Failimon—Ol i Bihainim Tru Pasin Kristen
MEKIM pasin i stret wantaim tok yu autim! Jisas i kamapim gut dispela samting taim em i tokaut long pasin nogut bilong ol hetman bilong lotu long taim bilong em. (Matyu sapta 23) Tasol olsem wanem long ol tisa long kongrigesen Kristen bilong pastaim? Ol i save mekim pasin i stret wantaim ol tok ol i autim? Sapos yu kaunim hap bilong Failimon long Baibel yu ken save, ol i bihainim tru.
Pol i raitim pas i go long Failimon, i no long kongrigesen, long wanem em i laik tokim Failimon long wanpela samting. Na Pol yet i raitim dispela pas, em i no tokim wanpela kuskus long raitim.
Bilong wanem Pol i raitim pas long Failimon? Pol i laik salim wokboi bilong Failimon, em Onisimas, i go bek long em. Onisimas i bin ranawe. Ating em i stilim sampela mani bilong Failimon bilong baim rot na em i go long Rom. Tasol long Rom Onisimas i painim Pol, na Pol i autim tok long em na em i kamap Kristen. Em i mekim gutpela wok bilong helpim Pol na Pol i laikim em tru. Tasol Pol i no laik pasim Onisimas i stap wantaim em sapos Failimon i no orait long dispela samting. Olsem na em i laik salim Onisimas i go bek long Failimon na Onisimas i laik i go. Nau Onisimas i no wokboi nating bilong Failimon; nogat; em i brata tru bilong Failimon.
Onisimas em i wanpela brata tru, olsem na Pol i givim pas bilong kongrigesen bilong Efesas na Kolosi long Onisimas na Tikikas bilong karim i go. (Efesas 6:21, 22; Kolosi 4:7-9) Long dispela tupela pas Pol i tok ol wokboi i mas aninit long bos bilong ol na bihainim tok bilong ol. (Efesas 6:5-7; Kolosi 3:22, 23) Olsem na Pol i mekim pasin i stret wantaim dispela tok em i autim na em i salim Onisimas i go bek long bos bilong em. Em i tingim gut samting bilong narapela man, na em i bihainim tok em yet i givim long ol man, olsem ol i mas daun long olgeta wok bilong ol gavman.—Rom 13:1-7; 1 Korin 7:20-24.
Na Pol i bihainim gutpela pasin em i tok ol narapela man i mas bihainim, olsem pasin daun na pasin sori na tingim gut ol narapela man. (Efesas 4:1-3; Filipai 2:3, 4; Kolosi 3:12-14) Em i wanpela aposel, tasol em i no laik subim Failimon long kisim bek Onisimas olsem brata tru bilong em. Pol i tok pasin bilong sori i pasim tupela wantaim, na tupela i stap poroman tru, na long pasin daun Pol i tok em i laik bai dispela samting i kirapim Failimon long kisim bek Onisimas na lusim tingting long rong em i bin mekim. (Failimon 8, 9, 17) Em gutpela pasin ol wasman Kristen long nau i ken bihainim!
Failimon i bin harim gutnius long rot bilong Pol. Pol i helpim em na em i lusim kalabus bilong ol pasin haiden. Tasol em inap mekim nogut long Onisimas na bai em i no gat kot. Na i gat as na em i ken kros long Onisimas. Tasol Pol i kirapim Failimon long mekim gutpela pasin sori na pasin marimari. Pol yet i laik mekim pasin olsem na em i tok: “Sapos [Onisimas] i bin rongim yu long wanpela samting, o sapos em i gat dinau long yu, orait yu mas senisim nem bilong em na putim nem bilong mi long dispela. . . . Bai mi yet mi bekim dispela dinau.”—Failimon 18, 19.
Pas Pol i raitim long Failimon i soim yumi, ol Kristen bilong pastaim ol i bin raitim tok bilong Nupela Testamen na ol tisa bilong lotu Kristen long pastaim ol save bihainim tru pasin Kristen. Ol i mekim pasin i stret wantaim tok ol i autim.