Gutpela Wok Bilong Ol Mama

PLANTI man i no save pilim gutpela wok ol mama i mekim na ol i daunim dispela wok. Inap olsem 30 o 40 yia i go pinis, sampela i kirap daunim wok bilong ol mama long lukautim ol pikinini. Ol i ting, gutpela wok mani i bikpela samting winim wok bilong lukautim ol pikinini, na dispela wok i givim bikpela hatwok tumas long ol mama. Ating planti manmeri i ting dispela tingting i no stret, tasol ol i mekim sampela pasin na ol mama i pilim olsem ol wok bilong haus na wok bilong lukautim ol pikinini i olsem wanpela wok nating. Na sampela i ting olsem ol meri i mas mekim sampela wok mani samting bilong kamapim klia save bilong ol.

Tasol planti man marit na pikinini ol i pilim tru wok bilong ol mama insait long famili. Carlo, em i mekim wok long brens ofis bilong ol Witnes Bilong Jehova long Filipins, em i tok: “Nau mi wok long hia, long wanem, mama i bin skulim mi gut. Papa bilong mipela em i man bilong stretim kwik mipela, tasol Mama i bin helpim mipela long rot bilong toktok gut wantaim mipela. Mi amamas tru long pasin bilong em long skulim mipela.”

Peter, long Saut Afrika, em i wanpela bilong 6-pela pikinini, na mama i no bin skul gut i bin mekim bikpela long ol. Papa bilong em i bin lusim famili. Peter i tok: “Mama i mekim wok olsem hausmeri na wokmeri bilong klinim ol ofis samting, na em i kisim liklik pe tasol. I hatwok long em long baim skulfi bilong mipela olgeta pikinini. Planti taim mipela i hangre taim mipela i go slip. Em hatwok long mama long baim rent bilong haus. Tasol maski i gat ol dispela hatwok, Mama i no givap. Em i skulim mipela olsem mipela i no ken skelim mipela yet wantaim ol narapela. Sapos em i no bin strong long mekim bikpela hatwok olsem, mipela i no inap stretim gut sindaun bilong mipela.”

Wanpela maritman bilong Naijiria, Ahmed, em i tokaut long em i pilim olsem wanem long helpim bilong meri bilong em long mekim bikpela long ol pikinini, em i tok: “Mi amamas long wok bilong meri bilong mi. Taim mi no stap long haus, mi save olsem em i lukautim gut ol pikinini. Mi no ting olsem meri i laik winim mi, nogat, mi tenkyu long em na mi tokim ol pikinini long ol i mas rispektim mama olsem ol i save rispektim mi.”

Wanpela man Palestain i litimapim nem bilong meri bilong em long gutpela wok em i mekim olsem mama: “Lina i helpim gut pikinini meri bilong mipela na em i bin mekim bikpela samting long helpim famili long ol samting bilong spirit. Mi ting, ol bilip bilong lotu bilong em i save mekim na wok bilong em i kamap gutpela.” Lina i wanpela Witnes Bilong Jehova na em i bihainim ol stiatok bilong Baibel bilong skulim pikinini meri bilong em.

Wanem sampela stiatok olsem? Yumi ken tok wanem long tingting bilong Baibel long ol mama? Long bipo, olsem wanem ol i soim rispek na litimapim nem bilong ol mama long wok ol i mekim bilong skulim ol pikinini?

Stretpela Tingting Long Ol Mama

Long taim God i wokim Adam na Iv ol meri i kisim gutpela wok insait long famili. Namba wan buk bilong Baibel i tok: “God, Bikpela i tok olsem, ‘Em i no gutpela long dispela man i stap wanpis. Mi mas mekim kamap wanpela poroman bilong helpim em.’ ” (Stat 2:18) Olsem na namba wan meri, Iv, em i kamap olsem poroman, o helpim, bilong Adam. God i wokim em bilong kamap gutpela helpim tru bilong Adam. God i gat tingting long man na meri i ken kamapim pikinini na lukautim ol na lukautim graun na ol animal. Meri bai strongim tingting na bel bilong poroman bilong em. Adam i amamas tru long kisim dispela gutpela presen long Man Bilong Wokim ol samting!​—Stat 1:​26-​28; 2:23.

Bihain, God i kamapim ol tok bilong stiaim ol man long pasin ol i mas mekim long ol meri. Olsem: Ol Israel i mas litimapim nem bilong ol mama na ol i no ken daunim ol. Sapos wanpela pikinini man “i tok nogut long papa o long mama,” ol i mas kilim pikinini i dai. Baibel i kirapim ol yangpela Kristen long “bihainim tok bilong papamama bilong [ol].”​—Wok Pris 19:3; 20:9; Efesus 6:1; Lo 5:​16; 27:16; Sindaun 30:17.

