Bilip Bilong Yu i Bikpela Samting—Olsem Rom i Stori Long En

YU MAS mekim wanem bambai God i ken amamas long yu?

Ating bai yu bekim tok olsem: Bihainim gutpela pasin. No ken rongim wanpela man. Givim sampela samting long God. Bihainim lo bilong God. Mekim gutpela wok. Bilip long Krais. Givim bel long lotu.

Ol dispela samting i gutpela. Yumi mas mekim ol dispela bambai God i ken orait long yumi. Tasol i gat wanpela samting moa i bikpela samting tru, na sapos yumi no gat dispela samting, orait ol samting yumi kolim pinis ol i no inap helpim yumi. Dispela samting em BILIP.

Tasol ating bai yu tok, ‘Mi gat bilip, na mi save em i bikpela samting.’ Tasol yumi mas tingim wanpela tok i stap long hap bilong Rom long Baibel, em aposel Pol i tok: “Gutnius em i strong bilong God, inap long kisim bek olgeta man i bilip, . . . ‘Man i bilip, bai God i kolim em stretpela man na dispela man i stap laip.”’ Rom 1:16, 17) Olsem wanem? God bai kisim bek olgeta man i gat bilip? Sapos yumi bilip, yumi mas mekim wok Kristen tu, o bilip tasol em inap? Yumi ken kaunim pas Pol i raitim long ol Rom na yumi inap save long bekim bilong ol dispela askim.

Olsem wanem? Yu bin kaunim hap bilong Rom long Baibel? Yu bin kaunim planti taim? Ol i tok, long dispela hap bilong Baibel long Rom Pol i kolim tok bilong gutnius planti taim. Sapos yumi kaunim planti taim, olsem yumi “kaikai” dispela tok planti taim, bai yumi pilim em i “swit” moa.

Long Rot Bilong Bilip God i Kisim Bek Yumi

Ol Kristen bilong pastaim ol i laik save, God inap orait long lain Juda na ol man bilong ol narapela lain tu? Em inap tingim tupela lain wantaim i stretpela man, o nogat? God i kirapim Pol long raitim pas i go long ol Kristen long Rom bilong tokim ol long ol dispela samting. Dispela rait bilong Pol em i bikpela samting bilong helpim laip bilong yumi tu taim yumi wok long holim bilip na painim rot bambai God i ken kisim bek yumi. Na sapos yumi ting sampela lain i winim ol narapela lain, orait tok bilong Rom bai stretim tingting bilong yumi.

Nau yumi ken skelim sampela tok bilong Rom na bai yumi ken save gut long tok bilong Pol. Sapos yu kaunim ol wan wan ves bilong Rom, ating yu no inap pilim tru samting Pol i laik kamapim insait long dispela pas, tasol sapos yu kaunim Rom wantaim dispela tok nau yu kaunim, bai yu kisim gut as bilong ol tok Pol i laik mekim.

Taim Pol i kirapim tok bilong em, em i mekim wanpela gutpela liklik tok pastaim na em i tok em i laik i go lukim kongrigesen long Rom, na nau em i kamapim strongpela tok: Em i tok, God i no save laikim sampela lain tasol na sampela nogat; God “inap long kisim bek olgeta man i bilip,” maski em i Juda o em i man bilong narapela lain. Tru long nau ol man i no save tingting tumas long God i ting olsem wanem long ol Juda o man bilong narapela lain, tasol tok bilong Pol long bilip em i bikpela samting long yumi. Bilong wanem olgeta man i mas bilip.—Rom 1:1-17.

Olgeta man i gat sin, na inap long belhat bilong God i painim ol. Olsem ol lain i no Juda ol i save mekim, ol i sakim God tru na ol i ting em i no stap, na ol i save lotuim ol samting God i bin wokim, na ol i mekim ol kain pasin nogut tu. (Rom 1:18-32) Ol Juda i gat tok long ol dispela lain, tasol ol Juda tu i gat rong wantaim ol dispela lain, na kot bilong God inap painim ol tu. Bilong wanem? Long wanem, ol Juda i gat lo bilong God, na ol i tok ol i save lainim ol man long en. Ol narapela lain i gat maus bilong bel, na dispela i tokim ol long bihainim pasin i stret. Olsem na sapos man i bihainim pasin bilong katim skin o nogat, dispela i no bikpela samting long ai bilong God.^—Rom 2:1-29.

