambrela na i tantanim nabaut. Orait, bihain narapela marit gen i kamap na ating ol i laik winim dispela narapela bilong pastaim, na tupela i kisim 20 yangpela meri na 20 man bilong bihainim ol na sanap wantaim ol. Em nau, Haus Kingdom i laik kamap olsem haus pilai tasol.”

¹⁵ Orait yu ting dispela em i samting bilong bel bilong yumi yet i ken skelim? Nogat. Sapos man na meri i laik marit na tupela i laik wokim ol kain kain pasin kranki long taim bilong dispela marit, ol i no ken sakim maus bilong bel bilong lain elda; ol i mas tingim dispela samting. Tru ol elda i no laik bosim olgeta samting tupela i laik mekim na bai tupela i mas bihainim tasol laik bilong ol elda. Nogat. Tasol ol elda i gat bikpela tingting long kongrigesen i mas i stap bel isi na wanbel na tingim ol samting bilong spirit. Na ol elda i mas givim bel long helpim ol manmeri bambai ol i ken “save long pasin bilong stap gut long lain bilong God. Lain bilong God. … Em i olsem strongpela pos i karim tok tru.”—1 Timoti 3:15, NT; 1 Korin 10:31.

16. Sapos maus bilong bel i mas skelim wanpela samting yu mas mekim, orait yu mas tingim wanem samting?

¹⁶ Olsem na sapos maus bilong bel bilong yumi i mas skelim wanpela samting yumi bai mekim, yumi mas tingim gut tupela samting, olsem: (1) Baibel i gat wanem tok long dispela samting, na (2) samting yumi tingim pinis na yumi laik mekim, dispela bai mekim wanem iong ol narapela man. Tasol i gat namba tri samting i stap na em tu i bikpela samting.

Dispela Bai Mekim Wanem Long Yumi Yet?

17. Maus bilong bel bilong wanpela brata long Nu Yok i kirapim em long mekim wanem?

¹⁷ Wanpela nius, em Natural History bilong Ogas 1981 em i stori long wanpela lain wokman long Nu Yok ol i save raun long wilwil na karim ol pas na pasol i go long ol ol kampani na bikpela stua samting. Wanpela man i bin kisim dispela kain wok na ol i raitim stori bilong em long dispela nuis na ol i tok: “Donald i gat 41 krismas na em i gat wok long karim ol pas i go long ol man, na em inap lukautim meri bilong em wantaim pikinini man long pe em i kisim long dispela wok. Bipo Donald i gat narapela wok, em wok bilong wasim ol film na nau piksa i save kamap, tasol em i lusim ol dispela wok, long wanem em i wanpela Witnes Bilong Jehova na em i no orait long sampela piksa nogut em i mas wasim. Nau em i save mekim dispela wok bilong raun na karim ol pas samting na nau bel bi1ong em i no gat tok na em i stap bel isi, na em inap pinis wok long laik bilong em na putim dispela hap taim i go bilong autim tok bilong lotu long ol man.”

18. (a) Ating wanem samting i bin helpim brata long mekim olsem? (b) Yumi ken kisim wanem tinting long dispela?

¹⁸ Taim Kristen i tingim wanpela wok mani em bai mekim, i gat sampela samting em i mas tingim na skelim pastaim (lukim wanpela tok long pes 18, “Sampela Samting Bilong Wok Mani Yumi Mas Tingim”) Yumi ken tingim dispela kain wok Donald i bin mekim. Ating sampela Kristen i got wankain wok—ol i wok long wanpela kampani i save wasim ol film na piksa i kamap, ol liklik piksa bilong kamera o liklik piksa wokabaut o piksa bilong ol kampani bilong wokim bisines long en, o bikpela piksa wokabaut bilong ol haus piksa. Tasol isi isi kampani i save kisim sampela piksa nogut bilong wasim, em piksa bilong ol man na meri i mekim pasin nogut i gat sem. Em nau, maus bilong bel bilong Kristen bai i gat tok long dispela wok nogut Kristen i insait long en na sampela wok moa em i mas mekim na gavman i gat tambu long en. Orait, long dispela taim ating Kristen i tingting, nogut ol man em i save em i mekim dispela wok nogut, na nogut bos i tokim em long mekim wanpela wok i no stret. Olsem na Kristen i ting em i mas lusim dispela wok bambai em i ken “i stap stret, na bai ol man i no inap painim rong long em.” Dispela em i bikpela samting long ol man i laik holim wok insait long kongrigesen. Orait, taim Kristen i raun long painim narapela wok, em i ken i stap bel isi na Jehova bai helpim em. (1 Timoti 3:2, 8-10, NT; Rom 13:5) Ating planti Kristen i bin lusim ol kain wok nogut olsem, nogut pasin doti i pundaunim ol. (Lukim Matyu 5:28.) Olsem na taim maus bilong bel i mas skelim wanpela samting yumi mas mekim, yumi mas askim skin bilong yumi: ‘Sapos mi mekim dispela samting, o sapos mi no mekim, dispela bai mekim wanem long mi?’ Yumi no ken sakim maus bilong bel, nogut . em i go strong na i no inap pilim ol samting i no stret, na bihain yumi pundaun kwik na mekim wanpela pasin nogut.—1 Timoti 4:2; Jut 10; Efesas 4:18, 19.

