I Stap na Wok Bilong Jisas

Jisas na Ol Saveman Bilong Ol Haiden

SAMPELA man ol i kam long hap bilong sankamap. Ol i saveman bilong ol haiden, ol i save lukluk long ol sta bilong painim save. Taim ol i stap yet long ples bilong ol long hap bilong sankamap, ol i lukim wanpela nupela sta, na ol i wokabaut longwe tru bihainim dispela sta i kam long Jerusalem.

Taim ol dispela saveman bilong ol haiden i kamap pinis long Jerusalem, ol i askim olsem: ‘Dispela pikinini em i king bilong ol Juda, em i stap we? Mipela i lukim sta bilong em na mipela i kam bilong lotu long em.’

King Herot i stap long Jerusalem na taim em i harim dispela tok, em i guria. Em i singautim ol bikpris i kam na em i askim ol: ‘Krais bai kamap long wanem hap?’ Ol i kolim tok bilong Baibel na bekim tok long em olsem: ‘Long Betlehem’ Orait Herot i tokim ol long kisim ol dispela saveman bilong ol haiden i kam long em na em i tokim ol: ‘Yupela i go na wok strong long painim dispela pikinini, na taim yupela i painim em pinis, orait, kam bek tokim mi inap long mi ken i go na lotu long em tu.’ Tasol Herot i laik painim dispela pikinini bilong kilim em i dai!

Ol i wokabaut i go na wanpela narakain samting i kamap. Dispela sta ol i lukim long hap bilong sankamap em i go paslain long ol. Em i no wanpela sta nating; nogat; wanpela man i putim bilong soim rot long ol. Ol dispela saveman bilong ol haiden i bihainim sta i go na bihain sta i sanap antap long haus Josep tupela Maria i stap long en.

Taim ol saveman bilong ol haiden i kam insait long haus, ol i lukim Maria i stap wantaim dispela yangpela pikinini Jisas. Ol i brukim skru na lotu long pikinini. Ol i opim paus bilong ol na ol i givim sampela presen long em, olsem gol, na paura bilong smok smel, na gutpela sanda. Long driman God i toksave long ol, ol i no ken i go bek long Herot na tokim em pikinini i stap we. Olsem na ol i bihainim narapela rot na ol i go bek long ples bilong ol.

Yu ting husat i putim dispela sta bilong soim rot long ol dispela saveman bilong ol haiden? Yu mas tingim: Dispela sta i no kisim ol i go stret long Jisas long Betlehem, a? Em i kisim ol i go long King Herot long Jerusalem, em King Herot i laik kilim i dai Jisas. Sapos God i no bin tokim ol dispela saveman ol i no ken i go bek long Herot, Herot inap kilim i dai Jisas. Olsem na yumi save, birua bilong God, em Seten, em i putim dispela sta, long wanem em i laik kilim i dai Jisas. Matyu 2:​1-12; Maika 5:⁠2.

◆ Olsem wanem yumi save dispela sta bilong ol saveman bilong ol haiden, em i no wanpela sta nating?

◆ Jisas i stap we taim ol saveman bilong ol haiden i painim pinis em?

◆ Olsem wanem yumi save Seten i putim dispela sta bilong soim rot long ol dispela saveman bilong ol haiden?