Tok Bilong God i Gat Laip

Krais Jisas—Liklik Pikinini o Bikpela King?

LONG taim bilong Krismas planti manmeri i save tingim Jisas i stap liklik pikinini. Ol i save wokim piksa bilong ol “saveman” i kam lukim liklik nupela pikinini. Ol i save tok, mama i karim Jisas long Desemba, long taim bilong Krismas. Tasol Baibel i tok wanem?

Gutpela sapos yu opim Baibel na yu kaunim gut Luk 2:1-20 na Matyu 2:1-16. Baibel i tok, taim mama i karim Jisas ol wasman bilong sipsip ol i stap ausait na ol i was long sipsip bilong ol. Tasol long hap bilong Palestain Desemba em i taim bilong kol na ren, na long kain taim olsem ol wasman i no save stap ausait na was long sipsip bilong ol. Nogat.

Na Baibel i tok, taim Maria i laik karim Jisas gavman i putim wanpela lo long ol i mas kisim nem bilong olgeta manmeri, na ol i mas i go bek long as ples bilong ol bilong raitim nem long buk bilong gavman. Yu ting gavman bai tokim ol manmeri long wokabaut i go long ples bilong ol long taim nogut bilong kol na ren, olsem long Desemba? Nogat, a? Nogut ol man i bikhet na ol i no laik i go. Dispela samting na sampela samting moa i soim yumi, mama i karim Jisas long Desemba, long taim bilong Krismas.

Na taim ol dispela “saveman” i kam praisim Jisas em i no stap liklik nupela pikinini long bokis kaikai bilong ol bulmakau. Nogat. Baibel i tok: “Ol i go insait long haus, na ol i lukim pikinini wantaim mama bilong en Maria.” (Matyu 2:11) Ol dispela “saveman” ol i husat tru? Wanpela sta i soim rot long ol, i no wanpela ensel i kisim ol i kam. Ol i saveman bilong ol haiden, ol i man bilong lukluk long ol sta na God i save tambuim dispela pasin.—Aisaia 47:12-15.

Olsem Baibel i tok, dispela sta i no kisim ol dispela man i go stret long Jisas long Betlehem; pastaim sta i kisim ol i go long King Herot long Jerusalem na King Herot i laik kilim i dai pikinini Jisas. Sapos dispela sta em i bilong God, yu ting God bai mekim wok long en bilong bringim ol dispela man i go long Herot pastaim? Nogat, a?

Taim dispela sta i kisim ol i go long Jisas, nau God i givim driman long ol na tokim ol ol i no ken i go bek long Herot. Long dispela rot God i lukautim Jisas na Herot i no kilim em i dai. Olsem wanem yumi save olsem? Long wanem taim Herot i save ol dispela man i go bek long ples long narapela rot, em i belhat na em i laik kilim i dai Jisas. Tasol God i wokim rot pinis bilong Jisas i ranawe. Olsem na dispela sta em i wanpela wok bilong Seten. Seten i mekim wok long en bilong kilim i dai Jisas.

Wanpela wok bilong Seten long nau, em olsem: Em i laik kirapim ol man long tingim Jisas i stap pikinini tasol. Tasol nau em i no liklik pikinini! Taim Jisas i no kamap yet long graun, ensel Gebriel i tokim mama bilong Jisas: “Em bai i stap king … kingdom bilong en bai i no pinis.” (Luk 1:33) Nau Krais Jisas i stap bikpela king long heven na sapos yumi laik i stap laip aninit long kingdom bilong em, yumi mas save long dispela samting.—Aisaia 9:6, 7.

[Piksa long pes 4]

Wanem samting long dispela piksa i no stret?

[Ol Piksa long pes 5]

Ol “saveman” i bihainim wanpela sta—tasol dispela sta em i bilong husat?

Yu save tingim Jisas i olsem wanem?