Pol i tok, God i givim Baibel long ol Juda, na Baibel i tok, sin o rong i stap long skin bilong olgeta man. Olsem na i mas i gat wanpela rot bilong helpim ol man long kamap olsem stretpela man. Orait God i givim wanpela rot long ol bambai ol i ken kamap stretpela man long ai bilong em. Dispela rot, em ol i mas bilip long rot bilong Krais. Bilip i winim ol wok bilong lo. Olsem wanem yumi inap save long dispela samting? Long wanem, taim Ebraham i no katim yet skin bilong em, na taim ol Isrel i no kisim yet lo, long dispela taim bipo God i tingim Ebraham em i stretpela man, long wanem, Ebraham i bilip. God i lukim bilip bilong Ebraham na God i givim wanpela tok promis long em, na taim God i truim dispela tok promis, bai olgeta man i kisim gutpela samting long en, maski ol i bilong wanem wanem lain.—Rom 3:1-4:25.

Em nau, yumi save bilip em i bikpela samting bilong ol Kristen. Sampela Kristen ol i bilong i go i stap long heven, na God i mas makim ol i stretpela man na em i mas givim spirit holi long ol. Tasol pastaim ol i mas bilip. Tasol yumi olgeta i ken tenkyu long God, long wanem, sapos yumi bilip bai God i ken orait long yumi! Bipo, taim God i no givim yet lo long Moses, olgeta man i stap sinman, olsem na ol i mas i dai. Bihain Moses i kisim lo na lo i mekim sin i kamap ples klia. Adam yet i bin putim dispela sin long ol man. Wanem samting inap long winim na daunim ol samting nogut sin i mekim long yumi? Em dispela samting: Jisas i bin bihainim stretpela pasin i go inap long em i dai, na dai bilong em i gat strong inap long baim rong o sin bilong yumi. Sapos yumi bilip long dispela samting, orait yumi ken tingting long “kisim laip i stap oltaim oltaim.”—Rom 5:1-21.

Pasin Bilong Yumi i Mas Stret Wantaim Bilip Bilong Yumi

Na sapos yumi kaunim moa i go, bai yumi lukim sampela tok moa bilong Pol, em i toktok long wanpela tingting kranki sampela man inap kisim, olsem: Sapos man i mekim rong na God i sori long em na i lusim tingting long rong bilong dispela man, orait man i ken kirap mekim rong gen. Tasol dispela tingting i kranki tru! Pol i tok, sapos God i lusim tingting long rong bilong Kristen, orait Kristen i no ken larim rong o sin i bosim em moa; em i mas daunim. I olsem: Bipo sin i stap olsem bosman bilong yumi na yumi bin bihainim tok na laik bilong en, tasol nau dispela bos i dai pinis na yumi no ken bihainim moa tok bilong en. Nau yumi gat nupela bosman, em God. Nau yumi mas bilip na i stap olsem “wokboi bilong stretpela pasin” na “i stap holi long olgeta wokabaut bilong [yumi] na . . . kisim laip i stap oltaim oltaim.”—Rom 6:1-23.

Yumi mas taitim bun na bai yumi inap bihainim pasin Kristen na pasin bilong bilip. I no olsem yumi mas wok long bihainim lo bilong Moses. Nogat. Bipo ol man i stap aninit long dispela lo, tasol ol i no inap bihainim tru. Tasol nau ol i aut long dispela lo na ol i no aninit moa long en, olsem meri i no aninit moa long man bilong em taim man i dai pinis. Wanpela tok bilong Pol inap mekim gut bel bilong yumi. Em i tok, em i laik abrusim sin olgeta na bai em i no ken mekim, tasol em i no inap abrusim olgeta; sampela taim em i save popaia na mekim sin. Tasol Pol i save, Jisas i bin kisim em bek na em i no lus. Na Jisas i mekim olsem long yumi tu.—Rom 7:1-25.

