Baibel i Tok Wanem?

Tingim Gut Ol Pikinini

OLSEM WANEM? Pikinini Bilong God i bin i gat haptaim bilong i stap wantaim ol pikinini? Sampela disaipel bilong em ol i ting nogat. Wanpela taim ol i laik pasim ol liklik pikinini long kam long Jisas. Em i tokim ol: “Yupela larim ol pikinini i kam long mi. Yupela i no ken pasim ol.” Ol i kam long em na em i amamas long toktok wantaim ol. (Mak 10:​13-​16) Long dispela pasin Jisas i soim olsem em i tingim gut ol pikinini. Olsem wanem ol papamama long nau i ken bihainim pasin bilong Jisas? Ol i mas skulim gut ol pikinini bilong ol na lusim haptaim bilong stap wantaim ol.

Ol gutpela papamama i save helpim ol pikinini bilong ol long i stap gut​—ol i no save mekim nogut long ol, nogat. Ol i save rispektim na tingim gut ol. Tasol Baibel i tokaut olsem planti manmeri long taim bilong yumi bai i no gat moa pasin bilong “stap pren bilong ol arapela.” (2 Timoti 3:​1-3) Na long ol papamama i holim strong pasin bilong laikim tru ol pikinini bilong ol, oltaim i gat ol samting ol inap lainim bilong helpim wok bilong ol i kamap gutpela moa. Kain papamama olsem i save amamas long ol stiatok bilong Baibel i stap daunbilo.

Skulim Ol, Tasol No Ken Mekim Ol i Belhat

Robert Coles, wanpela tisa na dokta bilong stretim sik bilong tingting, em i tok: “Ol pikinini i gat pasin we ol inap tingim wanem pasin i stret na wanem pasin i no stret. Mi ting em samting God yet i bin givim long ol. Ol i gat bikpela laik long narapela i mas stiaim ol long stretpela pasin ol i mas bihainim.” Husat i gat wok long helpim ol olsem?

Long Efesus 6:​4, Baibel i tok: “Yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.” Lukim, dispela skripsa i tok em wok bilong papa long lainim ol pikinini long laikim tumas God na ol lo bilong Em. Long ves 1 bilong Efesus sapta 6, aposel Pol i stori long papa na mama wantaim, taim em i tokim ol pikinini long ‘bihainim tok bilong papamama bilong ol.’a

Tru, sapos i no gat papa, orait mama i mas mekim dispela wok. Planti mama wanpis i bin mekim gut wok bilong mekim bikpela long ol pikinini bilong ol na skulim na lainim ol long ol tok bilong God Jehova. Tasol sapos mama i maritim wanpela man Kristen, orait dispela man i mas go pas long lainim ol pikinini. Mama i mas orait long bihainim man bilong em long lainim na skulim ol pikinini bilong ol.

Olsem wanem yu inap skulim ol pikinini na abrusim pasin bilong mekim ol i “belhat”? I gat kain kain rot bilong mekim, long wanem, ol pikinini wan wan i narapela narapela kain. Olsem na ol papamama i mas tingim gut pasin ol i bihainim bilong skulim ol pikinini bilong ol, na oltaim soim rispek na laikim tru ol. Baibel i stori gen long dispela pasin​—no ken mekim ol pikinini i belhat​—long Kolosi 3:​21. Dispela ves i tokim ol papa: “Yupela i no ken mekim ol pikinini bilong yupela i kros, nogut ol i pilim olsem ol i no inap mekim wanpela gutpela wok.”

Sampela papamama i save singaut na bikmaus long ol pikinini bilong ol. Dispela i save mekim ol pikinini i kros. Olsem na Baibel i tok: “Yupela i mas rausim olgeta pasin bilong bel nogut na kros na belhat na bikmaus na tok bilas.” (Efesus 4:​31) Na Baibel i tok: “Wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man.”​—2 Timoti 2:​24.

Lusim Haptaim Wantaim Ol

Bilong tingim gut ol pikinini, yu mas mekim narapela samting tu​—yu mas redi long lusim sampela samting yu yet i laik mekim. Baibel i tok: “Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.”​—Lo 6:​6, 7.

Long nau, wok mani bilong papamama inap pulim bikpela haptaim bilong ol, olsem na i no planti papamama inap stap wantaim ol pikinini, kirap long moningtaim i go inap apinun. Tasol Buk Lo i tok papamama i “mas” makim haptaim bilong i stap wantaim ol liklik pikinini bilong ol. Bilong mekim olsem, papamama i mas stretim gut wok bilong ol na lusim sampela samting ol yet i laik mekim. Yes, i mas i gat haptaim bilong ol pikinini i ken stap wantaim papamama.

Wanpela lain i skelim 12,000 yangpela i gat 13 krismas samting na ol i kisim save olsem: “Taim pikinini i pas gut wantaim papa o mama, dispela i save mekim na pikinini i gat gutpela helt na em i abrusim ol pasin em inap kisim bagarap long en.” Yes, ol pikinini i gat bikpela laik long papamama bilong ol i tingim gut ol. Wanpela mama i bin askim ol pikinini bilong em, “Sapos yu inap kisim wanem wanem samting yu laikim, bai yu laikim wanem samting?” Olgeta 4-pela i tok: “Mama na Papa i mas lusim bikpela haptaim moa wantaim mipela.”

Olsem na bilong papa na mama i ken mekim gut wok bilong ol, ol i mas inapim ol pikinini long ol samting ol i mas kisim​—ol i mas inapim laik bilong ol pikinini long kisim save long ol samting bilong spirit na long pren gut wantaim papamama bilong ol. Gutpela papa na mama i mas helpim ol pikinini long kamap man o meri i save gut long mekim wok, rispek long ol arapela, mekim pasin i stret, mekim gutpela pasin long ol arapela, na pasin bilong ol i mas givim glori long Man Bilong Wokim ol. (1 Samuel 2:​26) Yes, taim ol papamama i skulim na lainim ol pikinini bilong ol olsem God i save laikim, ol i inapim gut wok bilong ol.

[Futnot]

[Piksa long pes 13]

Pasin bilong singaut na bikmaus long pikinini inap mekim em i bel hevi

[Piksa long pes 13]

Lusim haptaim wantaim ol pikinini bilong yu