Ol Pikinini i Laik Bai i Gat—Lo Bilong Bosim Ol o Nogat?
DOKTA Harry Mendelsohn (em dairekta bilong helpim ol famili long Haus Sik na Medikal Senta Montefiore long Nu Yok) em i tok: “Maski long skin pikinini i olsem bikpela pinis, tasol em i pikinini yet” Na i mas i gat lo bilong bosim em. Dispela dokta i tok: “Papa o mama i mas bosim pikinini. Ol pikinini i no ken bosim famili. Gutpela sapos ol pikinini i kamapim tingting bilong ol na papamama i ken kirapim ol long mekim olsem, tasol papamama i bos. Papamama i mas putim ol lo bilong bosim ol pikinini. Ol i mas kolim stret ol samting pikinini i ken mekim na i no ken mekim, na planti taim ol i mas kolim kolim ol dispela lo. I no stret sapos pikinini i putim lo bilong ol yet.”—Nius bilong Nu Yok, Daily News, bilong 13 Septemba 1981.
Adminestreta bilong wanpela yut-senta i tok: ‘Ol pikinini i save giaman. Ol i tok ol i no laik bai i gat lo bilong bosim ol, tasol sapos ol i kamapim tingting tru bilong ol bai yu save, ol i laikim ol lo. Ol i tingim ol gutpela lo i olsem mak bilong papamama i sori long ol’
Tasol ol pikinini i wanbel long dispela tok? Sampela manki long wanpela ples kalabus bilong ol manki i bin mekim pasin nogut, ol i tokim ol papamama, olsem:
“Yupela i no ken larim mipela. Yupela i mas putim lo na sapos mipela i no bihainim, yupela i mas givim strafe. Mipela mas save yupela i stap bos. Dispela samting i helpim mipela long i stap belgut, long wanem mipela save yupela i laik helpim mipela.
“Yupela i mas soim rot long mipela. Yupela i mas tokim mipela, God i no i dai, na em i no slip, o i go lip. Mipela mas i gat samting bilong bilip long en, samting i bikpela na i strongpela na i winim mipela.
“Sapos yupela i lukim mipela i mekim tok giaman, o stil, o mekim pasin nogut long narapela man, yupela mas tokim mipela bilong wanem dispela pasin i no stret. Na yupela mas givim strafe long mipela, tasol yupela mas tokim mipela tu yupela laikim yet mipela.”
“Yupela i no ken larim mipela i giamanim yupela. Yupela i mas strong na i no ken pret taim mipela i tok mipela bai lusim skul o ranawe lusim haus. Yupela mas sanap strong. Ol pikinini i no laik kisim tru olgeta samting ol i tok ol i laik kisim.”—“Rules for Parents by Boys in a Reform School.”
Papa i gat bikpela save, winim olgeta narapela papa, em Man i save tru long rot bilong lukautim gut ol pikinini, em God Jehova, em i kamapim gut ol dispela samting long wanpela tok em i mekim long Baibel. Em i tok: “Yupela papa, yupela i no ken bagarapim bel bilong ol pikinini bilong yupela na ol i belhat. Nogat. Yupela i mas lukautim ol gut, na skulim ol long tok bilong Bikpela.” (Efesas 6:4) Man bilong wokim olgeta samting i save long ol samting bilong helpim tru ol pikinini, na ol samting bilong helpim ol papamama.