19, 20. (a) Maus bilong bel na bilip i ken kirapim yumi long ting olsem wanem long wok bilong yumi long autim tok? (b) Maski yumi maniman o nogat, yumi mas i gat laik long mekim wanem?

¹⁹ Yumi ken tingim bek ol samting Donald i mekim bilong bihainim maus bilong bel. Em i laik i stap stret long ai bilong Jehova na bai Jehova i orait long em, na em i laik makim sampela hap taim moa bilong autim bilip bilong em long ol man. Pol tu i soim yumi olsem maus bilong bel i save wok wantaim bilip bilong yumi. Pol i tok: “Dispela lo nau mi givim long yu, sapos ol i bihainim, orait bai bel bilong ol i klin na i stap isi, na ol i bilip tru long Jisas. Na bai dispela olgeta pasin i kirapim ol long pasin bilong sori.”—1 Timoti 1:5, NT.

²⁰ Em i gutpela samting tru taim bilip bilong man na laik bilong em long kisim klinpela bel i kirapim em long stretim ol samting bilong em na bai ‘em i no ken wokabaut kranki,’ na bai em i ken skruim sampela hap taim moa long dispela wok bilong em long autim ‘olgeta tok bilong God’ long ol man. (Aposel 20:26, 27) Tasol yumi mas ting olsem wanem long sampela Kristen ol i gat bikpela hap taim bilong ol i ken mekim dispela wok, tasol ol i mekim liklik wok tasol? Ating ol i save kisim bikpela pe long wok mani o bisnis bilong ol, na ol i bungim pinis bikpela mani bilong givim gutpela sindaun long ol nau long dispela taim. Tasol ol i no amamas long mekim wok painia na putim olgeta hap taim bilong ol long autim tok na kamapim sampela disaipel. Nogat. Ol i wok yet long skruim bisnis bilong ol i go bikpela, na skruim haus bilong ol i go bikpela, na ol i wok long kisim planti gutpela gutpela samting bilong mekim sindaun bilong ol i gutpela tru.a Lukim Mak 10:17-22; Luk 12:16-21.) Em i no samting bilong yumi long skelim ol kain man olsem, long wanem, “yumi olgeta wan wan bai yumi mas tokim God long as bilong olgeta pasin yumi bin mekim.” Olsem na yumi mas larim bilip bilong yumi i kirapim yumi long mekim wok bilong God inap long strong bilong yumi olgeta, na bai bel bilong yumi i klin na i no gat tok long yumi.—Rom 14:1-4, 10-12, NT.

Klinpela Bel i Stiaim Yumi

21. Maus bilong bel inap mekim wanem long yumi?

²¹ Sapos maus bilong bel bilong Kristen i bin lain gut na i save pilim tru ol samting, dispela bai stiaim em long mekim ol samting i stret. Em i bin mekim olsem long Pol. Pol i save tingting oltaim long ‘ol brata bilong em,’ em ol wantok Juda, na em i rait pas long ol na i tok: “Holi Spirit i givim save long maus bilong bel bilong mi, na i helpim tok bilong mi tu. I olsem: Bel bilong mi i hevi tru na mi pilim nogut oltaim.” (Rom 9:1-3, NT) Tru tumas, Pol i givim bel tru long helpim ol long kisim gutpela tok bilong God.