Dispela lain em God i bin kisim bek na ol i stap olsem pikinini spirit bilong em, ol bai mekim wok king long heven wantaim Krais Jisas. Ol i tingim dispela samting na ol i wetim i stap. Na olgeta Kristen i sanap strong long bilip ol i ken save, sapos ol i tingim God na wetim em, bai em i helpim ol. Sapos yumi bihainim tok bilong God, bai em i mekim pasin sori long yumi long rot bilong Krais. (Rom 8:1-39) Yumi ken bilip tru olsem God bai mekim olgeta gutpela samting olsem em i gat laik long mekim. Ol dispela samting bai kamap tru. Bipo God i mekim Jekop long mekim sampela wok, na God i mekim sampela samting long Fero tu bilong kamapim laik bilong em, na dispela i mekim gutpela wok. Klostu olgeta Juda i no bilip long Krais, tasol God bai kisim bek olgeta man i bilip long Krais. Em gutpela tok tru, a? Tasol yumi mas kamapim dispela bilip na autim gutpela tok bambai ol man bilong olgeta lain ol i ken harim na ol tu i ken bilip.—Rom 9:1-10:15.

Bipo ol Juda i stap gut long ai bilong God na em i orait long ol, na sapos ol i bin i stap olsem, bai ol i paslain long i go i stap laip long heven na i stap “Isrel tru bilong God.” Tasol ol i no bin i stap gutpela. Olsem na God i rausim dispela lain na em i kisim ol man bilong ol narapela lain, olsem senis bilong ol Juda. I olsem man i katim na rausim han bilong diwai, em ol Juda, na em i skruim nupela han bilong diwai i go bek long dispela diwai, em ol man bilong ol narapela lain, em ol i bilip long Krais. Ol man God i bin sori long ol, ol i mas wok yet long holimpas bilip bambai God i ken kisim bek ol.—Galesia 6:16; Rom 10:16-11:36.

Olsem na yumi mas autim tok na helpim ol narapela man long kisim save long gutpela tok bilong Baibel. Tasol wanem samting moa yumi mas mekim? Bekim bilong dispela askim i stap long Rom 12:1 i go inap 13:14. Em i tok, yumi Kristen yumi no ken i stap wankain olsem ol man bilong dispela graun na bihainim pasin nogut bilong graun. Yumi no ken hambak na ting yumi gat save o yumi gutpela man o yumi gat namba o nem. Yumi mas sori long ol man na mekim gut long ol. Yumi mas mekim gutpela pasin na gutpela wok na dispela bai daunim pasin na wok nogut na bai gutpela pasin na gutpela wok i win. Na taim yu kaunim dispela hap bilong Rom bai yu lukim sampela gutpela pasin moa yu ken bihainim. Wanpela tok bilong Rom em i tok, yu mas bihainim tok bilong gavman.

Na Rom i kolim narapela wok tu bilong Kristen: Yumi no ken mekim sampela samting em inap mekim narapela man i hevi o pundaunim em, maski i no gat lo i tok yumi no ken mekim. Yumi mas tingim narapela man; i olsem yumi karim hevi bilong em. Yumi no ken tingim amamas bilong yumi tasol. Yumi mas bihainim pasin bilong Krais. Yumi mas wok long mekim ol samting bambai yumi olgeta i ken i stap isi na pas gut wantaim na i stap wanbel.—Rom 14:1-15:16.

Na taim yu kaunim tupela laspela sapta bilong Rom yu ken save, Pol yet i bihainim tru bilip bilong em. Em i gat wok long autim tok long ol man bilong narapela lain, na em i givim bel tru long mekim dispela wok. Em i go lukim kongrigesen long Rom na em i gat tingting tu long i go long Spen. Spen i stap longwe tru long hap bilong Wes, na i stap aninit long gavman bilong Rom, na Pol i no bin i go yet long dispela hap. Pol i givim planti gude long sampela ol wan wan Kristen long Rom, olsem na yumi save, bilip bilong Pol i kirapim em long mekim ol gutpela wok bilong helpim ol man.

Tru tumas, ol tok bilong Rom i helpim yumi na yumi ken save, bilip i winim ol wok bilong lo bilong Moses, na God inap laikim olgeta man i gat bilip, na ol i ken tingting long kamap stretpela man long ai bilong God na kisim laip i stap oltaim. Olsem na yumi mas holimpas bilip bilong yumi na bihainim ol samting bilong dispela bilip.