Aninit long wok bos bilong man bilong em, mama i mas skulim ol pikinini meri na pikinini man. Baibel i tokim ol pikinini man olsem ol i no ken ‘sakim lo bilong mama bilong ol.’ (Sindaun 6:​20, NW ) Na tu, Sindaun sapta 31 i kamapim ‘tok mama bilong King Lemuel i bin autim long em bilong givim gutpela tingting long em.’ Em i givim tok long pikinini man bilong em olsem em i no ken mekim nabaut long pasin bilong dring alkohol, em i tok: “Ol king i no ken dring wain na skrap long daunim olkain bia. Nogut ol i dring na ol i lusim tingting long ol lo na ol i no mekim stretpela pasin long ol rabisman.”​—Sindaun 31:​1, 4, 5.

Na tu, olgeta yangpela man i tingting long marit ol i bihainim savetingting sapos ol i tingim tok mama i givim long King Lemuel long wanpela “meri i gat gutpela pasin tru,” em i bin tok: “Kain meri olsem i winim olkain ston i dia tumas.” Taim em i stori pinis long gutpela wok wanpela meri olsem i mekim bilong helpim famili, mama bilong king i tok: “Wanpela meri inap givim switpela tok long yumi, tasol pasin bilong en i narakain. Na maski meri i luk nais tru, em i no inap i stap olsem oltaim. Mobeta yumi litimapim nem bilong meri i save aninit long Bikpela.” (Sindaun 31:​10-31) Em nau, Man Bilong Wokim yumi, em i bin wokim ol meri bambai ol narapela i litimapim nem bilong em na em i holim bikpela wok insait long famili.

Insait long kongrigesen Kristen, ol i save litimapim nem bilong ol meri marit na mama na tenkyu long ol. Efesus 5:​25 i tok: “Yupela man, yupela i mas laikim tumas ol meri bilong yupela.” Yangpela man Timoti, em mama na bubu meri i bin helpim em long rispektim “buk i gat tok bilong God,” em i kisim tok bilong God olsem: “Yu mas mekim wankain pasin long ol lapun meri olsem yu save mekim long ol mama bilong yu.” (2 Timoti 3:15; 1 Timoti 5:​1, 2) Olsem na man i mas rispektim wanpela lapun meri olsem em i rispektim mama bilong em. Tru tumas, God i save laikim tru ol meri na i givim biknem long ol.

Tok Tenkyu

Wanpela man i kamap bikpela long hap we ol man i ting ol meri i no gutpela olsem ol man, em i tok: “Mi bin lain olsem ol man i gat namba, na mi lukim ol man i mekim nogut long ol meri na i no rispektim ol. Olsem na mi bin hatwok long tingim ol meri olsem Man Bilong Wokim ol, em i save tingim ol​—olsem ol i poroman na helpim insait long famili na ol i insait long wok bilong skulim ol pikinini. Tru, mi hatwok long tok tenkyu na litimapim nem bilong meri bilong mi, tasol mi luksave olsem hatwok bilong meri bilong mi i mekim na ol pikinini bilong mi i gat ol gutpela pasin.”

Tru tumas, ol mama i mekim wok bilong ol olsem tisa ol i ken amamas long wok bilong ol. Em i wanpela gutpela wok tru. I stret yumi givim gutpela tok amamas long ol na kamapim olsem yumi pilim tru hatwok bilong ol. Yumi lain long planti samting long ol mama​—ol gutpela pasin i helpim yumi long i stap bilong yumi na i bikpela samting bilong helpim yumi long pren gut wantaim ol narapela, na planti taim ol bai skulim ol yangpela long stretpela pasin na ol samting bilong spirit bambai ol i ken bihainim stretpela rot. Olsem wanem? I no longtaim i go pinis na yu tok tenkyu long mama bilong yu long ol samting em i bin mekim bilong helpim yu?

[Piksa long pes 9]

Mama bilong Peter i skulim em olsem em i no ken givap

[Piksa long pes 10]

Ahmed i pilim tru pasin bilong meri bilong em long helpim em long mekim bikpela long ol pikinini

[Piksa long pes 10]

Man bilong Lina i ting ol bilip bilong lotu bilong meri bilong em i as bilong ol gutpela pasin bilong pikinini meri bilong em