22. Bilong wanem maus bilong bel inap kirapim yumi moa yet na i winim ol lo?

²² Na i mas wankain tasol long yumi. Sapos yumi pilim tru ol gutpela wok maus bilong bel inap mekim bilong helpim yumi, yumi no ken tingting tasol long yumi mas i gat ol lo bilong yumi ken lukim na bihainim. Ol lo i save makim wanpela hap wok yumi mas mekim na em tasol. Tasol sapos yumi gat pasin bilong sori na bilip, dispela bai kirapim maus bilong bel bilong yumi na em bai subim yumi long mekim bikpela wok moa long helpim ol man na daunim ol laik bilong yumi yet. Sapos olsem, orait maus bilong bel inap helpim tru yumi. Em bai pasim yumi bambai yumi no ken mekim sampela samting God i no orait long en, na em bai helpim yumi long mekim ol samting God i orait tru long en. Na taim maus bilong bel i stiaim yumi long mekim bikpela wok moa bilong autim gutpela tok long ol man, dispela bai helpim tru yumi. Wanem samting inap winim dispela gutpela pe Pol i bin tokim Timoti long en? Pol i tok: “Was gut long pasin yu yet yu mekim, na long wok bilong skulim ol man. Oltaim yu mas wok strong long dispela. Sapos yu mekim olsem, bai wok bilong yu em i mekim gut yu yet, na bai em i mekim gut ol man i harim maus bilong yu tu.”—1 Timoti 4:16, NT.

[Futnot]

Yu Inap Tingim?

□ Bilong wanem yumi no ken tok, ‘Sapos bel bilong mi i no gat tok long samting mi mekim, ating i no gat rong long mekim’?

□ Taim yu mas mekim wanpela samting na maus bilong bel i mas tingim, i gat wanem 3-pela samting yu mas tingting gut long en?

□ Yu gat wok long autim tok na litimapim nem bilong God. Orait maus bilong bel bilong yu i mas mekim wanem long dispela?

[Blok long pes 18]

Sampela Samting Bilong Wok Mani Yumi Mas Tingim

Sapos Kristen i laik kisim wanpela wok bilong skin, pastaim em i mas skelim dispela wok. Em i ken tingim tupela samting hia:

Baibel i makim dispela wok em i wok nogut?

Baibel i tok, stil, na lotuim god giaman, na mekim wok long blut, na ol samting olsem, em wok nogut, olsem na Kristen i no ken holim wok i gat ol dispela samting insait long en.

Sapos Kristen i wok long wanpela kampani samting, na wok Kristen i mekim em i stret, tasol sampela wok kampani i mekim em i no stret, orait Kristen tu i insait long dispela rong o nogat?

Sapos i gat wanpela hap bilong haus sik em ol man i save go na givim hap blut bilong ol long en, na wanpela man em i gat wok long bosim dua bilong dispela haus na bringim ol man i kam insait, em i helpim wanpela wok em Baibel i tambuim. O sapos man i lukautim dua tasol bilong woksop bilong wokim ol gan samting bilong pait, em i insait long wanpela wok Baibel i tambuim.—Levitikas 17:13, 14; Aisaia 2:2-4.

Na i gat sampela ol narapela samting tu em wokman i ken tingim:

Dispela wok i bilong helpim ol man na Baibel i no tambuim?

Wanpela wok, em bilong bringim ol pas long ol haus na kampani samting. Sapos Kristen i kisim dispela wok, na sampela taim em i mas bringim pas i go long haus bilong ol stilman o long wanpela kampani i save wokim ol god giaman, yu ting Kristen i gat rong?—Matyu 5:45.

Ol wok kampani i mekim, em i samting bilong husat?

Sapos Kristen i papa bilong wanpela stua, em i no ken putim ol god giaman na mit i gat blut long stua bilong en bilong baim i go long ol man. Dispela man i no wankain olsem wanpela man i wok long stua na stua i gat planti tausen kain kain samting na em i gat smok na sosis ol i wokim long blut tu i stap long stua.

Man i insait tru long dispela wok?

Wanpela man i wok long wanpela stua i gat planti kain samting i stap long en, na i gat smok tu, na taim ol man i baim ol samting, em wok bilong dispela man long kisim mani bilong ol dispela samting ol man i baim pinis. Tasol narapela stua i gat ol smok tasol, na wanpela man i wok long en na wok bilong em long kisim mani long ol man i baim smok.

Taim wokman hia i kisim pe bilong em yet, dispela pe i kam we? Na em i save mekim we wok bilong em?

Long sampela hap, gavman i givim wok long ol misin long bosim ol wok bilong ples, na wokman i kisim pe bilong em long misin. Tasol wok bilong em long lukautim ol pak, na pak i no bilong misin; pak i bilong olgeta man bilong raun long en. Na dispela wok i no bilong lotu na i no bilong helpim lotu giaman.

Sapos man i holim wanpela wok, dispela bai mekim wanem long narapela man na long em yet?

Dispela samting bai pundaunim sampela man na em i gat asua? (1 Timoti 3:2, 10) Na dispela wok bai mekim wanem long maus bilong bel bilong dispela wokman?

[Piksa long pes 14]

Wanpela Kristen i ken helpim yu long painim sampela tok long Baibel long wanpela samting maus bilong bel i mas skelim

[Piksa long pes 16]

Sapos yu mekim wanpela samting, dispela bai mekim wanem long narapela man?