Baibel i Tok Wanem?
Skulim Ol Pikinini Long Tok Bilong God
“Rot Bilong Putim Ol Lo Em Ol Pikinini i No Ken Sakim”
“Faipela Bikpela Samting Yu Mas Skulim Pikinini Long En Taim Em i No Winim Yet Faipela Krismas”
“Faipela Samting Bilong Strongim Tingting na Bel Em Olgeta Pikinini i Mas i Gat”
“Faipela Mak i Makim Olsem Yu Isi Tumas Long Ol”
“Pasin Bilong Stretim Gut Pikinini Insait Long Wan-Minit Tasol”
SAPOS wok bilong skulim ol pikinini em i isi, bai i no gat planti man i gat laik long ritim ol stori bilong nius olsem yumi lukim long lista antap. Wok bilong raitim planti buk long pasin bilong mekim bikpela long ol pikinini, dispela wok bai pinis. Tasol pasin bilong mekim bikpela long ol pikinini i gat bikpela hatwok. Long bipo tu, inap planti tausen yia i go pinis, ol i save tok olsem “sapos man i bihainim longlong pasin, bai papamama bilong en i bel nogut na bel hevi tru.”—Sindaun 17:25.
Long nau, maski i gat planti tok bilong helpim papamama long dispela samting, planti papamama i no save long olsem wanem bai ol i stretim ol pikinini. Baibel i gat wanem ol tok bilong helpim ol?
Insait Tru Bilong Dispela Tok Skulim
Baibel i kamapim klia wok bilong ol papamama long skulim ol pikinini. Olsem, Efesus 6:4 i tok: “Yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.” Dispela skripsa i kolim papa olsem man bilong go pas long lukautim ol pikinini. Tasol mama tu i mas wok gut wantaim man bilong em.
Buk The Interpreter’s Dictionary of the Bible i tok long dispela olsem: “Long Baibel, wok bilong skulim ol pikinini i klostu wankain long wok bilong trening, lainim, na givim save long ol, na tu, givim tok bilong stretim ol, na givim strafe. Olgeta dispela wok i bilong skulim ol pikinini.” Olsem na papamama i no ken givim tok bilong stretim pikinini na em tasol. Bilong skulim gut pikinini, ol i mas givim kain kain skul long em na bai em i ken kamap gutpela. Tasol olsem wanem papamama i ken abrusim pasin bilong bagarapim bel bilong pikinini?
Pilim Hevi Bilong Ol
Wanem samting i save bagarapim bel bilong pikinini? Tingim dispela samting. Yu gat wanpela wanwok i man bilong belhat na kros na i no save stap isi. Em i no save amamas long wanpela samting yu mekim. Em i laik painim popaia long olgeta tok na samting yu mekim. Planti taim em i sakim ol wok bilong yu na mekim yu pilim olsem em i no laikim yu. Yu pilim olsem dispela i bagarapim bel bilong yu na yu bel hevi, laka?
Em wankain tasol long pikinini taim papamama bilong em i toktok toktok long olgeta samting em i mekim o stretim em wantaim belhat. Em tru ol pikinini i mas kisim tok bilong stretim ol long sampela taim, na Baibel i givim dispela wok long ol papamama. Tasol pasin bilong stretim pikinini long hatpela pasin, dispela inap bagarapim bel bilong em, na inap nogutim em long samting bilong spirit na bilong skin tu.
I Stret Yu Mas Tingim Ol Pikinini
Papamama i mas makim taim bilong mekim ol samting wantaim ol pikinini. Long Buk Lo 6:7, lo bilong God i tokim ol papa: “Yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” Taim mama i karim pikinini, pikinini i gat laik long papamama i mas tingim tru em. Sapos yu toktok gut wantaim ol pikinini long olgeta de, dispela bai helpim yu long save long samting ol i save pilim. Dispela bai mekim na i no hatwok long putim ol stiatok bilong Baibel i go daun long bel bilong ol, na kirapim ol long “aninit long God tasol na bihainim ol lo bilong em.” (Saveman 12:13) Dispela em hap wok bilong pasin bilong skulim pikinini long lo bilong God.
Sapos pasin bilong mekim bikpela long ol pikinini i wankain long pasin bilong wokim haus, orait wok bilong skulim ol i olsem wanpela tul bilong wokim haus. Taim papamama i mekim gut wok long en, ol inap wokim, olsem putim, ol gutpela pasin insait long ol pikinini na helpim ol long taim hevi i painim ol. Sindaun 23:24, 25 i stori long gutpela samting i kamap, olsem: “Sapos man i gat gutpela tingting na i bihainim stretpela pasin, orait papa bilong en i save amamas tru. Yu mas bihainim ol dispela gutpela pasin, na bai papamama bilong yu i belgut tru na i amamas.”
[Blok/Piksa long pes 25]
“SKULIM OL LONG TOK BILONG BIKPELA”
Efesus 6:4 i kolim dispela tok “skulim ol long tok bilong Bikpela.” Long tok Grik bilong bipo, dispela tok “skulim,” sampela Baibel i tanim olsem “tingim gut” “tok kaunsel” na “tok bilong stretim.” Dispela ol tok i makim olsem i gat sampela samting moa ol famili mas mekim winim pasin bilong ritim tasol Baibel o mekim stadi tasol long wanpela buk bilong Baibel. Papamama i mas save gut olsem ol pikinini i kisimgut insait bilong Tok Bilong God, bilong wanem em i bikpela samting long bihainim tok, pasin laikim bilong Jehova long ol, na em i tok long was long ol.
Olsem wanem ol inap mekim gut dispela wok? Judy, em mama i gat tripela pikinini, i luksave olsem i gat sampela samting moa em i mas mekim, em i no ken toktok toktok tasol long ol stiatok bilong God. “Mi lukim olsem ol i no laik bai mi mekim wankain tok tasol na long wankain pasin long olgeta taim. Mi kirap painim narapela rot bilong skulim ol. Wanpela rot em mi painim ol stori long nius Kirap! i kamapim dispela tok na traim nupela pasin bilong skulim ol. Nau mi bin lain olsem mi inap givim ol tok em ol i mas kisim na mi no bagarapim bel bilong ol.”
Angelo, em famili bilong em i bin kisim bikpela hevi, em i stori long olsem wanem em i bin skulim ol pikinini meri bilong em long tingim tingim Tok Bilong God: “Mipela i save ritim ol ves bilong Baibel wantaim, na bihain mi kisim sampela hap tok bilong ol ves na stori gut long olsem wanem dispela hap tok i stret long ol. Bihain, taim ol yet i ritim Baibel, mi lukim olsem ol i save tingting tru long dispela tok na tingim tingim olsem wanem dispela tok i stret long ol.