Tok Bilong God i Gat Laip

Yu Tingting long Kisim Wanem Samting?

YU TINGTING long kisim bikpela skul? o bikpela wok? o mani? o biknem? o gutpela sindaun? Planti man i tingting long kisim ol dispela samting. Tasol yu ting ol dispela samting inap helpim yu long i stap amamas tru?

Orait, tingim Moses. Lukim dispela piksa. Moses i stap olsem “pikinini bilong pikinini meri bilong king bilong Isip.” Moses i go bikpela long haus bilong dispela bikpela king. Em inap “bihainim pasin bilong sin na painim amamas bilong sotpela taim.” Na em inap kisim “olgeta mani na bilas samting bilong Isip.”—Hibru 11:24-26.

Na Baibel i tok: “Moses i skul long olgeta gutpela save bilong ol Isip.” (Aposel 7:22) Moses i kisim olgeta samting planti man long nau ol i laik kisim. Tasol yu ting ol dispela samting i helpim em long i stap amamas tru?

Nogat. Moses i kisim olgeta dispela samting bilong skin, tasol em i save, ol dispela samting i no bilong i stap oltaim. Yu tu yu save long dispela bikpela samting? Jisas yet i tok: “Sapos wanpela man i kisim olgeta samting bilong graun, tasol laip bilong em yet i lus, bai olgeta samting i helpim em olsem wanem?” (Matyu 16:26) Tru tumas, sapos laip bilong yumi i lus, olgeta samting yumi bin kisim i no inap helpim yumi. Em i stret, a?

Olsem na Baibel i tok, Moses “i ting long dispela gutpela pe bambai God i givim em Oltaim Moses i tingim ol samting God i tok promis long en. Em i tingting long kisim laip i stap oltaim. Em i save dispela gutpela samting God i laik givim long em i winim olgeta narapela samting. “Moses i olsem i lukim God, olsem na em i stap strong.” (Hibru 11:26, 27) Moses i bilip tru olsem Jehova em i stap na em bai truim ol tok promis bilong em.

Yu tu yu bilip olsem? Yu bilip tru long ol promis bilong God, em i tok long givim laip oltaim long yumi long gutpela ples paradais? Taim yu kaunim ol dispela tok promis bilong God, yu save lukim olsem piksa long tingting bilong yu olsem yu yet yu stap long dispela gutpela ples paradais? (Sam 37:9-11, 29; 46:8, 9; 72:7, 8, 16; Aisaia 9:6, 7; 11:6-9; 35:5, 6; Luk 23:43; Revelesen 21:3, 4) Sapos yu bilip tru olsem, orait bai yu bihainim pasin bilong Moses. Bai nambawan bikpela tingting bilong yu i olsem: Bai yu tingting long mekim wok bilong God Jehova bambai em i ken orait long yu.

[Piksa long pes 4]

Moses i tingting long kisim wanem samting?

[Piksa long pes 5]

Yu tingting long kisim ol samting God i tok promis long givim long ol wokboi bilong em?