Hatwok Bilong Ol Mama
“Ol nambawan bikpela wok bilong helpim ol manmeri em ol wok insait long famili. . . . Sapos mama i no mekim wok bilong em, bai i no gat lain i stap bihain, o lain i kamap bihain bai i nogut tru.”—Theodore Roosevelt, namba 26 presiden bilong Amerika.
TRU tumas, ol mama i bikpela samting long i stap bilong ol man, tasol wok bilong ol mama i no bilong karim ol pikinini tasol, nogat. Long wok bilong ol mama long planti hap bilong graun long nau, wanpela man bilong raitim ol buk i tok: “Mama i gat bikpela wok tru long lukautim helt, skul, tingting, pasin na bel bilong ol wan wan pikinini.”
Wanpela wok bilong ol mama em wok bilong skulim ol pikinini. Planti pikinini i save lain long ol namba wan tok na pasin bilong toktok long mama bilong ol. Long olgeta de ol mama i save lusim bikpela haptaim moa wantaim ol pikinini, winim poroman marit bilong ol. Planti taim em i nambawan tisa bilong ol pikinini na em i mekim bikpela wok bilong stretim ol. Olsem na planti savetok i save litimapim tru bikpela wok bilong ol mama.
Man Bilong Wokim yumi, God Jehova, em tu i save litimapim nem bilong ol mama. Wanpela bilong ol Tenpela Lo, em “God yet i bin raitim” long ol hap ston, i tokim ol pikinini: “Yupela i mas aninit long papa na mama bilong yupela.” (Kisim Bek 20:12, NW; 31:18; Lo 9:10) Na tu, wanpela savetok long Baibel i tok long “lo bilong mama bilong yu.” (Sindaun 1:8, NW ) Planti man long nau i luksave olsem pasin bilong skulim ol pikinini kirap long taim mama i karim ol i go inap long taim ol i gat 3-pela krismas em i bikpela samting tru—insait long ol dispela yia planti taim ol mama i lukautim ol pikinini.
Wanem Sampela Hatwok?
Wanpela hatwok long planti mama long skulim ol pikinini bilong ol taim ol i liklik yet, em ol i mas mekim wok mani bilong helpim famili. Yunaitet Nesen i bungim ol ripot na ol i kisim save olsem long ol kantri i gat planti wok bisnis, winim 50 pesen bilong ol mama i gat ol pikinini i no winim yet 3-pela krismas ol i save mekim wok mani.
Na tu, planti mama i gat hatwok long ol yet i mas mekim bikpela long ol pikinini, long wanem, man bilong ol i lusim famili bilong mekim wok mani long narapela taun o kantri. Ol ripot i soim olsem long sampela hap bilong Amenia, klostu 33 pesen bilong ol man i bin go long narapela kantri bilong painim wok mani. Sampela mama i stap wanpis na ol yet i mas mekim bikpela long ol pikinini, long wanem, poroman marit bilong ol i lusim ol o em i dai.
Long sampela kantri, hatwok bilong planti mama em olsem: Ol i no skul. Lain UN Department of Economic and Social Affairs i tok long ol 876 milion manmeri bilong graun i no save long rit rait inap 66 pesen em ol meri. Lain UNESCO i tok, long Afrika, long ol kantri we ol man i save mekim tok ples Arab, na long Is na Saut Esia, winim 60 pesen bilong ol meri i no save long rit rait. Na tu, planti man i ting i no gat wok long skulim ol meri na skul bai mekim na ol meri i no fit long karim pikinini.
Nius Outlook i tok, long wanpela distrik bilong provins Kerala long India we planti yangpela meri i kamap mama taim ol i gat 15 krismas, ol man i no laikim ol meri i bin skul. Long neiba kantri, long Pakistan, ol famili i save tingim ol pikinini man tasol. Ol i skulim gut ol pikinini man bambai ol i ken painim gutpela wok mani na ol i ken helpim papamama bilong ol taim ol i lapun. Tasol long ol samting bilong ol pikinini meri, buk Women’s Education in Developing Countries i tok, “ol papamama i no laik tromoi bikpela mani bilong skulim ol pikinini meri bilong ol, long wanem, ol i no ting ol pikinini meri bai inap long helpim famili long mani samting.”
Na tu, ol kastam bilong ples i givim hatwok long ol meri. Olsem: Long sampela kantri ol mama i mas bihainim kastam bilong ples na sapotim pasin bilong salim ol yangpela pikinini meri bilong maritim wanpela man o sapotim pasin bilong katim hap skin long sem bilong meri. Na tu, i gat tambu long ol mama i skulim na stretim ol pikinini man bilong ol. Olsem wanem? Ol mama i mas bihainim ol dispela kastam na larim ol narapela i skulim ol pikinini man bilong ol?
Long ol stori i kamap bihain long dispela, bai yumi kisim save long olsem wanem sampela mama i winim ol dispela hatwok. Na tu, bai yumi traim long pilim moa yet ol wok ol mama i save mekim na kisim stretpela tingting long wok bilong ol mama long skulim ol pikinini.
[Blok/Piksa long pes 4]
“Long pasin bilong kirapim tingting bilong ol pikinini na kirapim ol long mekim ol samting, wok bilong ol mama i bikpela samting.”—Wanpela bung (Regional Summit on Children’s Rights), long Bekina Faso, 1997.
[Ol Piksa long pes 3]
Ol mama i save mekim bikpela wok long lukautim helt, skul, pasin, na bel bilong ol wan wan pikinini